શિવ પુરાણ · અધ્યાય 2.3.7

॥ બ્રહ્મોવાચ ॥
તતો મેના પુરસ્સા વૈ સુતા ભૂત્વા મહાદ્યુતિઃ ॥
ચકાર રોદનં તત્ર લૌકિકીં ગતિમાશ્રિતા

અરિષ્ટશય્યાં પરિતસ્સદ્વિસારિસુતેજસા ॥
નિશીથદીપા વિહતત્વિષ આસન્નરં મુને

શ્રુત્વા તદ્રોદનં રમ્યં ગૃહસ્થાસ્સર્વયોષિતઃ ॥
જહૃષુસ્સમ્ભ્રમાત્તત્રાગતાઃ પ્રીતિપુરસ્સરાઃ

તચ્છુદ્ધાન્તચરઃ શીઘ્રં શશંસ ભૂભૃતે તદા ॥
પાર્વતીજન્મ સુખદં દેવકાર્યકરં શુભમ્

તચ્છુદ્ધાન્તચરાયાશુ પુત્રીજન્મ સુશંસતે ॥
સિતાતપત્રં નાદેયમાસીત્તસ્ય મહીભૃતઃ

ગતસ્તત્ર ગિરિઃ પ્રીત્યા સપુરોહિતસદ્વિજઃ ॥
દદર્શ તનયાં તાન્તુ શોભમાનાં સુભાસસા

નીલોત્પલદલ શ્યામાં સુદ્યુતિં સુમનોરમામ્ ॥
દૃષ્ટ્વા ચ તાદૃશીં કન્યાં મુમોદાતિ ગિરીશ્વરઃ

સર્વે ચ મુમુદુસ્તત્ર પૌરાશ્ચ પુરુષાઃ સ્ત્રિયઃ ॥
તદોત્સવો મહાનાસીન્નેદુર્વાદ્યાનિ ભૂરિશઃ

બભૂવ મંગલં ગાનં નનૃતુર્વારયોષિતઃ ॥
દાનં દદૌ દ્વિજાતિભ્યો જાતકર્મવિધાય ચ

અથ દ્વારં સમાગત્ય ચકાર સુમહોત્સવમ્॥
હિમાચલઃ પ્રસન્નાત્મા ભિક્ષુભ્યો દ્રવિણન્દદૌ

અથો મુહૂર્ત્તે સુમતે હિમવાન્મુનિભિઃ સહ॥
નામાઽકરોત્સુતાયાસ્તુ કાલીત્યાદિ સુખપ્રદમ્

દાનં દદૌ તદા પ્રીત્યા દ્વિજેભ્યો બહુ સાદરમ્ ॥
ઉત્સવં કારયામાસ વિવિધં ગાનપૂર્વ્વકમ્

ઇત્થં કૃત્વોત્સવં ભૂરિ કાલીં પશ્યન્મુહુર્મુહુઃ ॥
લેભે મુદં સપત્નીકો બહુપુત્રોઽપિ ભૂધરઃ

તત્ર સા વવૃધે દેવી ગિરિરાજગૃહે શિવા ॥
ગંગેવ વર્ષાસમયે શરદીવાથ ચન્દ્રિકા

એવં સા કાલિકા દેવી ચાર્વઙ્ગી ચારુદર્શના॥
દધ્રે ચાનુદિનં રમ્યાં ચન્દ્રબિમ્બકલામિવ

કુલોચિતેન નામ્ના તાં પાર્વતીત્યાજુહાવહા।
બન્ધુપ્રિયાં બન્ધુજનઃ સૌશીલ્યગુણસંયુતામ્

ઉમેતિ માત્રા તપસે નિષિદ્ધા કાલિકા ચ સા ॥
પશ્ચાદુમાખ્યાં સુમુખી જગામ ભુવને મુને

દૃષ્ટિઃ પુત્રવતોઽપ્યદ્રેસ્તસ્મિંસ્તૃપ્તિં જગામ ન ॥
અપત્યે પાર્વતીત્યાખ્યે સર્વસૌભાગ્ય સંયુતે

મધોરનન્તપુષ્પસ્ય ચૂતે હિ ભ્રમરાવલિઃ ॥
વિશેષસંગા ભવતિ સહકારે મુનીશ્વર

પૂતો વિભૂષિતશ્ચાપિ સ બભૂવ તયા ગિરિઃ ॥
સંસ્કારવત્યેવ ગિરા મનીષીવ હિમાલયઃ

પ્રભામહત્યા શિખયેવ દીપો ભુવનસ્ય ચ ॥
ત્રિમાર્ગયેવ સન્માર્ગસ્તદ્વદ્ગિરિજયા ગિરિઃ

કન્દુકૈઃ કૃત્રિમૈઃ પુત્રૈસ્સખીમધ્યગતા ચ સા ॥
ગંગાસૈકતવેદીભિર્બાલ્યે રેમે મુહુર્મુહુઃ

અથ દેવી શિવા સા ચોપદેશસમયે મુને ॥
પપાઠ વિદ્યાત્સુપ્રીત્યા યતચિત્તા ચ સદ્ગુરોઃ

પ્રાક્તના જન્મવિદ્યાસ્તાં શરદીવ પ્રપેદિરે ॥
હંસાલિસ્સ્વર્ણદી નક્તમાત્મભાસો મહૌષધિમ્

ઇત્થં સુવર્ણિતા લીલા શિવાયાઃ કાચિદેવ હિ ॥
અન્યલીલામ્પ્રવક્ષ્યેઽહં શૃણુ ત્વં પ્રેમતો મુને

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં તૃતીયે પાર્વતીખણ્ડે પાર્વતીબાલ્યલીલાવર્ણનંનામ સપ્તમો ઽધ્યાયઃ