Shiva Purana · Chapter 2.3.50

// brahmovāca//
tataścāhaṃ munigaṇaiśśeṣakṛtyaṃ śivājñayā //
akārṣaṃ nārada prītyā śivāśivavivāhataḥ

tayośśiro'bhiṣekaśca babhūvādaratastataḥ//
dhruvasyadarśanaṃ viprāḥ kārayāmāsurādarāta

hṛdayālambhanaṃ karma babhūva tadanantaram //
svastipāṭhaśca viprendra mahotsavapurassaraḥ

śivāśirasi sindūraṃ dadau śambhurdvijājñayā //
tadānīṃ girijābhikhyādbhutāvarṇyā babhūva ha

tato viprājñayā tau dvāvekāsanasamāsthitau //
lebhāte paramāṃ śobhāṃ bhaktacitta mudāvahām

tataḥ svasthānamāgatya saṃsravaprāśanaṃ mudā //
cakratustau nideśānme'dbhutalīlākarau mune

itthaṃ nivṛtte vidhivadyājñe vaivāhike śivaḥ //
brahmaṇe pūrṇapātraṃ me dadau lokakṛte prabhuḥ

godānaṃ vidhivacchambhurācāryāya dadau tataḥ //
mahādānāni ca prītyā yāni maṅgaladāni vai

tataśśatasuvarṇaṃ ca viprebhyassa dadau pṛthak//
bahubhyo ratnakoṭīśca nānādravyāṇyanekaśaḥ

tadānīmamarāssarve pare jīvāścarācarāḥ//
mumuduścetasātīva jayadhvaniḥ

maṅgaladhvanigānaśca babhūva bahu sarvataḥ //
vādyadhvanirabhūdramyo sarvānandapravarddhanaḥ

harirmayātha devāśca munayaścāpare'khilāḥ //
girimāmantrya suprītyā svasthānamprayayurdrutam

tadānīṃ śailanagare striyaśca muditā varam //
śivāśivau samānīya yayuḥ kuha varālayam

laukikācāramājahrustāḥ striyastatra cādṛtāḥ //
mahotsāho babhūvātha sarvataḥ pramudāvahaḥ

atha tāstau samānīya dampatī janaśaṃkarau//
vāsālayammahādivyaṃ bhavācāraṃ vyadhurmudā

atho samīpamāgatya śailendranagarastriyaḥ //
nirvṛtya maṅgalaṃ karma prāpayandampatī gṛham

kṛtvā jayadhvaniṃ cakrurgranthinirmocanādikam //
sasmitāssakaṭākṣāśca pulakāñcitavigrahāḥ

vāsagehaṃ sampraviśya mumuhuḥ kāminīvarāḥ //
prasaṃśantyassvabhāgyāni paśyantaḥ parameśvaram

mahāsurūpaveṣaśca sarva lāvaṇyasaṃyutam //
navīnayauvanasthañca kāminīcittamohanam

īṣaddhāsyaprasannāsyaṃ sakaṭākṣaṃ susundaram //
susūkṣmavāso bibhrāṇaṃ nānāratna vibhūṣitam

tadānīndivyanāryaśca ṣoḍaśāraṃ samāyayuḥ //
tau dampatī ca saṃdraṣṭuṃ mahādarapurassaram

sarasvatī ca lakṣmīśca sāvitrī jāhnavī tathā //
aditiśca śacī caiva lopāmudrāpyarundhatī

ahalyā tulasī svāhā rohiṇī ca vasundharā //
śatarūpā ca saṃjñā ca ratiretāssurastriyaḥ

devakanyā nāgakanyā munikanyā manoharāḥ //
tatra yā yāḥ sthitāstāsāṃ saṅkhyāṃ kartuṃ ca kaḥ kṣamaḥ

tābhī ratnāsane datte tatrovāsa śivo mudā //
tamūcuḥ kramato devyassuhāsa madhuraṃ vacaḥ

sarasvatyuvāca //
prāptā satī mahādevādhunā prāṇādhikā mudā //
dṛṣṭvā priyāsyañcandrābhaṃ santāpantyaja kāmuka

kālaṃ gamaya kāleśa satīsaṃśleṣapūrvakam //
viśleṣaste na bhavitā sarvakālaṃ mamāśritā

lakṣmīruvāca //
lajjāṃ vihāya deveśa satīṃ kṛtvā svavakṣasi //
tiṣṭha tāmprati kā lajjā prāṇā yānti yayā vinā

sāvitryuvāca //
bhojayitvā satī śambho śīghraṃ tvaṃ bhuṃkṣva mā khida //
tadācamya sakarpūrantāṃbūlaṃ dehi sādaram

jāhnavyuvāca //
svarṇakāṃtikarāṃ dhṛtvā keśānmārjaya yoṣitaḥ //
kāminyāssvāmisaubhāgyasukhaṃ nātaḥ paraṃ bhavet

aditiruvāca //
bhojanānte śivaḥ śambhuṃ mukhaṃ śuddhyarthamādarāt //
jalaṃ dehi mahāprītyā dampatiprema durlabham

śacyuvāca //
kṛtvā vilāpaṃ yaddhetoḥ śivāṃ kṛtvā ca vakṣasi //
yo babhrāmāniśaṃ mohāt kā lajjā te priyāmprati

lopāmudrovāca //
vyavahāro'sti ca strīṇāṃ bhuktvā vāsagṛhe śiva //
dattvā śivāyai tāmbūlaṃ śayanaṃ kartumarhasi

arundhatyuvāca //
mayā dattāṃ satīmenāṃ tubhyandātumanīpsitām//
vividhaṃ bodhayitvemāṃ suratiṃ kartumarhasi

ahalyovāca //
vṛddhāvasthāmparityajya hyatīva taruṇo bhava//
yena menānumanyeta tvāṃ sutārpitamānasā

tulasyuvāca //
satī tvayā parityaktā kāmo dagdhaḥ purā kṛtaḥ //
kathantadā vasiṣṭhaśca prabho prasthāpito'dhunā

svāhovāca //
sthiro bhava mahādeva strīṇāṃ vacasi sāmpratam //
vivāhe vyavahāro'sti purandhrīṇāṃ pragalbhatā

rohiṇyuvāca //
kāmampūraya pārvatyāḥ kāmaśāstraviśārada //
kuru pāraṃ svayaṃ kāmī kāminīkāmasāgaram

// vasundharovāca //
jānāsi bhāvaṃ bhāvajña kāmārtānāṃ ca yoṣitām//
na ca svaṃ svāminaṃ śambho īśvaraṃ pāti santatam/३९
śatarūpovāca //
bhogaṃ divyaṃ vinā bhuktvā na hi tuṣyetkṣudhāturaḥ //
yena tuṣṭirbhavecchaṃbho tatkartumucitaṃ striyāḥ

// saṃjñovāca //
tūrṇaṃ prasthāpaya prītyā pārvatyā saha śaṅkaram //
ratnapradīpantāmbūlaṃ talpaṃ nirmāya nirjane

// brahmovāca //
strīṇāntadvacanaṃ śrutvā tā uvāca śivaḥ svayam //
nirvikāraśca bhagavānyogīndrāṇāṃ gurorguruḥ

śaṃkara uvāca //
devyo na brūta vacanamevaṃbhūtaṃ mamāntikam //
jagatāṃ mātaraḥ sādhvyaḥ putre capalatā katham

brahmovāca //
śaṅkarasya vacaḥ śrutvā lajjitāssurayoṣitaḥ //
babhūvuḥ sambhramāttūṣṇīṃ citraputtalikā yathā

bhuktvā miṣṭānnamācamya maheśo hṛṣṭamānasaḥ //
sakarpūraṃ ca tāṃbūlaṃ bubhuje bhārya yā saha

iti śrīśivamahāpurāṇe dvitīyāyāṃ rudrasaṃhitāyāṃ tṛtīya pārvatīkhaṇḍe parihāsavarṇanaṃnāma pañcāśattamo'dhyāyaḥ