Shiva Purana · Chapter 2.4.18

nārada uvāca //
jīvite girijāputre devyā dṛṣṭe prajeśvara //
tataḥ kimabhavattatra kṛpayā tadvadādhunā

brahmovāca //
jīvite girijāputre devyā dṛṣṭe munīśvara //
yajjātaṃ tacchṛṇuṣvādya vacmi te mahadutsavam

jīvitassa śivāputro nirvyagro vikṛto mune//
abhiṣiktastadā devairgaṇādhyakṣairgajānanaḥ

dṛṣṭvā svatanayaṃ devī śivā harṣasamanvitā //
gṛhītvā bālakaṃ dorbhyāṃ pramudā pariṣasvaje

vastrāṇi vividhānīha nānālaṃkaraṇāni ca //
dadau prītyā gaṇeśāya svaputrāya mudāṃbikā

pūjayitvā tayā devyā siddhibhiścāpyanekaśaḥ //
kareṇa sparśitassotha sarvaduḥkhahareṇa vai

pūjayitvā sutaṃ devī mukhamācumbya śāṃkarī //
varāndadau tadā prītyā jātastvaṃ duḥkhito'dhunā

dhanyosi kṛtakṛtyosi pūrvapūjyo bhavādhunā //
sarveṣāmamarāṇāṃ vai sarvadā duḥkhavarjitaḥ

ānane tava sindūraṃ dṛśyate sāṃprataṃ yadi //
tasmāttvaṃ pūjanīyosi sindūreṇa sadā naraiḥ

puṣpairvā candanairvāpi gandhenaiva śubhena ca //
naivedye suramyeṇa nīrājena vidhānataḥ

tāṃmbūlairatha dānaiśca tathā prakramaṇairapi //
namaskāravidhānena pūjāṃ yaste vidhāsyati

tasya vai sakalā siddhirbhaviṣyati na saṃśayaḥ //
vighnānyanekarūpāṇi kṣayaṃ yāsyaṃtyasaṃśayam

brahmovāca //
ityuktvā ca tadā devī svaputraṃ taṃ maheśvaro //
nānāvastubhirutkṛṣṭaṃ punarapyarcayattathā

tatassvāsthyaṃ ca devānāṃ gaṇānāṃ ca viśeṣataḥ //
girijākṛpayā vipra jātaṃ tatkṣaṇamātrataḥ

etasmiṃśca kṣaṇe devā vāsavādyāḥ śivaṃ mudā//
stutvā prasādya taṃ devaṃ bhaktā ninyuḥ śivāṃtikam

saṃsādya giriśaṃ paścādutsaṃge sannyaveśayan //
bālakaṃ taṃ maheśānyāstrijagatsukhahetave

śivopi tasya śirasi dattvā svakarapaṃkajam //
uvāca vacanaṃ devān putro'yamiti me'paraḥ

gaṇeśopi tadotthāya namaskṛtya śivāya vai //
pārvatyai ca namaskṛtya mahyaṃ vai viṣṇave tathā

nārādādyānṛṣīnsarvānsatvāsthāya puro'bravīt//
kṣaṃtavyaścāparādho me mānaścaivedṛśo nṛṇām

ahaṃ ca śaṃkaraścaiva viṣṇuścaite trayassurāḥ//
pratyūcuryugapatprītyā dadato varamuttamam

trayo vayaṃ suravarā yathāpūjyā jagattraye//
tathāyaṃ gaṇanāthaśca sakalaiḥ pratipūjyatām

vayaṃ ca prākṛtāścāyaṃ prākṛtaḥ pūjya eva ca //
gaṇeśo vighnahartā hi sarvakāmaphalapradaḥ

etatpūjāṃ purā kṛtvā paścātpūjyā vayaṃ naraiḥ //
vayaṃ ca pūjitāssarve nāyaṃ cāpūjito yadā

asminnapūjite devāḥ parapūjākṛtā yadi //
tadā tatphalahāniḥ syānnātra kāryā vicāraṇā

brahmovāca //
ityuktvā sa gaṇeśāno nānāvastubhirādarāt //
śivena pūjitaḥ pūrvaṃ viṣṇunānu prapūjitaḥ

brahmaṇā ca mayā tatra pārvatyā ca prapūjitaḥ //
sarvairdevairgaṇaiścaiva pūjitaḥ parayā mudā

savairmilitvā tatraiva brahmaviṣṇuharādibhiḥ //
sagaṇeśaśśivātuṣṭyai sarvādhyakṣo niveditaḥ

punaścaiva śivenāsmai suprasannena cetasā //
sarvadā sukhadā loke varā dattā hyanekaśaḥ

śiva uvāca //
he girīndrasutāputra saṃtuṣṭohaṃ na saṃśayaḥ //
mayi tuṣṭe jagattuṣṭaṃ viruddhaḥ kopi no bhavet

bālarūpopi yasmāttvaṃ mahāvikramakārakaḥ //
śaktiputrassutejasvī tasmādbhava sadā sukhī

tvannāma vighnahaṃtṛtve śreṣṭhaṃ caiva bhavatviti//
mama sarvagaṇādhyakṣaḥ saṃpūjyastvaṃ bhavādhunā

evamuktvā śaṃkareṇa pūjāvidhiranekaśaḥ //
āśiṣaścāpyanekā hi kṛtāstasmiṃstu tatkṣaṇāt

tato devagaṇāścaiva gīta vādyaṃ ca nṛtyakam //
mudā te kārayāmāsustathaivapsarasāṃ gaṇāḥ

punaścaiva varo dattassuprasannena śaṃbhunā //
tasmai ca gaṇanāthāya śivenaiva mahātmanā

caturthyāṃ tvaṃ samutpanno bhādre māsi gaṇeśvara //
asite ca tathā pakṣe caṃdrasyodayane śubhe

prathame ca tathā yāme girijāyāssucetasaḥ //
āvirbabhūva te rūpaṃ yasmātte vratamuttamam /३६//
tasmāttaddinamārabhya tasyāmeva tithau mudā //
vrataṃ kāryaṃ viśeṣeṇa sarvasiddhyai suśobhanam

yāvatpunassamāyāti varṣānte ca caturthikā //
tāvadvrataṃ ca kartavyaṃ tava caiva mamājñayā

saṃsāre sukhamicchanti ye'tulaṃ cāpyanekaśaḥ //
tvāṃ pūjayantu te bhaktyā caturthyāṃ vidhipūrvakam

mārgaśīrṣe tathā māse ramā yā vai caturthikā //
prātaḥsnānaṃ tadā kṛtvā vrataṃ viprānnivedayeta

dūrvābhiḥ pūjanaṃ kāryamupavāsastathāvidhaḥ //
rātreśca prahare jāte snātvā saṃpūjayennaraḥ

mūrtiṃ dhātumayīṃ kṛtvā pravālasaṃbhavāṃ tathā //
śvetārkasaṃbhavāṃ cāpi mārddikāṃ nirmitāṃ tathā

pratiṣṭhāpya tadā tatra pūjayetprayataḥ pumān //
gaṃdhairnānāvidhairdivyaiścandanaiḥ puṣpakairiha

vitastimātrā dūrvā ca vyaṃgā vai mūlavarjitā //
īdṛśānāṃ tadbalānāṃ śatenaikottareṇa ha

ekaviṃśatikenaiva pūjayetpratimāṃ sthitām //
dhūpairdīpaiśca naivedyairvividhairgaṇanāyakam

tāmbūlādyarghasaddravyaiḥ praṇipatya stavaistathā //
tvāṃ tatra pūjayitvetthaṃ bālacaṃdraṃ ca pūjayet

paścādviprāṃśca saṃpūjya bhojayenmadhurairmudā //
svayaṃ caiva tato bhuṃjyānmadhuraṃ lavaṇaṃ vinā

visarjayettataḥ paścānniyamaṃ sarvamātmanaḥ //
gaṇeśasmaraṇaṃ kuryyātsaṃpūrṇaṃ syādvrataṃ śubham

evaṃ vratena saṃpūrṇe varṣe jāte narastadā //
udyāpanavidhiṃ kuryādvratasampūrttihetave

dvādaśa brāhmaṇāstatra bhojanīyā madājñayā //
kuṃbhamekaṃ ca saṃsthāpya pūjyā mūrtistvadīyikā

sthaṇḍileṣṭapalaṃ kṛtvā tadā vedavidhānataḥ //
homaścaivātra kartavyo vittaśāṭhyavivarjitaiḥ

strīdvayaṃ ca tathā cātra baṭukadvayamādarāt//
bhojayetpūjayitvā vai mūrtyagre vidhipūrvakam

niśi jāgaraṇaṃ kāryaṃ punaḥ prātaḥ prapūjayet//
visarjanaṃ tataścaiva punarāgamanāya ca

bālakāccāśiṣo grāhyāssvastivācanameva ca //
puṣpāṃjaliṃ pradadyācca vratasaṃpūrṇa hetave

namaskārāṃstataḥ kṛtvā nānākāryaṃ prakalpayet //
evaṃ vrataṃ kṛtaṃ yena tasyepsitaphalaṃ bhavet

yo nityaṃ śraddhayā sārddhaṃ pūjāṃ caiva sva śaktitaḥ //
kuryyāttava gaṇeśāna sarvakāmaphalāptaye

sindūraiścandanaiścaiva taṃḍulaiḥ ketakaistathā //
upacārairanekaiśca pūjayettvāṃ gaṇe śvaram

evaṃ tvāṃ pūjayeyurye bhaktyā nānopacārataḥ //
teṣāṃ siddhirbhavennityaṃ vighnanāśo bhavediha

sarvairvarṇaiḥ prakarttavyā strībhiścaiva viśeṣataḥ //
udayābhimukhaiścaiva rājabhiśca viśeṣataḥ

yaṃ yaṃ kāmayate yo vai taṃtamāpnoti niścitam //
ataḥ kāmayamānena tena sevyassadā bhavān

// brahmovāca //
śivenaiva tadā proktaṃ gaṇeśāya mahātmane //
tadānīṃ daivataiścaiva sarvaiśca ṛṣisattamaiḥ

tathetyuktvā tu taissarvairgaṇaiśśaṃbhupriyairmune //
pūjito hi gaṇādhīśo vidhinā parameṇa saḥ

tataścaiva gaṇāssarve praṇemuste gaṇeśvaram //
samānarcurviśeṣeṇa nānāvastubhirādarāt

girijāyāssamutpanno yaśca harṣo munīśvara //
caturbhirvadanairvai tamavarṇyaṃ ca kathaṃ bruve

devaduṃdubhayo nedurnanṛtuścāpsarogaṇāḥ //
jagurgaṃdharvamukhyāśca puṣpavarṣaṃ papāta ha

jagatsvāsthyaṃ tadā prāpa gaṇādhīśe pratiṣṭhite//
mahotsavo mahānāsītsarvaṃ duḥkhaṃ kṣayaṃ gaṇam

śivāśivau ca modetāṃ viśeṣeṇāti nārada //
āsītsumaṃgalaṃ bhūri sarvatra sukhadāyakam

tato devagaṇāḥ sarve ṛṣīṇāṃ ca gaṇāstathā //
samāgatāśca ye tatra jagmuste tu śivājñayā

praśaṃsaṃtaśśivā tatra gaṇeśaṃ ca punaḥ punaḥ //
śivaṃ caiva tathā stutvā kīdṛśaṃ yuddhameva ca

yadā sā girijā devī kopahīnā babhūva ha //
śivo'pi girijāṃ tatra pūrvavatsaṃprapadya tām

cakāra vividhaṃ saukhyaṃ lokānāṃ hitakāmyayā//
svātmārāmo'pi paramo bhaktakāryodyataḥ sadā

viṣṇuśca śivamāpṛcchya brahmāhaṃ taṃ tathaiva hi //
āgacchāva svadhāmaṃ ca śivau saṃsevya bhaktitaḥ

nārada tvaṃ ca bhagavansaṃgīya śivayoryaśaḥ //
āgamo bhavanaṃ svaṃ ca śivau pṛṣṭvā munīśvara

etatte sarvamākhyātaṃ mayā vai śivayoryaśaḥ //
bhavatpṛṣṭena vighneśa yaśassaṃmiśramādarāt

idaṃ sumaṃgalākhyānaṃ yaḥ śṛṇoti susaṃyataḥ //
sarvamaṃgala saṃyuktassa bhavenmaṃgalālayaḥ

aputro labhate putraṃ nirdhano labhate dhanam //
bhāyārthī labhate bhāryāṃ prajārthī labhate prajām

ārogyaṃ labhate rogī saubhāgyaṃ durbhago labhet //
naṣṭaputraṃ naṣṭadhanaṃ proṣitā ca patiṃ labhet

śokāviṣṭaśśokahīnassa bhavennātra saṃśayaḥ //
idaṃ gāṇeśamākhyānaṃ yasya gehe ca tiṣṭhati

sadā maṃgalasaṃyuktassa bhavennātra saṃśayaḥ //
yātrākāle ca puṇyāhe yaśśṛṇoti samāhitaḥ //
sarvābhīṣṭaṃ sa labhate śrīgaṇeśaprasādataḥ

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe gaṇeśagaṇādhipapadavīvarṇanaṃ nāmāṣṭādaśo'dhyāyaḥ