Shiva Purana · Chapter 2.3.40

brahmovāca //
atha śambhuḥ samāhūya nandyādīn sakalāngaṇān //
ājñāpayāmāsa mudā gantuṃ svena ca tatra vai

// śiva uvāca //
api yūyaṃ saha mayā saṃgacchadhvaṃ gireḥ puram //
kiyadgaṇānihāsthāpya mahotsavapurassaram

brahmovāca //
atha te samanujñaptā gaṇeśā niryayurmudā //
svaṃsvaṃ balamupādāya tān kathaṃcidvadāmyaham

abhyagācchaṃkhakarṇaśca gaṇakoṭyā gaṇeśvaraḥ //
śivena sārddhaṃ saṃgantuṃ himācalapuramprati

daśakoṭyā kekarākṣo gaṇānāṃ samahotsavaḥ //
aṣṭakoṭyā ca vikṛto gaṇānāṃ gaṇanāyakaḥ

catuṣkoṭyā viśākhaśca gaṇānāṃ gaṇanāyakaḥ//
pārijātaśca navabhiḥ koṭibhirgaṇapuṃgavaḥ

ṣaṣṭissarvāntakaḥ śrīmāntathaiva vikṛtānanaḥ //
gaṇānāndundubhoṣṭābhiḥ koṭikoṭibhirgaṇanāyakaḥ

pañcabhiśca kapālākhyo gaṇeśaḥ koṭibhistathā //
ṣaḍbhissandārako vīro gaṇānāṃ koṭibhirmune

koṭikoṭibhireveha kandukaḥ kuṇḍakastathā //
viṣṭambho gaṇapo'ṣṭābhirgaṇānāṃ koṭibhistathā

sahasrakoṭyā gaṇapaḥ pippalo mudito yayau //
tathā saṃnādako vīro gaṇeśo munisattama

āveśanastathāṣṭābhiḥ koṭibhirgaṇanāyakaḥ //
mahākeśassahasreṇa koṭīnāṃ gaṇapo yayau

kuṇḍo dvādaśakoṭyā hi tathā parvatako mune//
aṣṭābhiḥ koṭibhirvīrassamagāccandratāpanaḥ

kālaśca kālakaścaiva mahākālaśśatena vai //
koṭīnāṃ gaṇanātho hi tathaivāgnikanāmakaḥ

koṭyagnimukha evāgād gaṇānāṃ gaṇanāyakaḥ //
ādityamūrddhā koṭyā ca tathā caiva ghanāvahaḥ

sannāhaśśatakoṭyā hi kumudo gaṇapastathā //
amoghaḥ kokilaścaiva śatakoṭyā gaṇādhipaḥ

sumantraḥ koṭikoṭyā ca gaṇānāṃ gaṇānāyakaḥ //
kākapādodaraḥ koṭiṣaṣṭyā santānakastathā

mahābalaśca navabhirmadhupiṃgaśca kokilaḥ //
nīlo navatyā koṭīnāṃ pūrṇabhadrastathaiva ca

saptakoṭyā caturvaktraḥ karaṇo viṃśakoṭibhiḥ //
yayau navatikoṭyā tu gaṇeśāno hi romakaḥ

yajvāśaśśatamanyuśca meghamanyuśca nārada //
tāvatkoṭyā yayussarve gaṇeśā hi pṛthakpṛthak

kāṣṭhāṅguṣṭhaścatuṣṣaṣṭyā koṭīnāṃ gaṇanāyakaḥ //
virūpākṣassukeśaśca vṛṣābhaśca sanātanaḥ

tālaketuḥ ṣaḍāsyaśca cañcvāsyaśca sanātanaḥ //
samvartakastathā caitro lakulīśassvayamprabhuḥ

lokāntakaśca dīptātmā tathā daityāntako mune //
devo bhṛṃgiriṭiśśrīmāndevadevapriyastathā

aśanirbhānukaścaiva catuṣṣaṣṭyā sahasraśaḥ //
yayuśśivavivāhārthaṃ śivena sahasotsavāḥ

bhūtakoṭisahasreṇa pramathāḥ koṭibhistribhiḥ //
vīrabhadraścatuṣṣaṣṭyā romajānāntrikoṭibhiḥ

koṭikoṭisahasrāṇāṃ śatairviṃśatibhirvṛtāḥ //
tatra jagmuśca nandyādyā gaṇapāśśaṃkarotsave

kṣetrapālo bhairavaśca koṭikoṭigaṇairyutaḥ //
udvāhaśśaṃkarasyetyāyayau prītyā mahotsave

ete cānye ca gaṇapā asaṅkhyātā mahābalāḥ //
tatra jagmurmahāprītyā sotsāhāśśaṃkarotsave

sarve sahasrahastāśca jaṭāmukuṭadhāriṇaḥ //
candrarekhāvataṃsāśca nīlakaṇṭhāstrilocanāḥ

rudrākṣābharaṇāssarve tathā sadbhasmadhāriṇaḥ //
hārakuṇḍalakeyūramukuṭādyairalaṃkṛtāḥ

brahmaviṣṇvindrasaṃkāśā aṇimādiguṇairyutāḥ //
sūryyakoṭipratīkāśāstatra rejurgaṇeśvarāḥ

pṛthivīcāriṇaḥ kecit kecitpātālacāriṇaḥ //
kecidvyomacarāḥ kecitsaptasvargacarā mune

kimbahūktena devarṣe sarvalokanivāsinaḥ //
āyayussvagaṇāśśambhoḥ prītyā vai śaṅkarotsave

itthaṃ devairgaṇaiścānyaissahitaśśaṅkaraḥ prabhuḥ //
yayau himagiripuraṃ vivāhārthaṃ nijasya vai

yadājagāma sarveśo vivāhārthe surādibhiḥ //
tadā tatra hyabhūdvṛttaṃ tacchṛṇu tvaṃ munīśvara

rudrasya bhaginī bhūtvā caṇḍī sūtsavasaṃyutā//
tatrājagāma suprītyā pareṣāṃ suṃbhayāvahā

pretāsanasamārūḍhā sarpābharaṇabhūṣitā//
pūrṇaṃ kalaśamādāya haimaṃ mūrdhni mahāprabham

svaparīvārasaṃyuktā dīptāsyā dīptalocanā//
kutūhalamprakurvantī jātaharṣā mahābalā

tatra bhūtagaṇā divyā virūpaḥ koṭiśo mune //
virājante sma bahuśastathā nānāvidhāstadā

taissametāgrataścaṇḍī jagāma vikṛtānanā//
kutūhalānvitā prītā prītyupadrava kāriṇī

caṇḍyā sarve rudragaṇāḥ pṛṣṭhataśca kṛtāstadā//
koṭyekādaśasaṃkhyākā raudrarudrapriyāśca te

tadā ḍamarunirghoṣairvyāptamāsījjagattrayam//
bherījhaṃkāraśabdena śaṃkhānāṃ ninadena ca

tathā dundubhinirghoṣaiśśabdaḥ kolāhalo'bhavat //
kurvañjaganmaṃgalaṃ ca nāśayenmaṃgaletarat

gaṇānāṃ pṛṣṭhato bhūtvā sarve devāssamutsukāḥ //
anvayussarvasiddhāśca lokapālādikā mune

madhye vrajan rameśo'tha garuḍāsanamāśritaḥ //
śuśubhe dhriyamāṇena kṣatreṇa mahatā mune

cāmarairvījyamāno'sau svagaṇaiḥ parivāritaḥ //
pārṣadairvilasadbhiśca svabhūṣāvidhibhūṣitaḥ //४५
tathā'hamapyaśobhamvai vrajanmārge virājitaḥ //
vedairmūrtidharaiśśāstraiḥ purāṇairāgamaistathā //

sanakādimahāsiddhaissaprajāpatibhissutaiḥ //
parivāraissaṃyuto hi śivasevanatatparaḥ

svasainyamadhyagaśśakra airāvatagaja sthitaḥ //
nāmāvibhūṣito'tyantaṃ vrajan reje sureśvaraḥ

tadā tu vrajamānāste ṛṣayo bahavaśca te //
virejuratisotkaṇṭhaśśivasyodvāhanamprati

śākinyo yātudhānāśca vetālā brahmarākṣasāḥ //
bhūtapretapiśācāśca tathānye pramathādayaḥ

tumbururnārado hāhā hūhūścetyādayo varāḥ //
gandharvāḥ kinnarā jagmurvādyānādhmāya harṣitāḥ

jagato mātarassarvā devakanyāśca sarvaśaḥ //
gāyatrī caiva sāvitrī lakṣmīranyāssurastriyaḥ

etāścānyāśca devānāṃ patnayo bhavamātaraḥ //
udvāhaśśaṃkarasyeti jagmussarvā mudānvitāḥ

śuddhasphaṭikasaṃkāśo vṛṣabhassarvasundaraḥ //
yo dharma ucyate vedaiśśāstraissiddhamaharṣibhiḥ

tamārūḍho mahādevo vṛṣabhaṃ dharmavatsalaḥ//
śuśubhetīva devarṣisevitassakalairvrajan

ebhissametaissaphalaimaharṣibhirbabhau maheśo bahuśotyalaṃkṛtaḥ//
himālayāhvasya dharasya saṃvrajan pāṇigrahārthaṃ sadanaṃ śivāyāḥ

ityuktaṃ śambhucaritaṃ gamanamparamotsavam //
himālayapurodbhūtaṃ sadvṛttaṃ śṛṇu nārada

/
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe yātrāvarṇanaṃ nāma catvāriśo'dhyāyaḥ