Shiva Purana · Chapter 2.4.15

// brahmovāca //
ityuktā vibhunā tena niścayaṃ paramaṃ gatāḥ //
sannaddhāstu tadā tatra jagmuśca śivamandiram

gaṇeśo'pi tathā dṛṣṭvā hyāyātāngaṇasattamān //
yuddhā''ṭopaṃ vidhāyaiva sthitāṃścaivābravīdidam

gaṇeśa uvāca //
āyāṃtu gaṇapāssarve śivājñāpa ripālakāḥ //
ahamekaśca bālaśca śivājñāparipālakaḥ

tathāpi paśyatāṃ devī pārvatī sūnujaṃ balam //
śivaśca svagaṇānāṃ tu balaṃ paśyatu vai punaḥ

balavadbālayuddhaṃ ca bhavānīśiva pakṣayoḥ //
bhavadbhiśca kṛtaṃ yuddhaṃ pūrvaṃ yuddhaviśāradaiḥ

mayā pūrvaṃ kṛtaṃ naiva bālosmi kriyate'dhunā //
tathāpi bhavatāṃ lajjā girijāśivayoriha

mamaivaṃ tu bhavennaiva vaiparītyaṃ bhaviṣyati //
mamaiva bhavatāṃ lajjā girijāśivayoriha

evaṃ jñātvā ca karttavyaḥ samaraśca gaṇeśvarāḥ //
bhavadbhissvāminaṃ dṛṣṭvā mayā ca mātaraṃ tadā

kriyate kīdṛśaṃ yuddhaṃ bhavitavyaṃ bhavatviti //
tasya vai vāraṇe ko'pi na samarthastrilokake

brahmovāca //
ityevaṃ bhartsitāste tu daṃḍabhūṣitabāhavaḥ //
vividhānyāyudhānyevaṃ dhṛtvā te ca samāyayuḥ

gharṣayantastathā daṃtān huṃkṛtya ca punaḥpunaḥ//
paśya paśya bruvaṃtaśca gaṇāste samupāgatāḥ

naṃdī prathamamāgatya dhṛtvā pādaṃ vyakarṣayat //
dhāvanbhṛṃgī dvitīyaṃ ca pādaṃ dhṛtvā gaṇasya ca

yāvatpāde vikarṣantau tāvaddhastena vai gaṇaḥ //
āhatya hastayostābhyāmutkṣiptau pādakau svayam

atha devīsuto vīrassagṛhya parighaṃ bṛhat//
dvārasthito gaṇapatiḥ sarvānāpothayattadā

keṣāṃcitpāṇayo bhinnāḥ keṣāṃcitpṛṣṭha kāni ca //
keṣāṃcicca śirāṃsyeva keṣāṃcinmastakāni ca

keṣāṃcijānunī tatra keṣāṃcitskaṃdhakāstathā //
sammukhe cāgatā ye vai te sarve hṛdaye hatāḥ

kecicca patitābhūmau kecicca vidiśo gatāḥ //
keṣāṃciccaraṇau chinnau keciccharvāntikaṃ gatāḥ

teṣāṃ madhye tu kaścidvai saṃgrāme sammukho na hi //
siṃhaṃ dṛṣṭvā yathā yāṃti mṛgāścaiva diśo daśa

tathā te ca gaṇāssarve gatāścaiva sahasraśaḥ//
parāvṛtya tathā sopi sudvāri samupasthitaḥ

kalpāṃtakaraṇe kālo dṛśyate ca bhayaṃkaraḥ //
yathā tathaiva dṛṣṭassa sarveṣāṃ pralayaṃkaraḥ

etasminsamaye caiva sarameśasureśvarāḥ //
preritā nāradeneha devāssarve samāgaman

samabruvaṃstadā sarve śiva sya hitakāmyayā //
puraḥsthitvā śivaṃ natvā hyājñāṃ dehi prabho iti

tvaṃ parabrahma sarveśassarve ca tava sevakāḥ //
sṛṣṭeḥ kartā sadā bhartā saṃhartā parameśvaraḥ

rajassattvatamorūpo līlayā nirguṇaḥ svataḥ //
kā līlā racitā cādya tāmidānīṃ vada prabho

// brahmovāca //
ityākarṇya vacasteṣāṃ muniśreṣṭha maheśvaraḥ //
gaṇān bhinnām̐stadā dṛṣṭvā tebhyassarvaṃ nyavedayat

atha sarveśvarastatra śaṃkaro munisattama //
vihasya girijānātho brahmāṇaṃ māmuvāca ha

śiva uvāca //
brahmañchṛṇu mama dvāri bāla ekassamāsthitaḥ //
mahābalo yaṣṭipāṇirgehāveśanivārakaḥ

mahāprahārakartā'sau matpārṣadavighātakaḥ //
parājayaḥ kṛtastena madgaṇānāṃ balādiha

brahman tvayaiva gaṃtavyaṃ prasādyo'yaṃ mahābalaḥ //
yathā brahmannayaḥ syādvai tathā kāryaṃ tvayā vidhe

// brahmovāca //
ityākarṇya prabhorvākyamajñātvā'jñānamohitaḥ //
tadīyanikaṭaṃ tāta sarvairṛṣivarairayām

samāyāntaṃ ca māṃ dṛṣṭvā sa gaṇeśo mahābalī//
krodhaṃ kṛtvā samabhyetya mama śmaśrūṇyavākirat

kṣamyatāṃ kṣamyatāṃ deva na yuddhārthaṃ samāgataḥ //
brāhmaṇohamanugrāhyaḥ śāṃtikartānupadravaḥ

ityevaṃ bruvati brahmaṃstāvatparighamādade //
sa gaṇeśo mahāvīro bālo'bālaparākramaḥ

gṛhītaparighaṃ dṛṣṭvā taṃ gaṇeśaṃ mahābalam //
palāyanaparo yātastvahaṃ drutataraṃ tadā

yāta yāta bruvaṃtaste parighena hatāstadā //
svayaṃ ca patitāḥ kecitkecittena nipātitāḥ

kecicca śivasāmīpyaṃ gatvā tatkṣaṇamātrataḥ //
śivaṃ vijñāpayāṃcakrustadvṛttāṃ tamaśeṣataḥ

tathāvidhāṃśca tān dṛṣṭvā tadvṛttāṃtaṃ niśamya saḥ //
apāramādadhe kopaṃ haro līlāviśāradaḥ

iṃdrādikāndevagaṇān ṣaṇmukhapravarān gaṇān //
bhūtapretapiśācāṃśca sarvānādeśayattadā

te sarve ca yathāyogyaṃ gatāste sarvato diśam //
taṃ gaṇaṃ haṃtukāmā hi śivājñātā udāyudhāḥ

yasya yasyāyudhaṃ yacca tattatsarvaṃ viśeṣataḥ//
tadgaṇeśopari balātsamāgatya vimocitam

hāhākāro mahānāsīttrailokye sacarācare //
trilokasthā janāssarve saṃśayaṃ paramaṃ gatāḥ

na yātaṃ brahmaṇo'pyāyurbrahmāṃḍa kṣayameti hi //
akāle ca tathā nūnaṃ śivecchāvaśataḥ svayam

te sarve cāgatāstatra ṣaṇmukhādyāśca ye punaḥ //
devā vyarthāyudhā jātā āścaryaṃ paramaṃ gatāḥ

etasminnantare devī jagadambā vibodhanā //
jñātvā taccaritaṃ sarvamapāraṃ krodhamādadhe

śaktidvayaṃ tadā tatra tayā devyā munīśvara //
nirmitaṃ svagaṇasyaiva sarvasāhāyyahetave

ekā pracaṃḍarūpaṃ ca dhṛtvātiṣṭhanmahāmune //
śyāmaparvatasaṃkāṃśaṃ vistīrya mukhagahvaram

ekā vidyutsvarūpā ca bahuhastasamanvitā //
bhayaṃkarā mahādevī duṣṭadaṃḍavidhāyinī

āyudhāni ca sarvāṇi mocitāni surairgaṇaiḥ //
gṛhītvā svamukhe tāni tābhyāṃ śīghraṃ ca cikṣipe

devāyudhaṃ na dṛśyeta parighaḥ paritaḥ punaḥ //
evaṃ tābhyāṃ kṛtaṃ tatra caritaṃ paramādbhutam

eko bālo'khilaṃ sainyaṃ loḍayāmāsa dustaram //
yathā girivareṇaiva loḍitassāgaraḥ purā

ekena nihatāssarve śakrādyā nirjarāstathā //
śaṃkarasya gaṇāścaiva vyākulāḥ abhavaṃstadā

atha sarve militvā te niśśvasya ca muhurmuhuḥ //
parasparaṃ samūcuste tatprahārasamākulāḥ

devagaṇā ūcuḥ //
kiṃ kartavyaṃ kva gaṃtavyaṃ na jñāyaṃte diśo daśa //
parighaṃ bhrāmayatyeṣa savyāpasavyameva ca

brahmovāca //
etatkāle'psaraśreṣṭhāḥ puṣpacandanapāṇayaḥ //
ṛṣayaśca tvadādyā hi ye'tiyuddhetilālasāḥ

te sarve ca samājagmuryuddhasaṃdarśanāya vai //
pūrito vyoma sanmārgastaistadā munisattama

tāste dṛṣṭvā raṇaṃ taṃ vai mahāvismayamāgatāḥ //
īdṛśaṃ paramaṃ yuddhaṃ na dṛṣṭaṃ caikadāpi hi

pṛthivī kaṃpitā tatra samudrasahitā tadā//
parvatāḥ patitāścaiva cakruḥ saṃgrāmasaṃbhavam

dyaurgraharkṣagaṇairghūrṇṇā sarve vyākulatāṃ gatāḥ //
devāḥ palāyitāssarve gaṇāśca sakalāstadā

kevalaṃ ṣaṇmukhastatra nāpalāyata vikramī //
mahāvīrastadā sarvānāvārya purataḥ sthitaḥ

śaktidvayena tadyuddhe sarve ca niṣphalīkṛtāḥ //
sarvāstrāṇi nikṛttāni saṃkṣiptānyamarairgaṇaiḥ 2.4.15.६० //
ye'va sthitāśca te sarve śivasyāṃtikamāgatāḥ //
devāḥ palāyitāssarve gaṇāśca sakalāstadā

te sarve militāścaiva muhurnatvā śivaṃ tadā //
abruvanvacanaṃ kṣipraṃ ko'yaṃ gaṇavaraḥ prabho

purā caiva śrutaṃ yuddhamidānīṃ bahudhā punaḥ //
dṛśyate na śrutaṃ dṛṣṭamīdṛśaṃ tu kadācana

kiṃcidvicāryatāṃ deva tvanyathā na jayo bhavet //
tvameva rakṣakassvāminbrahmāṃḍasya na saṃśayaḥ

brahmovāca //
ityevaṃ tadvacaḥ śrutvā rudraḥ paramakopanaḥ//
kopaṃ kṛtvā ca tatraiva jagāma svagaṇaissaha

devasainyaṃ ca tatsarvaṃ viṣṇunā cakriṇā saha //
samutsavaṃ mahatkṛtvā śivasyānujagāma ha

etasminnaṃtare bhaktyā namaskṛtya maheśvaram //
abravīnnārada tvaṃ vai devadevaṃ kṛtāṃjaliḥ

//
nārada uvāca //
devadeva mahādeva śṛṇu madvacanaṃ vibho//
tvameva sarvagassvāmī nānālīlāviśāradaḥ/

tvayā kṛtvā mahālīlāṃ gaṇagarvo'pahāritaḥ //
asmai dattvā balaṃ bhūri devagarvaśca śaṃkara

darśitaṃ bhuvane nātha svameva balamadbhutam//
svataṃtreṇa tvayā śaṃbho sarvagarvaprahāriṇā

idānīṃ na kuruṣveśa tāṃ līlāṃ bhaktavatsalaḥ //
svagaṇānamarāṃścāpi susanmānyābhivarddhaya

४/
na khelayedānīṃ jahi brahmapadaprada //
ityuktvā nārada tvaṃ vai hyaṃtarddhānaṃ gatastadā

iti śrīśivamahāpurāṇe dvi० rudrasaṃhitāyāṃ ca kumārakhaṇḍe gaṇeśayuddhavarṇanaṃ nāma pañcadaśo'dhyāyaḥ