શિવ પુરાણ · અધ્યાય 2.3.52

બ્રહ્મોવાચ ॥
અથ શૈલવરસ્તાત હિમવાન્ભાગ્યસત્તમઃ ॥
પ્રાઙ્ગણં રચયામાસ ભોજનાર્થં વિચક્ષણઃ

માર્જનં લેપનં સમ્યક્કારયામાસ તસ્ય સઃ ॥
સ સુગન્ધૈરલઞ્ચક્રે નાનાવસ્તુભિરાદરાત્

અથ શૈલસ્સુરાન્સર્વાનન્યાનપિ ચ સેશ્વરાન્ ॥
ભોજનાયાહ્વયામાસ પુત્રૈશ્શૈલૈઃ પરૈરપિ

શૈલાહ્વાનમથાકર્ણ્ય સ પ્રભુસ્સાચ્યુતો મુને ॥
સર્વૈસ્સુરાદિભિસ્તત્ર ભોજનાય યયૌ મુદા

ગિરિઃ પ્રભું ચ સર્વાંસ્તાન્સુસત્કૃત્ય યથાવિધિ ॥
મુદોપવેશયામાસ સત્પીઠેષુ ગૃહાન્તરે

નાનાસુભોજ્યવસ્તૂનિ પરિવિષ્ય ચ તત્પુનઃ ॥
સાઞ્ચલિર્ભોજનાયાજ્ઞાં ચક્રે વિજ્ઞપ્તિમાનતઃ

અથ સમ્માનિતાસ્તત્ર દેવા વિષ્ણુપુરોગમાઃ ॥
સદાશિવં પુરસ્કૃત્ય બુભુજુસ્સકલાશ્ચ તે

તદા સર્વે હિ મિલિતા ઐકપદ્યેન સર્વશઃ ॥
પંક્તિભૂતાશ્ચ બુભુજુ ર્વિહસન્તઃ પૃથક્પૃથક્

નન્દિભૃંગિવીરભદ્રવીરભદ્રગણાઃ પૃથક્॥
બુભુજુસ્તે મહાભાગાઃ કુતૂહલસમન્વિતાઃ

દેવાસ્સેન્દ્રા લોકપાલા નાનાશોભાસમન્વિતાઃ ॥
બુભુજુસ્તે મહાભાગા નાનાહાસ્યરસૈસ્સહ

સર્વે ચ મુનયો વિપ્રા ભૃગ્વાદ્યા ઋષયસ્તથા॥
બુભુજુ પ્રીતિતસ્સર્વે પૃથક્ પંક્તિગતાસ્તદા

તથા ચણ્ડીગણાસ્સર્વે બુભુજુઃ કૃતભાજનાઃ ॥
કુતૂહલં પ્રકુર્વન્તો નાનાહાસ્યકરા મુદા

એવન્તે ભુક્તવન્તશ્ચાચમ્ય સર્વે મુદાન્વિતાઃ ॥
વિશ્રામાર્થં ગતાઃ પ્રીત્યા વિષ્ણ્વાદ્યાસ્સ્વસ્વમાશ્રમમ્

મેનાજ્ઞયા સ્ત્રિયસ્સાધ્વ્ય શ્શિવં સમ્પ્રાર્થ્ય ભક્તિતઃ ॥
ગેહે નિવાસયામાસુર્વાસાખ્યે પરમોત્સવે

રત્નસિંહાસને શમ્ભુર્મેનાદત્તે મનોહરે ॥
સન્નિધાય મુદા યુક્તો દદૃશે વાસમન્દિરમ્

રત્નપ્રદીપશતકૈર્જ્વલદ્ભિર્જ્વલિતં શ્રિયા ॥
રત્નપાત્રઘટાકીર્ણં મુક્તામણિવિરાજિતમ્

રત્નદર્પ્પણશોભાઢ્યં મણ્ડિતં શ્વેતચામરૈઃ॥
મુક્તામણિસુમાલાભિર્વેષ્ટિતં પરમર્દ્ધિમત્

અનૂપમમ્મહાદિવ્યં વિચિત્રં સુમનોહરમ્॥
ચિત્તાહ્લાદકરં નાનારચનારચિતસ્થલમ્

શિવદત્તવરસ્યૈવ પ્રભાવમતુલમ્પરમ્ ॥
દર્શયન્તં સમુલ્લાસિ શિવલોકાભિધાનકમ્

નાનાસુગન્ધસદ્દ્રવ્યૈર્વાસિતં સુપ્રકાશકમ્ ॥
ચન્દનાગુરુસંયુક્તં પુષ્પશય્યાસમન્વિતમ્

નાનાચિત્રવિચિત્રાઢ્યં નિર્મિતં વિશ્વકર્મ્મણા ॥
રત્નેન્દ્રસારરચિતૈરાચિતં હારકૈર્વરૈઃ

કુત્રચિત્સુરનિર્માણં વૈકુણ્ઠં સુમનોહરમ્ ॥
કુત્રચિચ્ચ બ્રહ્મલોકં લોકપાલપુરં ક્વચિત્

કૈલાસં કુત્રચિદ્રમ્યં કુત્રચિચ્છક્રમન્દિરમ્ ॥
કુત્રચિચ્છિવલોકં ચ સર્વોપરિ વિરાજિતમ્

એતાદૃશગૃહં સર્વદૃષ્ટાશ્ચર્ય્યં મહેશ્વરઃ ॥
પ્રશંસન્ હિમશૈલેશં પરિતુષ્ટો બભૂવ હ

તત્રાતિરમણીયે ચ રત્નપર્ય્યંક ઉત્તમે ॥
અશયિષ્ટ મુદા યુક્તો લીલયા પરમેશ્વરઃ

હિમાચલશ્ચ સ્વભ્રાતૄન્ભોજયામાસ કૃત્સ્નશઃ ॥
સર્વાનન્યાંશ્ચ સુપ્રીત્યા શેષકૃત્યં ચકાર હ

એવં કુર્વતિ શૈલેશે સ્વપતિ પ્રેષ્ઠ ઈશ્વરે ॥
વ્યતીતા રજની સર્વા પ્રાતઃકાલો બભૂવ હ

અથ પ્રભાતકાલે ચ ધૃત્યુત્સાહપરાયણાઃ ॥
નાનાપ્રકારવાદ્યાનિ વાદયાઞ્ચક્રિરે જનાઃ

સર્વે સુરાસ્સમુત્તસ્થુર્વિષ્ણ્વાદ્યાસ્સુમુદાન્વિતાઃ ॥
સ્વેષ્ટં સંસ્મૃત્ય દેવેશં સજ્જિભૂતાસ્સસંભ્રમાઃ

સ્વવાહનાનિ સજ્જાનિ કૈલાસઙ્ગન્તુમુત્સુકાઃ ॥
કૃત્વા સમ્પ્રેષયામાસુર્ધર્મં શિવસમીપતઃ

વાસગેહમથાગત્ય ધર્મો નારાયણાજ્ઞયા ॥
ઉવાચ શંકરં યોગી યોગીશં સમયોચિતમ્

॥ ધર્મ ઉવાચ ॥
ઉત્તિષ્ઠોત્તિષ્ઠ ભદ્રન્તે ભવ નઃ પ્રમથાધિપ ॥
જનાવાસં સમાગચ્છ કૃતાર્થં કુરુ તત્ર તાન્

॥ બ્રહ્મોવાચ ॥
ઇતિ ધર્મવચઃ શ્રુત્વા વિજહાસ મહેશ્વરઃ ॥
દદર્શ કૃપયા દૃષ્ટ્યા તલ્પમુજ્ઝાઞ્ચકાર હ

ઉવાચ વિહસન્ ધર્મ ત્વમગ્રે ગચ્છ તત્ર હ॥
અહમપ્યાગમિષ્યામિ દ્રુતમેવ ન સંશયઃ

॥ બ્રહ્મોવાચ ॥
ઇત્યુક્તશ્શંકરેણાથ જનાવાસં જગામ સઃ॥
સ્વયઙ્ગન્તુમના આસીત્તત્ર શમ્ભુરપિ પ્રભુઃ॥૩૫।
તજ્જ્ઞાત્વા સ્ત્રીગણસ્સોસૌ તત્રાગચ્છન્મહોત્સવઃ ॥
ચક્રે મંગલગાનં હિ પશ્યન્શમ્ભુપદદ્વયમ્

અથ શંમ્ભુર્ભવાચારી પ્રાતઃકૃત્યં વિધાય ચ ॥
મેનામાન્ત્ર્ય કુધ્રં ચ જનાવાસં જગામ સઃ

મહોત્સવસ્તદા ચાસીદ્વેદધ્વનિરભૂન્મુને ॥
વાદ્યાનિ વાદયામાસુર્જનાશ્ચાતુર્વિધાનિ ચ

શમ્ભુરાગત્ય સ્વસ્થાનં વવન્દે ચ મુનીંસ્તદા ॥
હરિં ચ માં ભવાચારાત્ વન્દિતોઽભૂત્સુરાદિભિઃ

જયશબ્દો બભૂવાથ નમશ્શબ્દસ્તથૈવ ચ ॥
વેદધ્વનિશ્ચ શુભદો મહાકોલાહલોઽભવત્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં તૃતીયે પાર્વતીખણ્ડે વરવર્ગભોજનશિવશયનવર્ણનં નામ દ્વિપઞ્ચાશત્તમોઽધ્યાયઃ