Shiva Purana · Chapter 2.3.47

brahmovāca //
tataḥ śailavaraḥ sopi prītyā durgopavītakam //
kārayāmāsa sotsāhaṃ vedamantraiśśivasya ca

atha viṣṇvādayo devā munayassakutū halam //
himācalaprārthanayā viveśāntargṛhaṃ gireḥ

śrutyācāraṃ bhavācāraṃ vidhāya ca yathārthataḥ //
śivāmalaṃkṛtāṃ cakruśśivadattavibhūṣaṇaiḥ

prathamaṃ snāpayitvā tāṃ bhūṣayitvātha sarvaśaḥ //
nīrājitā sakhībhiśca viprapatnībhireva ca

ahatāmbarayugmena śobhitā varavarṇinī //
virarāja mahāśailaduhitā śaṅkarapriyā

kaṃcukī paramā divyā nānāratnānvitādbhutā //
vidhṛtā ca tayā devyā vilasantyādhikaṃ mune

sā babhāra tathā hāraṃ divyaratnasamanvitam //
valayāni mahārhāṇi śuddhacāmīkarāṇi ca

sthitā tatraiva subhagā dhyāyantī manasā śivam //
śuśubheti mahāśailakanyakā trijagatprasūḥ

tadotsavo mahānāsīdubhayatra mudā vahaḥ //
dānaṃ babhūva vividhaṃ brāhmaṇebhyo vivarṇitam

anyeṣāṃ dravyadānaṃ ca babhūva vividhammahat //
gītavādyavinodaśca tatrotsavapurassaram

atha viṣṇurahaṃ dhātā śakrādyā amarāstathā //
munayaśca mahāprītyā nikhilāssotsavā mudā

supraṇamya śivāṃ bhaktyā smṛtvā śivapadāmbujam //
samprāpya himagiryyājñāṃ svaṃ svaṃ sthāne samāśritāḥ

etasminnantare tatra jyotiḥśāstra viśāradaḥ //
himavantaṃ girīndraṃ taṃ gargo vākyamabhāṣata

// garga uvāca //
himācala dharādhīśa svāmin kālīpatiḥ prabho //
pāṇigrahārthaṃ śaṃbhuṃ cānaya tvaṃ nijamaṃdiram

// brahmovāca //
atha taṃ samayaṃ jñātvā kanyādānocitaṃ giriḥ //
niveditaṃ ca gargeṇa musude'tīva cetasi

mahīdharāndvijāṃścaiva parānapi tadā giriḥ //
preṣayāmāsa suprītyā śivānayanakāmyayā

te parvatā dvijāścaiva sarvamaṃgalapāṇayaḥ //
saṃjagmussotsavāḥ prītyā yatra devo maheśvaraḥ

tadā vāditraghoṣeṇa brahmaghoṣeṇa bhūyasā //
mahotsāho'bhavattatra gītanṛtyānvitena hi

śrutvā vāditranirghoṣaṃ sarve śaṃkarasevakāḥ //
utthitāstvaikapadyena sadevarṣigaṇā mudā

parasparaṃ samūcuste harṣanirbharamānasāḥ //
atrāgacchaṃti girayaśśivānayanakāmyayā

pāṇigrahaṇakālo hi nūnaṃ sadyassamāgataḥ //
mahadbhāgyaṃ hi sarveṣāṃ saṃprāptamahi manmahe

dhanyā vayaṃ viśeṣeṇa vivāhaṃ śivayordhruvam//
drakṣyāmaḥ paramaprītyā jagatāṃ maṃgalālayam

brahmovāca //
evaṃ yāvadabhūtteṣāṃ saṃvādastatra cādarāt //
tāvatsarve samāyātāḥ parvateṃdrasya maṃtriṇaḥ

te gatvā prārthayāṃcakruśśiva viṣṇvādikānapi //
kanyādānocitaḥ kālo vartate gamyatāmiti

te tacchrutvā surāssarve mune viṣṇvādayo'khilāḥ //
mumuduścetasātīva jayetyūcurgiriṃ drutam

śivo'pi mumude'tīva kālīprāpaṇalālasaḥ //
guptaṃ cakāra taccihnaṃ manasyevādbhutākṛtiḥ

atha snānaṃ kṛtantena maṅgaladravyasaṃyutam //
śūlinā suprasannena lokānugrahakāriṇā

snātassuvāsasā yuktassarvaistaiḥ parivāritaḥ //
āropito vṛṣaskandhe lokapālaissusevitaḥ

puraskṛtya prabhuṃ sarve jagmurhimagirergṛham //
vādyāni vādayantaśca kṛtavantaḥ kutūhalam

himāgapreṣitā viprāstathā te parvatottamāḥ //
śambhoragracarā hyāsankutūhalasamanvitāḥ

babhau chatreṇa mahatā dhriyamāṇo hi mūrddhani//
cāmarairvījyamāno'sau savitā no maheśvaraḥ

ahaṃ viṣṇustathā cendro lokapālā stathaiva ca //
agragāḥ smātiśobhante śriyā paramayā śritāḥ

tataśśaṅkhāśca bheryyaśca paṭahānakagomukhāḥ //
punaḥ punaravādyanta vāditrāṇi mahotsave

tathaiva gāyakāssarve jaguḥ paramamaṅgalam//
nartakyo nanṛtussarvā nānātālasamanvitāḥ

ebhissameto jagadekabandhuryayau tadānīṃ parameśavarcasā //
susevyamānassakalaissureśvarairvikīryamāṇaḥ kusumaiśca harṣitaiḥ

sampūjitastadā śambhuḥ praviṣṭo yajñamaṇḍapam//
saṃstūyamāno bahvībhiḥ stutibhiḥ parameśvaraḥ

vṛṣāduttārayāmāsurmaheśamparvatottamāḥ//
ninyurgṛhāntaramprītyā mahotsavapurassaram

himālayo'pi samprāptaṃ sadevagaṇamīśvaram //
praṇamya vidhivadbhaktyā nīrājanamathākarot

sarvānsurānmunīnanyānpraṇamya samahotsavaḥ //
sammānamakarotteṣāṃ praśaṃsansvavidhimmudā

so'gassācyutamīśānaṃ supādyārghyapurassaram //
sadevamukhyavargaṃ ca nināya svālayāntaram

prāṅgaṇe sthāpayāmāsa ratnasiṃhāsaneṣu tān //
sarvānviṣṇu ca māmīśaṃ viśiṣṭāṃśca viśeṣataḥ

sakhībhirmenayā prītyā brāhmaṇastrībhireva ca //
anyābhiśca purandhībhiścakre nīrājanammudā

purodhasā kṛtyavidā śaṃkarāya mahātmane //
madhuparkādikaṃ yadyatkṛtyaṃ tattatkṛtaṃ mudā

mayā sa noditastatra purodhāḥ kṛtavām̐stadā //
sumaṃgalaṃ ca yatkarma prastāvasadṛśammune

antarvedyāṃ mahāprītyā sampraviśya himādriṇā //
yatra sā pārvatī kanyā sarvābharaṇabhūṣitā

vedikopari tanvaṃgī saṃsthitā suvirājitā //
tatra nīto maddādevo viṣṇunā ca mayā saha

lagnannirīkṣamāṇāste vācaspatipurogamāḥ //
kanyādānocitantatra babhūvuḥ paramotsavāḥ

tatropaviṣṭo gargaśca yatrāsti ghaṭikālayam //
yāvaccheṣā ghaṭī tāvatkṛtampraṇavabhāṣaṇam

puṇyāhampravadangargassamādhre'ñjalimmudā//
pārvvatyakṣatapūrṇaṃ ca vavṛṣe ca śivopari

tayā sampūjito rudro dadhyakṣatakuśāmbubhiḥ //
paramodāḍhyayā tatra pārvatyā rucirāsyayā

vilokayantī taṃ śambhuṃ yasyārthe paramantapaḥ //
kṛtampurā mahāprītyā virarāja śivāti sā

mayā mune tadoktastu gargādimunibhiśca saḥ //
samānarca śivāṃ śambhurlaukikācārasaṃrataḥ

evaṃ parasparaṃ tau vai pārvvatīparameśvarau//
arcayantau tadānīñca śuśubhāte jaganmayau

trailokyalakṣmyā saṃvītau nirīkṣantau parasparam //
tadā nīrājitau lakṣmyādibhisstrībhirviśeṣataḥ / ५४ //
tathā parā vai dvijayoṣitaśca nīrājayāmāsuratho purastriyaḥ //
śivāñca śambhuñca vilokayantyo'vāpurmmudantāssakalā mahotsavam

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śiva himagirigṛhābhyantaragamanotsavavarṇanaṃ nāma saptacatvāriṃśo'dhyāyaḥ