Shiva Purana · Chapter 2.3.7

// brahmovāca //
tato menā purassā vai sutā bhūtvā mahādyutiḥ //
cakāra rodanaṃ tatra laukikīṃ gatimāśritā

ariṣṭaśayyāṃ paritassadvisārisutejasā //
niśīthadīpā vihatatviṣa āsannaraṃ mune

śrutvā tadrodanaṃ ramyaṃ gṛhasthāssarvayoṣitaḥ //
jahṛṣussambhramāttatrāgatāḥ prītipurassarāḥ

tacchuddhāntacaraḥ śīghraṃ śaśaṃsa bhūbhṛte tadā //
pārvatījanma sukhadaṃ devakāryakaraṃ śubham

tacchuddhāntacarāyāśu putrījanma suśaṃsate //
sitātapatraṃ nādeyamāsīttasya mahībhṛtaḥ

gatastatra giriḥ prītyā sapurohitasadvijaḥ //
dadarśa tanayāṃ tāntu śobhamānāṃ subhāsasā

nīlotpaladala śyāmāṃ sudyutiṃ sumanoramām //
dṛṣṭvā ca tādṛśīṃ kanyāṃ mumodāti girīśvaraḥ

sarve ca mumudustatra paurāśca puruṣāḥ striyaḥ //
tadotsavo mahānāsīnnedurvādyāni bhūriśaḥ

babhūva maṃgalaṃ gānaṃ nanṛturvārayoṣitaḥ //
dānaṃ dadau dvijātibhyo jātakarmavidhāya ca

atha dvāraṃ samāgatya cakāra sumahotsavam//
himācalaḥ prasannātmā bhikṣubhyo draviṇandadau

atho muhūrtte sumate himavānmunibhiḥ saha//
nāmā'karotsutāyāstu kālītyādi sukhapradam

dānaṃ dadau tadā prītyā dvijebhyo bahu sādaram //
utsavaṃ kārayāmāsa vividhaṃ gānapūrvvakam

itthaṃ kṛtvotsavaṃ bhūri kālīṃ paśyanmuhurmuhuḥ //
lebhe mudaṃ sapatnīko bahuputro'pi bhūdharaḥ

tatra sā vavṛdhe devī girirājagṛhe śivā //
gaṃgeva varṣāsamaye śaradīvātha candrikā

evaṃ sā kālikā devī cārvaṅgī cārudarśanā//
dadhre cānudinaṃ ramyāṃ candrabimbakalāmiva

kulocitena nāmnā tāṃ pārvatītyājuhāvahā/
bandhupriyāṃ bandhujanaḥ sauśīlyaguṇasaṃyutām

umeti mātrā tapase niṣiddhā kālikā ca sā //
paścādumākhyāṃ sumukhī jagāma bhuvane mune

dṛṣṭiḥ putravato'pyadrestasmiṃstṛptiṃ jagāma na //
apatye pārvatītyākhye sarvasaubhāgya saṃyute

madhoranantapuṣpasya cūte hi bhramarāvaliḥ //
viśeṣasaṃgā bhavati sahakāre munīśvara

pūto vibhūṣitaścāpi sa babhūva tayā giriḥ //
saṃskāravatyeva girā manīṣīva himālayaḥ

prabhāmahatyā śikhayeva dīpo bhuvanasya ca //
trimārgayeva sanmārgastadvadgirijayā giriḥ

kandukaiḥ kṛtrimaiḥ putraissakhīmadhyagatā ca sā //
gaṃgāsaikatavedībhirbālye reme muhurmuhuḥ

atha devī śivā sā copadeśasamaye mune //
papāṭha vidyātsuprītyā yatacittā ca sadguroḥ

prāktanā janmavidyāstāṃ śaradīva prapedire //
haṃsālissvarṇadī naktamātmabhāso mahauṣadhim

itthaṃ suvarṇitā līlā śivāyāḥ kācideva hi //
anyalīlāmpravakṣye'haṃ śṛṇu tvaṃ premato mune

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatībālyalīlāvarṇanaṃnāma saptamo 'dhyāyaḥ