Shiva Purana · Chapter 2.3.48

//brahmovāca //
etasminnaṃtare tatra gargācāryyapraṇoditaḥ //
himavānmenayā sārddhaṃ kanyā dātuṃ pracakrame

haimaṃ kalaśamādāya menā cārddhāṃgamāśritā //
himādreśca mahābhāgā vastrābharaṇabhūṣitā

pādyādibhistataḥ śailaḥ prahṛṣṭaḥ svapurohitaḥ //
taṃ vaṃraṃ varayāmāsa vastracaṃdanabhūṣaṇaiḥ

tato himādriṇā proktā dvijāstithyādikīrtane//
prayogo bhaṇyatāṃ tāvadasminsamaya āgate

tatheti coktvā te sarve kālajñā dvijasattamāḥ //
tithyādikīrtanaṃ cakruḥ prītyā paramanirvṛtāḥ

tato himācalaḥ prītyā śambhunā prerito hṛdā //
sūtī kṛtaḥ pareśena vihasañśambhumabravīt

svagotraṃ kathyatāṃ śambho pravaraśca kulaṃ tathā//
nāma vedaṃ tathā śākhāṃ mā kārṣītsamayātyayam

brahmovāca //
ityākarṇya vacastasya himādreśśaṅkarastadā //
sumukhāvimukhaḥ sadyo'pyaśocyaḥ śocyatāṃ gataḥ

evaṃvidhassuravarairmunibhistadānīṃ gandharvayakṣagaṇasiddhagaṇaistathaiva//
dṛṣṭo niruttaramukho bhagavānmaheśo'kārṣīstu hāsyamatha tatra sa nāradatvam

vīṇāmavādayastvaṃ hi brahmavijño'tha nārada//
śivena preritastatra manasā śambhumānasaḥ

tadā nivārito dhīmānparvatendreṇa vai haṭhāt //
viṣṇunā ca mayā devairmunibhiścākhilaistathā

na nivṛtto'bhavastvaṃ hi sa yadā śaṅkarecchayā //
iti prokto'driṇā tarhi vīṇāṃ mā vādayādhunā

suniṣiddho haṭhāttena devarṣe tvaṃ yadā budha //
pratyavoco girīśaṃ taṃ susaṃsmṛtya maheśvaram

nārada uvāca //
tvaṃ hi mūḍhatvamāpanno na jānāsi ca kiñcana //
vācye maheśaviṣaye'tīvāsi tvaṃ bahirmukhaḥ

tvayā pṛṣṭho harassākṣātsvagotrakathanaṃ prati //
samaye'smim̐stadatyantamupahāsakaraṃ vacaḥ

asya gotraṃ kulaṃ nāma naiva jānanti parvata //
viṣṇubrahmādayo'pīha pareṣāṃ kā kathā smṛtā

yasyaikadivase śaila brahmakoṭirlayaṃ gatā //
sa eva śaṅkarastedya dṛṣṭaḥ kālītapobalāta

arūpo'yaṃ parabrahma nirguṇaḥ prakṛteḥ paraḥ //
nirākāro nirvikāro māyādhīśaḥ parātparaḥ

agotrakulanāmā hi svatantro bhaktavatsalaḥ //
tadicchayā hi saguṇassutanurbahunāmabhṛt

sugotrī gotrahīnaśca kulahīnaḥ kulīnakaḥ //
pārvatītapasā so'dya jāmātā te na saṃśayaḥ

līlāvihāriṇā tena mohitaṃ ca carācaram //
no jānāti śivaṃ ko'pi prājño'pi girisattama

liṃgākṛtermaheśasya kena dṛṣṭaṃ na mastakam//
viṣṇurgatvā hi pātālaṃ tadenaṃ nāpavismitaḥ

kiṃbahūktyā nagaśreṣṭha śivamāyā duratyayā//
tadadhīnāstrayo lokā haribrahmādayopi ca

tasmāttvayā śivā tāta suvicārya prayatnataḥ //
na kartavyo vimarśo'tra tvevaṃvidhavare manāk

brahmovāca//
ityuktvā tvaṃ mune jñānī śivecchākāryakārakaḥ //
pratyavocaḥ punastaṃ vai śailedraṃ harṣayangirā

nārada uvāca //
śṛṇu tāta mahāśaila śivājanaka madvacaḥ //
tacchrutvā tanayāṃ devīṃ dehi tvaṃ śaṃkarāya hi

saguṇasya maheśasya līlayā rūpa dhāriṇaḥ //
gotraṃ kulaṃ vijānīhi nādameva hi kevalam

śivo nādamayaḥ sattyaṃ nādaśśivamayastathā //
ubhayorantaraṃ nāsti nādasya ca śivasya ca

sṛṣṭau prathamajatvāddhi līlāsaguṇarūpiṇaḥ //
śivānnādasya śailendra sarvotkṛṣṭastatassa hi

ato hi vāditā vīṇā preritena mayādya vai //
sarveśvareṇa manasā śaṅkareṇa himālaya

brahmovāca //
etacchrutvā tava mune vacastattu giriśvaraḥ //
himādristoṣamāpanno gatavismayamānasaḥ

atha viṣṇuprabhṛtayassurāśca munayastathā //
sādhusādhviti te sarve procurvigatavismayāḥ

maheśvarasya gāṃbhīryaṃ jñātvā sarve vicakṣaṇāḥ //
savismayā mahāmodānvitāḥ procuḥ parasparam

yasyājñayā jagadidaṃ ca viśālameva jātaṃ parātparataro nijabodharūpaḥ //
śarvaḥ svatantragatikṛtparabhāvagamyasso'sau trilokapatiradya ca nassudṛṣṭaḥ

atha te parvataśreṣṭhā mervādyā jātasaṃbhramāḥ//
ūcuste caikapadyena himavantaṃ nageśvaram

parvatā ūcuḥ //
kanyādāne sthīyatāṃ cādya śailanāthoktyā kiṃ kāryanāśastaveva //
satyaṃ brūmo nātra kāryo vimarśastasmātkanyā dīyatāmīśvarāya

brahmo vāca //
tacchutvā vacanaṃ teṣāṃ suhṛdāṃ sa himālayaḥ //
svakanyādānamakarocchivāya vidhinoditaḥ

imāṃ kanyāṃ tubhyamahaṃ dadāmi parameśvara //
bhāryārthe parigṛhṇīṣva prasīda sakaleśvara

tasmai rudrāya mahate maṃtreṇānena dattavān //
himācalo nijāṃ kanyāṃ pārvatīṃ trijagatprasūm

itthaṃ śivākaraṃ śailaṃ śivahastenidhāya ca //
mumodātīva manasi tīrṇakāmamahārṇavaḥ

vedamaṃtreṇa giriśo girijākarapaṅkajam //
jagrāha svakareṇāśu prasannaḥ parameśvaraḥ

kṣitiṃ saṃspṛśya kāmasya kodāditi manuṃ mune//
papāṭha śaṅkaraḥ prītyā darśayam̐llaukikīṃ gatim

mahotsavo mahānāsītsarvatra pramudāvahaḥ //
babhūva jayasaṃrāvo divi bhūmyantarikṣake

sādhuśabdaṃ namaḥ śabdaṃ cakrussarve'ti harṣitāḥ//
gaṃdharvāssujaguḥ prītyā nanṛtuścāpsarogaṇāḥ

himācalasya paurā hi mumudu ścāti cetasi //
maṃgalaṃ mahadāsīdvai mahotsavapurassaram

ahaṃ viṣṇuśca śakraśca nirjarā munayo'khilāḥ //
harṣitā hyabhavaṃścāti praphullavadanāmbujāḥ

atha śailavarassodātsuprasanno himācalaḥ //
śivāya kanyādānasya sāṅgatāṃ suyathocitām

tato vandhujanāstasya śivāṃ sampūjya bhaktitaḥ //
daduśśivāya saddravyaṃ nānāvidhividhānataḥ

himālayastuṣṭamanāḥ pārvatīśi vaprītaye //
nānāvidhāni dravyāṇi dadau tatra munīśvara

kautukāni dadau tasmai ratnāni vividhāni ca //
cāruratnavikārāṇi pātrāṇi vividhāni ca

gavāṃ lakṣaṃ hayānāṃ ca sajjitānāṃ śataṃ tathā //
dāsīnāmanuraktānāṃ lakṣaṃ saddravyabhūṣitam

nāgānāṃ śatalakṣaṃ hi rathānāṃ ca tathā mune //
suvarṇajaṭitānāṃ ca ratnasāravinirmitam

itthaṃ himālayo dattvā svasutāṃ girijāṃ śivām //
śivāya parameśāya vidhinā''pa kṛtārthatām

atha śailavaro mādhyaṃdinoktastotrato mudā //
tuṣṭāva parameśānaṃ sadgirā sukṛtāñjaliḥ

tato vedavidā tenājñaptā munigaṇāstadā //
śiro'bhiṣekaṃ cakruste śivāyāḥ paramotsavāḥ

devābhidhānamuccāryya paryyakṣaṇavidhiṃ vyadhuḥ //
mahotsavastadā cāsīnmahānandakaro mune

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe kanyādānavarṇanaṃ nāmāṣṭacatvāriṃśo'dhyāyaḥ