Shiva Purana · Chapter 2.3.46

// brahmovāca //
atha śaṃbhuḥ prasannātmā sadūtaṃ svagaṇaissuraiḥ //
sarvairanyairgirerddhāma jagāma sakutūhalam

menāpi strīgaṇaistaiśca himācalavarapriyā //
tata utthāya svagṛhā bhyaṃtaraṃ sā jagāma ha

nīrājanārthaṃ śambhośca dīpapātrakarā satī //
sarvarṣistrīgaṇaissākamagacchaddvāramādarāt

tatrāgataṃ maheśānaṃ śaṃkaraṃ girijāvaram //
dadarśa prītito menā sevitaṃ sakalaissuraiḥ

cārucaṃpakavarṇābhaṃ hyekavaktraṃ trilocanam//
īṣaddhāsyaprasannāsyaṃ ratnasvarṇādibhūṣitam

mālatīmālayā yuktaṃ sadratnamukuṭojjvalam //
satkaṃṭhābharaṇaṃ cāruvalayāṃgadabhūṣitam

vahniśaucenātulena tvatisūkṣmeṇa cāruṇā //
amūlyavastrayugmena vicitreṇātirājitam

candanāgarukastūrīcārukuṃkuma bhūṣitam //
ratnadarpaṇahastaṃ ca kajjalojjvalalocanam

sarvasvaprabhayācchannamatīvasumanoharam //
atīva taruṇaṃ ramyaṃ bhūṣitāṃgaiśca bhūṣitam

kāminīkāṃtamavyagraṃ koṭicandrānanāṃbujam //
koṭismarādhikatanucchaviṃ sarvāṃgasuṃdaram

īdṛgvidhaṃ sudevaṃ taṃ sthitaṃ svapurataḥ prabhum //
dṛṣṭvā jāmātaraṃ menā jahau śokammudā'nvitā

praśaśaṃsa svabhāgyaṃ sā girijāṃ bhūdharaṃ kulam //
mene kṛtārthamātmānaṃ jaharṣa ca punaḥ punaḥ

nīrājanaṃ cakārāsau praphullavadanā satī //
avalokaparā tatra menā jāmātaraṃ mudā

girijoktamanusmṛtya menā vismayamāgatā //
manasaiva hyuvācedaṃ harṣaphullānanāmbujā

yadvai puroktaṃ ca tayā pārvatyā mama tatra ca //
tatodhikaṃ prapaśyāmi saundaryyaṃ parameśituḥ

maheśasya sulāvaṇyamanirvācyaṃ ca saṃprati //
evaṃ vismayamāpannā menā svagṛhamāyayau

praśaśaṃsuryuvatayo dhanyā dhanyā gireḥ sutā //
durgā bhagavatītyevamūcuḥ kāścana kanyakāḥ

na dṛṣṭo vara ityevamasmābhirddānagocaraḥ //
dhanyā hi girijā devīmūcuḥ kāścana kanyakāḥ

jagurgandharvvapravarā nanṛtuścāpsarogaṇāḥ //
dṛṣṭvā śaṃkararūpaṃ ca prahṛṣṭāssarvadevatāḥ

nānāprakāravādyāni vādakā madhurākṣaram //
nānāprakāraśilpena vādayāmāsurādarāt

himācalo'pi mudito dvārācāramathākarot //
menāpi sarvanārībhirmahotsavapurassaram

parapucchāṃ cakārāsau muditā svagṛhaṃ yayau //
śivo niveditaṃ sthānaṃ jagāma gaṇanirjaraiḥ

etasminnantare durgāṃ śailāntaḥpuracārikā //
bahirjagmussamādāya pūjituṃ kuladevatām

tatra tāṃ dadṛśurdevā nimeṣarahitā mudā //
sunīlāṃjanavarṇābhāṃ svāṃgaiśca pratibhūṣitām/

trinetrādṛtanetrāṃtāmanyavāritalocanām //
īṣaddhāsyaprasannāsyāṃ sakaṭākṣāṃ manoharām

sucārukabarībhārāṃ cārupatraka śobhitām //
kastūrībindubhissārddhaṃ sindūrabinduśobhitām

ratnendrasārahāreṇa vakṣasā suvirājitām //
ratnakeyūravalayāṃ ratnakaṅkaṇamaṃḍitām

sadratnakuṇḍalābhyāṃ ca cārugaṇḍasthalojjvalām //
maṇiratnaprabhāmuṣṭidantarājivirājitām

madhubimbādharoṣṭhāṃ ca ratnayāvakasaṃyutām //
ratnadarppaṇahastāṃ ca krīḍāpadmavibhūṣitām

candanāgurukastūrīkuṃkumenāti ca rcitām //
kvaṇanmaṃjīrapādāṃ ca raktāṃghritalarājitām

praṇemuśśirasā devīṃ bhaktiyuktāḥ samenakām //
sarve surādayo dṛṣṭvā jagadādyāṃ jagatprasūm

trinetro netrakoṇena tāṃ dadarśa mudānvitaḥ //
śivaḥ satyākṛtiṃ dṛṣṭvā vijahau virahajvaram

śivassarvaṃ visasmāra śivāsaṃnyastalocanaḥ //
pulakāṃcitasarvāṅgo harṣādgaurīvilocanaḥ

atha kālībahiḥ puryyāṃ gatvā pūjya kulāmbikām //
viveśa bhavanaṃ ramyaṃ svapitussadvijāṅganā

śaṅkaropi suraissārddhaṃ hariṇā brāhmaṇā tathā //
himācalasamuddiṣṭaṃ svasthānamagamanmudā

tatra sarve sukhaṃ tasthussevantaśśaṅkaraṃ yathā //
sammānitā girīśena nānāvidhasusampadā

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe varāgamādivarṇanaṃ nāma ṣaṭcatśariṃśo'dhyāyaḥ