Shiva Purana · Chapter 2.3.53

brahmovāca //
atha viṣṇvādayo devā munayaśca tapodhanāḥ //
kṛtvāvaśyakakarmāṇi yātrāṃ santenire gireḥ

tato girivaraḥ snātvā sveṣṭaṃ sampūjya yatnataḥ //
paurabandhūnsamāhūya janavāsaṃ yayau mudā

tatra prabhumprapūjyātha cakre samprārthanāṃ mudā //
kiyaddināni santiṣṭha madgehe sakalaissaha

vilokanena te śambho kṛtārthohaṃ na saṃśayaḥ //
dhanyaśca yasya madgehe āyāto'si suraissaha

brahmovāca //
ityuktvā bahu śaileśaḥ karau baddhvā praṇamya ca //
prabhunnimantrayāmāsa saha viṣṇusurādibhiḥ

atha te manasā gatvā śiva saṃyutamādarāt //
pratyūcurmunayo devā hṛṣṭā viṣṇusurādibhiḥ

// devā ūcuḥ //
dhanyastvaṃ giriśārdūla tava kīrtirmahīyasī //
tvatsamo na trilokeṣu kopi puṇyatamo janaḥ

yasya dvāri maheśānaḥ parabrahma satāṃ gatiḥ //
samāgatassadāsaiśca kṛpayā bhaktavatsalaḥ

janāvāsotiramyaśca sammāno vividhaḥ kṛtaḥ //
bhojanāni tvapūrvāṇi na varṇyāni girīśvara

citranna khalu tatrāsti yatra devī śivāmbikā //
paripūrṇamaśeṣañca yavaṃ dhanyā yadāgatāḥ

// brahmovāca //
itthamparasparantatra praśaṃsābhavaduttamā //
utsavo vividho jāto vedasādhujayadhvaniḥ

abhūnmaṅgalagānañca nanartāpsarasāṃgaṇaḥ //
nutiñcakrurmāgadhādyā dravyadānamabhūdbahu

tata āmantraya deveśaṃ svagehamagamadgiriḥ //
bhojanotsavamārebhe nānāvidhividhānataḥ

bhojanārthaṃ prabhumprītyānayāmāsa yathocitam //
parivārasametaṃ ca sakutūhalamīśvaram

prakṣālya caraṇau śambhorviṣṇormama varādarāt //
sarveṣāmamarāṇāñca munīnāñca yathārthataḥ

pareṣāñca gatānāñca girīśo maṇḍapāntare //
āsayāmāsa suprītyā tāṃstānbandhubhiranvitaḥ

surasairvividhānnaiśca tarpayāmāsa tāngiriḥ //
bubhujurnikhilāste vai śambhunā viṣṇunā mayā

tadānīmpuranāryaśca gālīdānamvyadhurmudā //
mṛduvāṇyā hasantyaśca paśyantyo yatnataśca tān

te bhuktvācamya vidhivadgirimāmantrya nārada //
svasthānamprayayussarve muditāstṛptimāgatāḥ

itthantṛtīye ghasre'pi mānitāste'bhavanmune //
girīśvareṇa vidhivaddānamānādarādibhiḥ

caturthe divase prāpte caturthīkarma śuddhitaḥ //
babhūva vidhivadyena vinā khaṇḍita eva saḥ

utsavo vividhaścāsītsādhuvādajayadhvaniḥ //
bahudānaṃ sugānañca narttanamvividhantathā

pañcame divase prāpte sarve devā mudānvitāḥ //
vijñaptiñcakrire śailaṃ yātrārthamatipremataḥ

tadākarṇya girīśaścovāca devān kṛtāñjaliḥ //
kiyaddināni tiṣṭhantu kṛpāṅkurvantu māṃ surāḥ

ityuktvā snehatastām̐śca prabhumviṣṇuñca māmparān //
vāsayāmāsa divasān bahūnnityaṃ samādarāt

itthamvyatīyurdivasā bahavo vasatāṃ ca tat //
saptarṣīnpreṣayāmāsurgirīśānte tatassurāḥ

te taṃ sambodhayāmāsurmenāñca samayocitam //
śivatattvamparamprocuḥ praśaṃsanvidhivanmudā

aṅgīkṛtaṃ pareśena tattadbodhanato mune //
yātrārthamagamacchambhuśśaileśaṃ sāmarādikaḥ

yātrāṅkurvati deveśe svaśailaṃ sāmare śive //
uccai ruroda sā menā tamuvāca kṛpānidhim

menovāca //
kṛpānidhe kṛpāṅkṛtvā śivāṃ sampālayiṣyasi //
sahasradoṣaṃ pārvatyā āśutoṣaḥ kṣamiṣyasi

tvatpādāmbujabhaktā ca madvatsā janmajanmani //
svapne jñāne smṛtirnāsti mahādevaṃ prabhumbinā

tvadbhaktiśrutimātreṇa harṣāśrupulakānvitā //
tvannindayā bhavenmaunā mṛtyuṃjaya mṛtā iva

brahmovāca //
ityuktvā menakā tasmai samarpya svasutāntadā //
atyuccai rodanaṅkṛtvā mūrcchāmāpa tayoḥ puraḥ

atha menāmbodhayitvā tāmāmantrya giristathā//
cakāra yātrāndevaiśca mahotsavapurassaram

atha te nirjarāssarve prabhuṇā svagaṇaissaha //
yātrāmpracakrire tūṣṇīṃ girimprati śivaṃ dadhuḥ //

himācalapurībāhyopavane harṣitāssurāḥ//
seśvarāssotsavāstasthuḥ paryaiṣanta śivāgamam

ityuktā śivasadyātrā devaissaha munīśvara//
ākarṇaya śivayātrāṃ virahotsavasaṃyutām

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatī khaṇḍe śivayātrāvarṇanaṃ nāma tripañcāśattamo'dhyāyaḥ