Shiva Purana · Chapter 2.3.45

brahmovāca //
etasminnantare tvaṃ hi viṣṇunā prerito drutam //
anukūlayituṃ śaṃbhumayāstannikaṭe mune

tatra gatvā sa vai rudro bhavatā suprabodhitaḥ //
stotrairnānāvidhaisstutvā devakāryacikīrṣayā

śrutvā tvadvacanaṃ prītyā śaṃbhunā dhṛtamadbhutam //
svarūpamuttamandivyaṃ kṛpālutvaṃ ca darśitam

taddṛṣṭvā sundaraṃ śambhuṃ svarūpammanmathā dhikam //
atyahṛṣyo mune tvaṃ hi lāvaṇyaparamāyanam

stotrairnānāvidhaisstutvā paramānandasaṃyutaḥ //
āgacchastvaṃ mune tatra yatra menā sthitākhilaiḥ

tatrāgatya suprasanno mune'tipremasaṃkulaḥ //
harṣayaṃstāṃ śailapatnī menāntvaṃ vākyamabravīḥ/

nārada uvāca //
mene paśya viśālākṣi śivarūpamanuttamam //
kṛtā śivena tenaiva sukṛpā karuṇātmanā

brahmovāca //
śrutvā sā tadvaco menā vismitā śailakāminī //
dadarśa śivarūpantatparamānandadāyakam

koṭisūryapratīkāśaṃ sarvāvayavasundaram //
vicitravasanaṃ cātra nānābhūṣaṇabhūṣitam

suprasannaṃ suhāsaṃ ca sulāvaṇyaṃ manoharam //
gaurābhaṃ dyutisaṃyuktaṃ candrarekhāvibhūṣitam/

sarvairdevagaṇaiḥ prītyā viṣṇvādyassevitaṃ tathā//
sūryeṇa cchatritaṃ mūrdhni candreṇa ca viśobhitam

sarvathā ramaṇīyaṃ ca bhūṣitasya vibhūṣaṇaiḥ //
vāhanasya mahāśobhā varṇituṃ naiva śakyate

gaṃgā ca yamunā caiva vidhattaḥ sma sucāmare//
siddhayo'ṣṭau purastasya kurvanti sma sunarttanam

mayā caiva tadā viṣṇurindrādyā hyamarāstathā //
svaṃ svaṃ veṣaṃ susambhūṣya giriśenācaranyutāḥ

tathā jayeti bhāṣanto nānārūpā gaṇāstadā //
svalaṅkṛtamahāmodā girīśapurato'caran

siddhāścopasurāssarve munayaśca mahāsukhāḥ //
yayuśśivena suprītāssakalāścāpare tathā

evandevādayassarve kutūhalasamanvitāḥ //
paraṃbrahma gṛṇantaste svapatnībhiralaṃkṛtāḥ

viśvāvasumukhāstatra hyapsarogaṇasaṃyutāḥ //
gāyantopyagratastasya paramaṃ śāṅkaraṃ yaśaḥ

itthaṃ mahotsavastatra babhūva munisa ttama //
nānāvidho maheśe hi śailadvāri ca gacchati

tasmiṃśca samaye tatra suṣamā yā parātmanaḥ //
varṇituṃ tāṃ viśeṣeṇa kaśśaknoti munīśvara

tathāvidhaṃ ca tandṛṣṭvā menā citragatā iva //
kṣaṇamāsīttataḥ prītyā provāca vacanaṃ mune

menovāca //
dhanyā putrī madīyā ca yayā taptaṃ mahattapaḥ //
yatprabhāvānmaheśāna tvaṃ prāpta iha madgṛhe

mayā kṛtā purā yā vai śivanindā duratyayā //
tāṃ kṣamasva śivāsvāminsuprasanno bhavādhunā

brahmovāca //
itthaṃ sambhāṣya sā menā saṃstūyendulalāṭakam //
sāñjaliḥ praṇatā śailapriyā lajjāparā'bhavat

tāvatstriyassamājagmurhitvā kāmānanekaśaḥ //
bahvyastāḥ puravāsinyaśśivadarśanalālasāḥ

majjanaṃ kurvatī kācittaccūrṇasahitā yayau //
draṣṭuṃ kutūhalāḍhyā ca śaṅkaraṃ girijāvaram

kācittu svāminassevāṃ sakhīyuktā vihāya ca //
sucāmarakarā prītyāgācchambhordarśanāya vai

kācittu bālakaṃ hitvā pibantaṃ stanyamādarāt//
atṛptaṃ śaṅkarandraṣṭuṃ yayau darśanalālasā

raśanāṃ badhnatī kācittayaiva sahitā yayau //
vasanaṃ viparītaṃ vai dhṛtvā kācidyayau tataḥ

bhojanārthaṃ sthitaṃ kāntaṃ hitvā kācidyayau priyā//
draṣṭuṃ śivāvaraṃ prītyā satṛṣṇā sakutūhalā

kāciddhaste śalākāṃ ca dhṛtvāṃjanakarā priyā //
añjitvaikākṣi sandraṣṭuṃ yayau śailasutāvaram

kācittu kāminī pādau rañjayantī hyalaktakaiḥ //
śrutvā ghoṣaṃ ca taddhitvā darśanārthamupāgatā

ityādi vividhaṃ kāryaṃ hitvā vāsaṃ striyo yayuḥ //
dṛṣṭvā tu śāṃkaraṃ rūpaṃ mohaṃ prāptāstadā'bhavan

tatastāḥ premasaṃvignāśśivadarśanaharṣitāḥ //
nidhāya hṛdi tanmūrtiṃ vacanaṃ cedamabruvan

puravāsinya ūcuḥ//
netrāṇi saphalānyāsanhimavatpuravāsinām //
yo yo'paśyadado rūpaṃ tasya vai sārthakaṃ januḥ

tasyaiva saphalaṃ janma tasyaiva saphalāḥ kriyāḥ //
yena dṛṣṭaśśivassākṣātsarvapāpapraṇāśakaḥ

pārvatyā sādhitaṃ sarvaṃ śivārthaṃ yattapaḥ kṛtam //
dhanyeyaṃ kṛtakṛtyeyaṃ śivā prāpya śivampatim

yadīdaṃ yugalaṃ brahmā na yuṃjyācchivayormudā //
tadā ca sakalo'pyasya śramo niṣphalatāmiyāt

samyak kṛtaṃ tathā cātra yojitaṃ yugmamuttamam //
sarveṣāṃ sārthatā jātā sarvakāryasamudbhavā

vinā tu tapasā śambhordarśanaṃ durlabhannṛṇām //
darśanācchaṃkarasyaiva sarve yātāḥ kṛtārthatām

lakṣmīrnārāyaṇaṃ lebhe yathā vai svāminampurā //
tathāsau pārvatī devī haramprāpya subhūṣitā

brahmāṇaṃ ca yathā lebhe svāminaṃ vai sarasvatī //
tathāsau pārvatī devī haramprāpya subhūṣitā

vayandhanyāḥ striyassarvāḥ puruṣāssakalā varāḥ //
ye ye paśyanti sarveśaṃ śaṃkaraṃ girijāpatim

brahmovāca // itthamuktvā tu vacanaṃ candanaiścākṣatairapi //
śivaṃ samarcayāmāsurlājānvavṛṣurādarāt

tasthustatra striyaḥ sarvā menayā saha sotsukāḥ//
varṇayantyo'dhikambhāgyammenāyāśca girerapi

kathāstathāvidhāśśṛṇvaṃstadvāmā varṇitāśśubhāḥ //
prahṛṣṭo'bhūtprabhuḥ sarvairmune viṣṇvādibhistadā

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivasundarasvarūpapuravāsyutsavavarṇanaṃ nāma pañcacatvāriṃśo'dhyāyaḥ