Shiva Purana · Chapter 2.3.49

// brahmovāca //
atho mamājñayā vipraissaṃsthāpyānalamīśvaraḥ //
homaṃ cakāra tatraivamaṅke saṃsthāpya pārvatīm

ṛgyajussāmamantraiścāhutiṃ vahnau dadau śivaḥ //
lājāñjaliṃ dadau kālībhrātā mainākasaṃjñakaḥ

atha kālī śivaścobhau cakraturvidhivanmudā//
vahnipradakṣiṇāṃ tāta lokācāraṃ vidhāya ca

tatrādbhutamalañcakre caritaṃ girijāpatiḥ //
tadeva śṛṇu devarṣe tavasnehādbravīmyaham

tasminnavasare cāhaṃ śivamāyāvimohitaḥ //
apaśyañcaraṇe devyā nakhenduñca manoharam

darśanāttasya ca tadā'bhūvaṃ devamune hyaham //
madanena samāviṣṭo'tīva kṣubhitamānasaḥ

muhurmuhurapaśyaṃ vai tadaṃgaṃ smaramohitaḥ //
tatastaddarśanātsadyo vīryaṃ me prācyutadbhuvi

retasā kṣaratā tena lajjitohaṃ pitāmahaḥ //
mune vyamarda tacchinnaṃ caraṇābhyāṃ hi gopayan

tajjñātvā ca mahādevaścukopātīva nārada //
hantumaicchattadā śīghraṃ vāṃ vidhiṃ kāmamohitam

hāhākāro mahānāsīttatra sarvatra nārada //
janāśca kampire sarvve bhaya māyāti viśvabhṛt

tatastaṃntuṣṭuvuśśambhuṃ viṣṇvādyā nirjarā mune //
sakopamprajvalantantantejasā hantumudyatam

devā ūcuḥ //
devadeva jagadvyāpinparameśa sadāśiva //
jagadīśa jagannātha samprasīda jaganmaya

sarveṣāmapi bhāvānāntvamātmā heturīśvaraḥ //
nirvikāro'vyayo nityo nirvikalpo'kṣaraḥ paraḥ

ādyantāvasya yanmadhyamidamanyadahambahiḥ //
yato'vyayaḥ sanaitāni tatsatyambrahma cidbhavān / १४ //
tavaiva caraṇāmbhojammuktikāmā dṛḍhavratāḥ //
visṛjyobhayatassaṃgaṃ munayassamupāsate

tvambrahma pūrṇamamṛtaṃ viśokaṃ nirguṇamparam //
ānaṃdamātramavyagramavikāramanātmakam

viśvasya heturudayasthitisaṃyamanasya hi //
tadapekṣatayātmeśo'napekṣassarvadā vibhuḥ

ekastvameva sadasadvayamadvayameva ca //
svarṇaṃ kṛtākṛtamiva vastubhedo na caiva hi

ajñānatastvayi janairvikalpo vidito yataḥ //
tasmādbhramapratīkāro nirupādherna hi svataḥ

dhanyā vayaṃ maheśāna tava darśanamātrataḥ //
dṛḍhabhaktajanānandapradaśśambho dayāṃ kuru

tvamādistvamanādiśca prakṛtestvaṃ paraḥ pumān //
viśveśvaro jagannātho nirvikāraḥ parātparaḥ

yo'yaṃ brahmāsti' rajasā viśvamūrtiḥ pitāmahaḥ //
tvatprasādātprabho viṣṇussattvena puruṣottamaḥ

kālāgnirudrastamasā paramātmā guṇaḥ paraḥ //
sadā śivo maheśānassarvavyāpī maheśvaraḥ

vyaktaṃ mahacca bhūtādistanmātrāṇīndriyāṇi ca//
tvayaivādhiṣṭhitānyeva viśvamūrte maheśvara

mahādeva pareśāna karuṇākara śaṃkara /
prasīda devadeveśa prasīda puruṣottama

vāsāṃsi sāgarāssapta diśaścaiva mahābhujāḥ //
dyaurmūrddhā te vibhornābhiḥ khaṃ vāyurnāsikā tataḥ

cakṣūṃṣyagnī ravissomaḥ keśā meghāstava prabho //
nakṣatratārakādyāśca grahāścaiva vibhūṣaṇam

kathaṃ stoṣyāmi deveśa tvāṃ vibho parameśvara //
vācāmagocaro'si tvaṃ manasā cāpi śaṃkara

pañcāsyāya ca rudrāya pañcāśatkoṭimūrtaye //
tryadhipāya variṣṭhāya vidyātattvāya te namaḥ

anideṃśyāya nityāya vidyujjvālāya rūpiṇe //
agnivarṇāya devāya śaṃkarāya namonamaḥ

vidyutkoṭipratīkāśamaṣṭakoṇaṃ suśobhanam //
rūpamāsthāya loke'sminsaṃsthitāya namo namaḥ

brahmovāca //
ityākarṇya vacasteṣāṃ prasannaḥ parameśvaraḥ //
brahmaṇo me dadau śīghramabhayaṃ bhaktavatsalaḥ

atha sarve surāstatra viṣṇvādyā munayastathā //
abhavansusmitāstāta cakruśca paramotsavam

mama tadretasā tāta marditena muhurmuhuḥ //
abhavankaṇakāstatra bhūriśaḥ paramojjvalāḥ

ṛṣayo bahavo jātā vālakhilyāssahasraśaḥ //
kaṇakaistaiśca vīryasya prajvaladbhiḥ svatejasā

atha te hyṛṣayassarve upatasthustadā mune //
mamāntikaṃ paraprītyā tāta tāteti cābruvan

īśvarecchāprayuktena proktāste nāradena hi //
vālakhilyāstu te tatra kopayuktena cetasā

// nārada uvāca //
gacchadhvaṃ saṃgatā yūyaṃ parvataṃ gandhamādanam //
na sthātavyambhavadbhiśca na hi vo'tra prayojanam

tatra taptvā tapaścāti bhavitāro munīśvarāḥ //
sūryyaśiṣyāśśivasyaivājñayā me kathitantvidam

// brahmovāca //
ityuktāste tadā sarve bālakhilyāśca parvatam //
satvaramprayayurnatvā śaṃkaraṃ gandhamādanam

viṣṇvādibhistadābhūvaṃ śvāsitohaṃ munīśvara //
nirbhayaḥ parameśānapreritaistairmahātmabhiḥ

astavañcāpi sarveśaṃ śaṃkarambhaktavatsalam //
sarvakāryakaraṃ jñātvā duṣṭagarvāpahārakam

devadeva mahādeva karuṇāsāgara prabho //
tvameva kartā sarvasya bhartā harttā ca sarvathā //४३/
tvadicchayā hi sakalaṃ sthitaṃ hi sacarācaram//
tantyāṃ yathā balīvardā mayā jñātaṃ viśeṣataḥ

ityevamuktvā sohaṃ vai praṇāmaṃ ca kṛtāñjaliḥ //
anye'pi tuṣṭuvussarve viṣṇvādyāstaṃ maheśvaram

athākarṇya nutiṃ śuddhāṃ mama dīnatayā tadā //
viṣṇvādīnāñca sarveṣāṃ prasanno'bhūnmaheśvaraḥ

dadau sotivaraṃ mahyamabhayaṃ prītamānasaḥ //
sarve sukhamatīvāpuratyamodamahaṃ mune

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe vidhimohavarṇanaṃ nāma navacatvāriṃśo'dhyāyaḥ