શિવ પુરાણ · અધ્યાય 2.3.53

બ્રહ્મોવાચ ॥
અથ વિષ્ણ્વાદયો દેવા મુનયશ્ચ તપોધનાઃ ॥
કૃત્વાવશ્યકકર્માણિ યાત્રાં સન્તેનિરે ગિરેઃ

તતો ગિરિવરઃ સ્નાત્વા સ્વેષ્ટં સમ્પૂજ્ય યત્નતઃ ॥
પૌરબન્ધૂન્સમાહૂય જનવાસં યયૌ મુદા

તત્ર પ્રભુમ્પ્રપૂજ્યાથ ચક્રે સમ્પ્રાર્થનાં મુદા ॥
કિયદ્દિનાનિ સન્તિષ્ઠ મદ્ગેહે સકલૈસ્સહ

વિલોકનેન તે શમ્ભો કૃતાર્થોહં ન સંશયઃ ॥
ધન્યશ્ચ યસ્ય મદ્ગેહે આયાતોઽસિ સુરૈસ્સહ

બ્રહ્મોવાચ ॥
ઇત્યુક્ત્વા બહુ શૈલેશઃ કરૌ બદ્ધ્વા પ્રણમ્ય ચ ॥
પ્રભુન્નિમન્ત્રયામાસ સહ વિષ્ણુસુરાદિભિઃ

અથ તે મનસા ગત્વા શિવ સંયુતમાદરાત્ ॥
પ્રત્યૂચુર્મુનયો દેવા હૃષ્ટા વિષ્ણુસુરાદિભિઃ

॥ દેવા ઊચુઃ ॥
ધન્યસ્ત્વં ગિરિશાર્દૂલ તવ કીર્તિર્મહીયસી ॥
ત્વત્સમો ન ત્રિલોકેષુ કોપિ પુણ્યતમો જનઃ

યસ્ય દ્વારિ મહેશાનઃ પરબ્રહ્મ સતાં ગતિઃ ॥
સમાગતસ્સદાસૈશ્ચ કૃપયા ભક્તવત્સલઃ

જનાવાસોતિરમ્યશ્ચ સમ્માનો વિવિધઃ કૃતઃ ॥
ભોજનાનિ ત્વપૂર્વાણિ ન વર્ણ્યાનિ ગિરીશ્વર

ચિત્રન્ન ખલુ તત્રાસ્તિ યત્ર દેવી શિવામ્બિકા ॥
પરિપૂર્ણમશેષઞ્ચ યવં ધન્યા યદાગતાઃ

॥ બ્રહ્મોવાચ ॥
ઇત્થમ્પરસ્પરન્તત્ર પ્રશંસાભવદુત્તમા ॥
ઉત્સવો વિવિધો જાતો વેદસાધુજયધ્વનિઃ

અભૂન્મઙ્ગલગાનઞ્ચ નનર્તાપ્સરસાંગણઃ ॥
નુતિઞ્ચક્રુર્માગધાદ્યા દ્રવ્યદાનમભૂદ્બહુ

તત આમન્ત્રય દેવેશં સ્વગેહમગમદ્ગિરિઃ ॥
ભોજનોત્સવમારેભે નાનાવિધિવિધાનતઃ

ભોજનાર્થં પ્રભુમ્પ્રીત્યાનયામાસ યથોચિતમ્ ॥
પરિવારસમેતં ચ સકુતૂહલમીશ્વરમ્

પ્રક્ષાલ્ય ચરણૌ શમ્ભોર્વિષ્ણોર્મમ વરાદરાત્ ॥
સર્વેષામમરાણાઞ્ચ મુનીનાઞ્ચ યથાર્થતઃ

પરેષાઞ્ચ ગતાનાઞ્ચ ગિરીશો મણ્ડપાન્તરે ॥
આસયામાસ સુપ્રીત્યા તાંસ્તાન્બન્ધુભિરન્વિતઃ

સુરસૈર્વિવિધાન્નૈશ્ચ તર્પયામાસ તાન્ગિરિઃ ॥
બુભુજુર્નિખિલાસ્તે વૈ શમ્ભુના વિષ્ણુના મયા

તદાનીમ્પુરનાર્યશ્ચ ગાલીદાનમ્વ્યધુર્મુદા ॥
મૃદુવાણ્યા હસન્ત્યશ્ચ પશ્યન્ત્યો યત્નતશ્ચ તાન્

તે ભુક્ત્વાચમ્ય વિધિવદ્ગિરિમામન્ત્ર્ય નારદ ॥
સ્વસ્થાનમ્પ્રયયુસ્સર્વે મુદિતાસ્તૃપ્તિમાગતાઃ

ઇત્થન્તૃતીયે ઘસ્રેઽપિ માનિતાસ્તેઽભવન્મુને ॥
ગિરીશ્વરેણ વિધિવદ્દાનમાનાદરાદિભિઃ

ચતુર્થે દિવસે પ્રાપ્તે ચતુર્થીકર્મ શુદ્ધિતઃ ॥
બભૂવ વિધિવદ્યેન વિના ખણ્ડિત એવ સઃ

ઉત્સવો વિવિધશ્ચાસીત્સાધુવાદજયધ્વનિઃ ॥
બહુદાનં સુગાનઞ્ચ નર્ત્તનમ્વિવિધન્તથા

પઞ્ચમે દિવસે પ્રાપ્તે સર્વે દેવા મુદાન્વિતાઃ ॥
વિજ્ઞપ્તિઞ્ચક્રિરે શૈલં યાત્રાર્થમતિપ્રેમતઃ

તદાકર્ણ્ય ગિરીશશ્ચોવાચ દેવાન્ કૃતાઞ્જલિઃ ॥
કિયદ્દિનાનિ તિષ્ઠન્તુ કૃપાઙ્કુર્વન્તુ માં સુરાઃ

ઇત્યુક્ત્વા સ્નેહતસ્તાઁશ્ચ પ્રભુમ્વિષ્ણુઞ્ચ મામ્પરાન્ ॥
વાસયામાસ દિવસાન્ બહૂન્નિત્યં સમાદરાત્

ઇત્થમ્વ્યતીયુર્દિવસા બહવો વસતાં ચ તત્ ॥
સપ્તર્ષીન્પ્રેષયામાસુર્ગિરીશાન્તે તતસ્સુરાઃ

તે તં સમ્બોધયામાસુર્મેનાઞ્ચ સમયોચિતમ્ ॥
શિવતત્ત્વમ્પરમ્પ્રોચુઃ પ્રશંસન્વિધિવન્મુદા

અઙ્ગીકૃતં પરેશેન તત્તદ્બોધનતો મુને ॥
યાત્રાર્થમગમચ્છમ્ભુશ્શૈલેશં સામરાદિકઃ

યાત્રાઙ્કુર્વતિ દેવેશે સ્વશૈલં સામરે શિવે ॥
ઉચ્ચૈ રુરોદ સા મેના તમુવાચ કૃપાનિધિમ્

મેનોવાચ ॥
કૃપાનિધે કૃપાઙ્કૃત્વા શિવાં સમ્પાલયિષ્યસિ ॥
સહસ્રદોષં પાર્વત્યા આશુતોષઃ ક્ષમિષ્યસિ

ત્વત્પાદામ્બુજભક્તા ચ મદ્વત્સા જન્મજન્મનિ ॥
સ્વપ્ને જ્ઞાને સ્મૃતિર્નાસ્તિ મહાદેવં પ્રભુમ્બિના

ત્વદ્ભક્તિશ્રુતિમાત્રેણ હર્ષાશ્રુપુલકાન્વિતા ॥
ત્વન્નિન્દયા ભવેન્મૌના મૃત્યુંજય મૃતા ઇવ

બ્રહ્મોવાચ ॥
ઇત્યુક્ત્વા મેનકા તસ્મૈ સમર્પ્ય સ્વસુતાન્તદા ॥
અત્યુચ્ચૈ રોદનઙ્કૃત્વા મૂર્ચ્છામાપ તયોઃ પુરઃ

અથ મેનામ્બોધયિત્વા તામામન્ત્ર્ય ગિરિસ્તથા॥
ચકાર યાત્રાન્દેવૈશ્ચ મહોત્સવપુરસ્સરમ્

અથ તે નિર્જરાસ્સર્વે પ્રભુણા સ્વગણૈસ્સહ ॥
યાત્રામ્પ્રચક્રિરે તૂષ્ણીં ગિરિમ્પ્રતિ શિવં દધુઃ ॥

હિમાચલપુરીબાહ્યોપવને હર્ષિતાસ્સુરાઃ॥
સેશ્વરાસ્સોત્સવાસ્તસ્થુઃ પર્યૈષન્ત શિવાગમમ્

ઇત્યુક્તા શિવસદ્યાત્રા દેવૈસ્સહ મુનીશ્વર॥
આકર્ણય શિવયાત્રાં વિરહોત્સવસંયુતામ્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં તૃતીયે પાર્વતી ખણ્ડે શિવયાત્રાવર્ણનં નામ ત્રિપઞ્ચાશત્તમોઽધ્યાયઃ