Shiva Purana · Chapter 2.4.14

// brahmovāca //
gaṇāste krodhasaṃpannāstatra gatvā śivājñayā //
papracchurgirijāputraṃ taṃ tadā dvārapālakam

// śivagaṇā ūcuḥ //
ko'si tvaṃ kuta āyātaḥ kiṃ vā tvaṃ ca cikīrṣasi //
ito'dya gaccha dūraṃ vai yadi jīvitumicchasi

brahmovāca //
tadīyaṃ tadvacaḥ śrutvā girijātanayassa vai //
nirbhayo daṇḍapāṇiśca dvārapānabravīdidam

gaṇeśa uvāca //
yūyaṃ ke kuta āyātā bhavaṃtassundarā ime //
yāta dūraṃ kimarthaṃ vai sthitā atra virodhinaḥ

brahmovāca //
evaṃ śrutvā vacastasya hāsyaṃ kṛtvā parasparam//
ūcussarve śivagaṇā mahāvīrā gatasmayāḥ

parasparamiti procya sarve te śivapārṣadāḥ //
dvārapālaṃ gaṇeśaṃ taṃ pratyūcuḥ kuddhamānasāḥ

śivagaṇā ūcuḥ //
śrūyatāṃ dvārapālā hi vayaṃ śivagaṇā varāḥ //
tvāṃ nivārayituṃ prāptāśśaṃkarasyājñayā vibhoḥ

tvāmapīha gaṇaṃ matvā na hanyāmīnyathā hataḥ //
tiṣṭha dūre svatastvaṃ ca kimarthaṃ mṛtyumīhase

// brahmovāca // ityukto'pi gaṇeśaśca girijātanayo'bhayaḥ //
nirbhartsya śaṃkaragaṇānna dvāraṃ muktavāṃstadā

te sarvepi gaṇāśśaivāstatratyā vacanaṃ tadā //
śrutvā tatra śivaṃ gatvā tadvṛttāṃtamathābruvan

tataśca tadvacaḥ śrutvādbhutalīlo maheśvaraḥ //
vinirbhartsya gaṇānūce nijām̐llokagatirmune

maheśvara uvāca //
kaścāyaṃ vartate kiṃ ca bravītyarivaducchritaḥ //
kiṃ kariṣyatyasadbuddhiḥ svamṛtyuṃ vāṃchati dhruvam

dūrataḥ kriyatāṃ hyeṣa drārapālo navīnakaḥ//
klībā iva sthitāstasya vṛttaṃ vadatha me katham

svāminoktā gaṇāste cādbhutalīlena śaṃbhunā //
punarāgatya tatraiva tamūcurdvārapālakam

// śivagaṇā ūcuḥ //
re re dvārapa kastvaṃ hi sthitaśca sthāpitaḥ kutaḥ //
naivāsmāngāṇayasyevaṃ kathaṃ jīvitumicchasi

dvārapālā vayaṃ sarve sthitaḥ kiṃ paribhāṣase //
siṃhāsanagṛhītaśca śṛgālaḥ śivamīhate

tāvadgarjasi mūrkha tvaṃ yāvadgaṇa parākramaḥ //
nānubhūtastvayātraiva hyanubhūtaḥ patiṣyasi

ityuktastaissusaṃkuddho hastābhyāṃ yaṣṭikāṃ tadā //
gṛhītvā tāḍayāmāsa gaṇāṃstānparibhāṣiṇaḥ

uvācātha śivāputraḥ paribhartsya gaṇeśvarān //
śaṃkarasya mahāvīrānnirbhayastāngaṇeśvaraḥ

śivāputra uvāca //
yāta yāta tato dūre no cedvo darśayāmi ha //
svaparākramamatyugraṃ yāsyathātyupahāsyatām

ityākarṇya vacastasya girijātanayasya hi //
parasparamathocuste śaṃkarasya gaṇāstadā

śivagaṇā ūcuḥ //
kiṃ kartavyaṃ kva gaṃtavyaṃ mākriyate sa na kiṃ punaḥ //
maryādā rakṣyate'smābhiranyathā kiṃ bravīti ca

brahmovāca //
tataśśaṃbhugaṇāssarve śivaṃ dūre vyavasthitam //
krośamātraṃ tu kailāsādgatvā te ca tathābruvan

śivo vihasya tānsarvāṃstriśūlakara ugradhīḥ //
uvāca parameśo hi svagaṇān vīrasaṃmatān

śiva uvāca //
rere gaṇāḥ klībamatā na vīrā vīramāninaḥ //
madagre nodituṃ yogyā bhartsitaḥ kiṃ punarvadet

gamyatāṃ tāḍyatāṃ caiṣa yaḥ kaścitprabhavediha //
bahunoktena kiṃ cātra dūrīkartavya eva saḥ

// brahmovāca // //
iti sarve maheśena jagmustatra munīśvara //
bhartsitāstena devena procuśca gaṇasattamāḥ

śivagaṇā ūcuḥ /
rere tvaṃ śṛṇu vai bāla balātkiṃ paribhāṣase //
itastvaṃ dūrato yāhi no cenmṛtyurbhaviṣyati

// brahmovāca //
iti śrutvā vacasteṣāṃ śivājñākāriṇāṃ dhruvam //
śivāsutastadābhūtsa kiṃ karomīti duḥkhitaḥ

etasminnaṃtare devī teṣāṃ tasya ca vai punaḥ //
śrutvā tu kalahaṃ dvāri sakhīṃ paśyeti sābravīt

samāgatya sakhī tatra vṛttāṃtaṃ samabudhyata //
kṣaṇamātraṃ tadā dṛṣṭvā gatā hṛṣṭā śivāṃtikam

tatra gatvā tu tatsarvaṃ vṛttaṃ tadyadabhūnmune //
aśeṣeṇa tayā sakhyā kathitaṃ girijāgrataḥ

sakhyuvāca //
asmadīyo gaṇo yo hi sthito dvāri maheśvari //
nirbhartsayati taṃ vīrāśśaṃkarasya gaṇā dhruvam

śivaścaiva gaṇāssarve vinā te'vasaraṃ katham //
praviśaṃti haṭhādgehe naitacchubhataraṃ tava

samyak kṛtaṃ hyanenaiva na hi kopi praveśitaḥ //
duḥkhaṃ caivānubhūyātra tiraskārādikaṃ tathā

ataḥ parantu vāgvādaḥ kriyate ca parasparam //
vāgvāde ca kṛte naiva tarhyāyāntu sukhena vai

kṛtaścaivātra vāgvādastaṃ jitvā vijayena ca //
praviśaṃtu tathā sarve nānyathā karhicitpriye

asminnevāsmadīye vai sarve saṃbhartsitā vayam //
tasmāddevi tvayā bhadre na tyājyo māna uttamaḥ

śivo markaṭavatte'dya vartate sarvadā sati //
kiṃ kariṣyatyahaṃkāramānukūlyaṃ bhaviṣyati

brahmovāca//
aho kṣaṇaṃ sthitā tatra śivecchāvaśatassatī

manasyuvāca sā bhūtvā māninī pārvatī tadā

śivovāca//
aho kṣaṇaṃ sthito naiva haṭhātkāraḥ kathaṃ kṛtaḥ //
kathaṃ caivātra karttavyaṃ vinayenātha vā punaḥ

bhaviṣyati bhavatyeva kṛtaṃ naivānyathā punaḥ //
ityuktvā tu sakhī tatra preṣitā priyayā tadā

samāgatyā'bravītsā ca priyayā kathitaṃ hi yat//
tamācaṣṭa gaṇeśaṃ taṃ girijātanayaṃ tadā

sakhyuvāca //
samyakkṛtaṃ tvayā bhadra balātte praviśaṃtu na //
bhavadagre gaṇā hyete kiṃ jayaṃtu bhavādṛśam

kṛtaṃ cedvākṛtaṃ caiva karttavyaṃ kriyatāṃ tvayā//
jito yastu punarvāpi na vairamatha vā dhruvam

brahmovāca //
iti śrutvā vacastasyā mātuścaiva gaṇeśvaraḥ //
ānandaṃ paramaṃ prāpa balaṃ bhūri mahonnatim

baddhakakṣastathoṣṇīṣaṃ baddhvā jaṃghoru saṃspṛśan //
uvāca tāngaṇān sarvānnirbhayaṃ vacanaṃ mudā

gaṇeśa uvāca //
ahaṃ ca girijāsūnuryūyaṃ śivagaṇāstathā //
ubhaye samatāṃ prāptāḥ kartavyaṃ kriyatāṃ punaḥ

bhavaṃto dvārapālāśca dvārapohaṃ kathaṃ na hi //
bhavaṃtaśca sthitāstatrā'haṃ sthitotreti niścitam

bhavadbhiśca sthitaṃ hyatra yadā bhavati niścitam //
tadā bhavadbhiḥ karttavyaṃ śivājñāparipālanam

idānīṃ tu mayā cātra śivājñāparipālanam //
satyaṃ ca kriyate vīrā nirṇītaṃ me yathocitam

tasmācchivagaṇāssarve vacanaṃ śṛṇutādarāt //
haṭhādvā vinayādvā na gaṃtavyaṃ mandire punaḥ

// brahmovāca //
ityuktāste gaṇenaiva sarve te lajjitā gaṇāḥ//
yayuśśivāṃtikaṃ taṃ vai namaskṛtya puraḥ sthitāḥ

sthitvā nyavedayansarve vṛttāṃtaṃ ca tadadbhutam //
karau baddhvā nataskaṃdhāśśivaṃ stutvā puraḥ sthitāḥ

tatsarvaṃ tu tadā śrutvā vṛttaṃ tatsvagaṇoditam//
laukikīṃ vṛttimāśritya śaṃkaro vākyamabravīt

śaṃkara uvāca // śrūyatāṃ ca gaṇāssarve yuddhaṃ yogyaṃ bhavennahi //
yūyaṃ cātrāsmadīyā vai sa ca gaurīgaṇastathā

vinayaḥ kriyate cedvai vaśyaśśaṃbhuḥ striyā sadā //
iti khyātirbhavelloke garhitā me gaṇā dhuvam

kṛte caivātra kartavyamiti nītirgarīyasī //
ekākī sa gaṇo bālaḥ kiṃ kariṣyati vikramam

bhavaṃtaśca gaṇā loke yuddhe cāti viśāradāḥ //
madīyāśca kathaṃ yuddhaṃ hitvā yāsyatha lāghavam

striyā grahaḥ kathaṃ kāryo patyuragre viśeṣataḥ //
kṛtvā sā girijā tasya nūnaṃ phalamavāpsyati

tasmātsarve ca madvīrāḥ śṛṇutādarato vacaḥ //
karttavyaṃ sarvathā yuddhaṃ bhāvi yattadbhavatviti

brahmovāca //
ityuktvā śaṃkaro brahman nānālīlāviśāradaḥ //
virarāma muniśreṣṭha darśayam̐llaukikīṃ gatim

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe gaṇavivādavarṇanaṃ nāma caturdaśo'dhyāyaḥ