Shiva Purana · Chapter 2.3.52

brahmovāca //
atha śailavarastāta himavānbhāgyasattamaḥ //
prāṅgaṇaṃ racayāmāsa bhojanārthaṃ vicakṣaṇaḥ

mārjanaṃ lepanaṃ samyakkārayāmāsa tasya saḥ //
sa sugandhairalañcakre nānāvastubhirādarāt

atha śailassurānsarvānanyānapi ca seśvarān //
bhojanāyāhvayāmāsa putraiśśailaiḥ parairapi

śailāhvānamathākarṇya sa prabhussācyuto mune //
sarvaissurādibhistatra bhojanāya yayau mudā

giriḥ prabhuṃ ca sarvāṃstānsusatkṛtya yathāvidhi //
mudopaveśayāmāsa satpīṭheṣu gṛhāntare

nānāsubhojyavastūni pariviṣya ca tatpunaḥ //
sāñcalirbhojanāyājñāṃ cakre vijñaptimānataḥ

atha sammānitāstatra devā viṣṇupurogamāḥ //
sadāśivaṃ puraskṛtya bubhujussakalāśca te

tadā sarve hi militā aikapadyena sarvaśaḥ //
paṃktibhūtāśca bubhuju rvihasantaḥ pṛthakpṛthak

nandibhṛṃgivīrabhadravīrabhadragaṇāḥ pṛthak//
bubhujuste mahābhāgāḥ kutūhalasamanvitāḥ

devāssendrā lokapālā nānāśobhāsamanvitāḥ //
bubhujuste mahābhāgā nānāhāsyarasaissaha

sarve ca munayo viprā bhṛgvādyā ṛṣayastathā//
bubhuju prītitassarve pṛthak paṃktigatāstadā

tathā caṇḍīgaṇāssarve bubhujuḥ kṛtabhājanāḥ //
kutūhalaṃ prakurvanto nānāhāsyakarā mudā

evante bhuktavantaścācamya sarve mudānvitāḥ //
viśrāmārthaṃ gatāḥ prītyā viṣṇvādyāssvasvamāśramam

menājñayā striyassādhvya śśivaṃ samprārthya bhaktitaḥ //
gehe nivāsayāmāsurvāsākhye paramotsave

ratnasiṃhāsane śambhurmenādatte manohare //
sannidhāya mudā yukto dadṛśe vāsamandiram

ratnapradīpaśatakairjvaladbhirjvalitaṃ śriyā //
ratnapātraghaṭākīrṇaṃ muktāmaṇivirājitam

ratnadarppaṇaśobhāḍhyaṃ maṇḍitaṃ śvetacāmaraiḥ//
muktāmaṇisumālābhirveṣṭitaṃ paramarddhimat

anūpamammahādivyaṃ vicitraṃ sumanoharam//
cittāhlādakaraṃ nānāracanāracitasthalam

śivadattavarasyaiva prabhāvamatulamparam //
darśayantaṃ samullāsi śivalokābhidhānakam

nānāsugandhasaddravyairvāsitaṃ suprakāśakam //
candanāgurusaṃyuktaṃ puṣpaśayyāsamanvitam

nānācitravicitrāḍhyaṃ nirmitaṃ viśvakarmmaṇā //
ratnendrasāraracitairācitaṃ hārakairvaraiḥ

kutracitsuranirmāṇaṃ vaikuṇṭhaṃ sumanoharam //
kutracicca brahmalokaṃ lokapālapuraṃ kvacit

kailāsaṃ kutracidramyaṃ kutracicchakramandiram //
kutracicchivalokaṃ ca sarvopari virājitam

etādṛśagṛhaṃ sarvadṛṣṭāścaryyaṃ maheśvaraḥ //
praśaṃsan himaśaileśaṃ parituṣṭo babhūva ha

tatrātiramaṇīye ca ratnaparyyaṃka uttame //
aśayiṣṭa mudā yukto līlayā parameśvaraḥ

himācalaśca svabhrātṝnbhojayāmāsa kṛtsnaśaḥ //
sarvānanyāṃśca suprītyā śeṣakṛtyaṃ cakāra ha

evaṃ kurvati śaileśe svapati preṣṭha īśvare //
vyatītā rajanī sarvā prātaḥkālo babhūva ha

atha prabhātakāle ca dhṛtyutsāhaparāyaṇāḥ //
nānāprakāravādyāni vādayāñcakrire janāḥ

sarve surāssamuttasthurviṣṇvādyāssumudānvitāḥ //
sveṣṭaṃ saṃsmṛtya deveśaṃ sajjibhūtāssasaṃbhramāḥ

svavāhanāni sajjāni kailāsaṅgantumutsukāḥ //
kṛtvā sampreṣayāmāsurdharmaṃ śivasamīpataḥ

vāsagehamathāgatya dharmo nārāyaṇājñayā //
uvāca śaṃkaraṃ yogī yogīśaṃ samayocitam

// dharma uvāca //
uttiṣṭhottiṣṭha bhadrante bhava naḥ pramathādhipa //
janāvāsaṃ samāgaccha kṛtārthaṃ kuru tatra tān

// brahmovāca //
iti dharmavacaḥ śrutvā vijahāsa maheśvaraḥ //
dadarśa kṛpayā dṛṣṭyā talpamujjhāñcakāra ha

uvāca vihasan dharma tvamagre gaccha tatra ha//
ahamapyāgamiṣyāmi drutameva na saṃśayaḥ

// brahmovāca //
ityuktaśśaṃkareṇātha janāvāsaṃ jagāma saḥ//
svayaṅgantumanā āsīttatra śambhurapi prabhuḥ//३५/
tajjñātvā strīgaṇassosau tatrāgacchanmahotsavaḥ //
cakre maṃgalagānaṃ hi paśyanśambhupadadvayam

atha śaṃmbhurbhavācārī prātaḥkṛtyaṃ vidhāya ca //
menāmāntrya kudhraṃ ca janāvāsaṃ jagāma saḥ

mahotsavastadā cāsīdvedadhvanirabhūnmune //
vādyāni vādayāmāsurjanāścāturvidhāni ca

śambhurāgatya svasthānaṃ vavande ca munīṃstadā //
hariṃ ca māṃ bhavācārāt vandito'bhūtsurādibhiḥ

jayaśabdo babhūvātha namaśśabdastathaiva ca //
vedadhvaniśca śubhado mahākolāhalo'bhavat

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe varavargabhojanaśivaśayanavarṇanaṃ nāma dvipañcāśattamo'dhyāyaḥ