શિવ પુરાણ · અધ્યાય 2.3.46

॥ બ્રહ્મોવાચ ॥
અથ શંભુઃ પ્રસન્નાત્મા સદૂતં સ્વગણૈસ્સુરૈઃ ॥
સર્વૈરન્યૈર્ગિરેર્દ્ધામ જગામ સકુતૂહલમ્

મેનાપિ સ્ત્રીગણૈસ્તૈશ્ચ હિમાચલવરપ્રિયા ॥
તત ઉત્થાય સ્વગૃહા ભ્યંતરં સા જગામ હ

નીરાજનાર્થં શમ્ભોશ્ચ દીપપાત્રકરા સતી ॥
સર્વર્ષિસ્ત્રીગણૈસ્સાકમગચ્છદ્દ્વારમાદરાત્

તત્રાગતં મહેશાનં શંકરં ગિરિજાવરમ્ ॥
દદર્શ પ્રીતિતો મેના સેવિતં સકલૈસ્સુરૈઃ

ચારુચંપકવર્ણાભં હ્યેકવક્ત્રં ત્રિલોચનમ્॥
ઈષદ્ધાસ્યપ્રસન્નાસ્યં રત્નસ્વર્ણાદિભૂષિતમ્

માલતીમાલયા યુક્તં સદ્રત્નમુકુટોજ્જ્વલમ્ ॥
સત્કંઠાભરણં ચારુવલયાંગદભૂષિતમ્

વહ્નિશૌચેનાતુલેન ત્વતિસૂક્ષ્મેણ ચારુણા ॥
અમૂલ્યવસ્ત્રયુગ્મેન વિચિત્રેણાતિરાજિતમ્

ચન્દનાગરુકસ્તૂરીચારુકુંકુમ ભૂષિતમ્ ॥
રત્નદર્પણહસ્તં ચ કજ્જલોજ્જ્વલલોચનમ્

સર્વસ્વપ્રભયાચ્છન્નમતીવસુમનોહરમ્ ॥
અતીવ તરુણં રમ્યં ભૂષિતાંગૈશ્ચ ભૂષિતમ્

કામિનીકાંતમવ્યગ્રં કોટિચન્દ્રાનનાંબુજમ્ ॥
કોટિસ્મરાધિકતનુચ્છવિં સર્વાંગસુંદરમ્

ઈદૃગ્વિધં સુદેવં તં સ્થિતં સ્વપુરતઃ પ્રભુમ્ ॥
દૃષ્ટ્વા જામાતરં મેના જહૌ શોકમ્મુદાઽન્વિતા

પ્રશશંસ સ્વભાગ્યં સા ગિરિજાં ભૂધરં કુલમ્ ॥
મેને કૃતાર્થમાત્માનં જહર્ષ ચ પુનઃ પુનઃ

નીરાજનં ચકારાસૌ પ્રફુલ્લવદના સતી ॥
અવલોકપરા તત્ર મેના જામાતરં મુદા

ગિરિજોક્તમનુસ્મૃત્ય મેના વિસ્મયમાગતા ॥
મનસૈવ હ્યુવાચેદં હર્ષફુલ્લાનનામ્બુજા

યદ્વૈ પુરોક્તં ચ તયા પાર્વત્યા મમ તત્ર ચ ॥
તતોધિકં પ્રપશ્યામિ સૌન્દર્ય્યં પરમેશિતુઃ

મહેશસ્ય સુલાવણ્યમનિર્વાચ્યં ચ સંપ્રતિ ॥
એવં વિસ્મયમાપન્ના મેના સ્વગૃહમાયયૌ

પ્રશશંસુર્યુવતયો ધન્યા ધન્યા ગિરેઃ સુતા ॥
દુર્ગા ભગવતીત્યેવમૂચુઃ કાશ્ચન કન્યકાઃ

ન દૃષ્ટો વર ઇત્યેવમસ્માભિર્દ્દાનગોચરઃ ॥
ધન્યા હિ ગિરિજા દેવીમૂચુઃ કાશ્ચન કન્યકાઃ

જગુર્ગન્ધર્વ્વપ્રવરા નનૃતુશ્ચાપ્સરોગણાઃ ॥
દૃષ્ટ્વા શંકરરૂપં ચ પ્રહૃષ્ટાસ્સર્વદેવતાઃ

નાનાપ્રકારવાદ્યાનિ વાદકા મધુરાક્ષરમ્ ॥
નાનાપ્રકારશિલ્પેન વાદયામાસુરાદરાત્

હિમાચલોઽપિ મુદિતો દ્વારાચારમથાકરોત્ ॥
મેનાપિ સર્વનારીભિર્મહોત્સવપુરસ્સરમ્

પરપુચ્છાં ચકારાસૌ મુદિતા સ્વગૃહં યયૌ ॥
શિવો નિવેદિતં સ્થાનં જગામ ગણનિર્જરૈઃ

એતસ્મિન્નન્તરે દુર્ગાં શૈલાન્તઃપુરચારિકા ॥
બહિર્જગ્મુસ્સમાદાય પૂજિતું કુલદેવતામ્

તત્ર તાં દદૃશુર્દેવા નિમેષરહિતા મુદા ॥
સુનીલાંજનવર્ણાભાં સ્વાંગૈશ્ચ પ્રતિભૂષિતામ્।

ત્રિનેત્રાદૃતનેત્રાંતામન્યવારિતલોચનામ્ ॥
ઈષદ્ધાસ્યપ્રસન્નાસ્યાં સકટાક્ષાં મનોહરામ્

સુચારુકબરીભારાં ચારુપત્રક શોભિતામ્ ॥
કસ્તૂરીબિન્દુભિસ્સાર્દ્ધં સિન્દૂરબિન્દુશોભિતામ્

રત્નેન્દ્રસારહારેણ વક્ષસા સુવિરાજિતામ્ ॥
રત્નકેયૂરવલયાં રત્નકઙ્કણમંડિતામ્

સદ્રત્નકુણ્ડલાભ્યાં ચ ચારુગણ્ડસ્થલોજ્જ્વલામ્ ॥
મણિરત્નપ્રભામુષ્ટિદન્તરાજિવિરાજિતામ્

મધુબિમ્બાધરોષ્ઠાં ચ રત્નયાવકસંયુતામ્ ॥
રત્નદર્પ્પણહસ્તાં ચ ક્રીડાપદ્મવિભૂષિતામ્

ચન્દનાગુરુકસ્તૂરીકુંકુમેનાતિ ચ ર્ચિતામ્ ॥
ક્વણન્મંજીરપાદાં ચ રક્તાંઘ્રિતલરાજિતામ્

પ્રણેમુશ્શિરસા દેવીં ભક્તિયુક્તાઃ સમેનકામ્ ॥
સર્વે સુરાદયો દૃષ્ટ્વા જગદાદ્યાં જગત્પ્રસૂમ્

ત્રિનેત્રો નેત્રકોણેન તાં દદર્શ મુદાન્વિતઃ ॥
શિવઃ સત્યાકૃતિં દૃષ્ટ્વા વિજહૌ વિરહજ્વરમ્

શિવસ્સર્વં વિસસ્માર શિવાસંન્યસ્તલોચનઃ ॥
પુલકાંચિતસર્વાઙ્ગો હર્ષાદ્ગૌરીવિલોચનઃ

અથ કાલીબહિઃ પુર્ય્યાં ગત્વા પૂજ્ય કુલામ્બિકામ્ ॥
વિવેશ ભવનં રમ્યં સ્વપિતુસ્સદ્વિજાઙ્ગના

શઙ્કરોપિ સુરૈસ્સાર્દ્ધં હરિણા બ્રાહ્મણા તથા ॥
હિમાચલસમુદ્દિષ્ટં સ્વસ્થાનમગમન્મુદા

તત્ર સર્વે સુખં તસ્થુસ્સેવન્તશ્શઙ્કરં યથા ॥
સમ્માનિતા ગિરીશેન નાનાવિધસુસમ્પદા

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં તૃતીયે પાર્વતીખણ્ડે વરાગમાદિવર્ણનં નામ ષટ્ચત્શરિંશોઽધ્યાયઃ