Shiva Purana · Chapter 2.3.39

nārada uvāca // //
vidhe tāta mahāprājña viṣṇuśiṣya namo'stu te //
adbhuteyaṃ kathāśrāvi tvatto'smābhiḥ kṛpānidhe

idānīṃ śrotumicchāmi caritaṃ śaśimaulinaḥ //
vaivāhikaṃ sumāṅgalyaṃ sarvāghaughavināśanam

kiṃ cakāra mahādevaḥ prāpya maṅgalapatrikām //
tāṃ śrāvaya kathāndivyāṃ śaṅkarassaparātmanaḥ

// brahmovāca //
śṛṇu vatsa mahāprājña śāṅkaramparamaṃ yaśaḥ //
yaccakāra mahādevaḥ prāpya maṅgalapatrikām

atha śambhurgṛhītvā tāṃ mudā maṃgalapatrikām //
vijahāsa prahṛṣṭātmā mānanteṣāṃ vyadhādvibhuḥ

vācayitvā ca tāṃ samyagsvīcakāra vidhānataḥ //
tajjananyāpayāmāsa bahusammānya cādṛtaḥ

uvāca sunivargāṃstānkāryyaṃ samyak kṛtaṃ śubham //
āgantavyaṃ vivāhe me vivāhassvīkṛto mayā

ityākarṇya vacaśśambhoḥ prahṛṣṭāste praṇamya tam//
parikramya yayurdhāma śaṃsantaḥ svaṃ vidhimparam

atha deveśvaraśśambhussāmarastvāṃ mune drutam //
laukikācāramāśritya mahālīlākaraḥ prabhuḥ

tvamāgataḥ paraprītyā praśaṃsaṃstvaṃ vidhimparam //
praṇamaṃśca nataskandho vinītātmā kṛtāñjaliḥ

astaussujayaśabdānhi samuccārya muhurmuhuḥ//
nideśaṃ prārthayaṃstasya praśaṃsaṃstvaṃ vidhimmune

tataśśaṃbhuḥ prahṛṣṭātmā darśayam̐llaukikīṃ gatim //
uvāca munivarya tvāṃ prīṇayañchubhayā girā

śiva uvāca //
prītyā śṛṇu muniśreṣṭha hyasmatto'dya vadāmi te //
bruve tattvāṃ priyo me yadbhaktarājaśiromaṇiḥ

kṛtaṃ mahattapo devyā pārvatyā tava śāsanāt //
tasyai varo mayā dattaḥ patitve toṣitena vai

kariṣye'haṃ vivāhaṃ ca tasyā vaśyo hi bhaktitaḥ //
saptarṣibhissādhitaśca tallagnaṃ śodhitaṃ ca taiḥ

adyatassaptame cāhni tadbhaviṣyati nārada //
mahotsavaṃ kariṣyāmi laukikīṃ gatimāśritaḥ

brahmovāca//
iti śrutvā vacastasya śaṃkarasya parātmanaḥ //
prasannadhīḥ prabhuṃ natvā tāta tvaṃ vākyamabravīḥ

nārada uvāca//
bhavatastu vratamidambhaktavaśyo bhavānmataḥ//
samyak kṛtaṃ ca bhavatā pārvatīmānasepsitam

kāryaṃ matsadṛśaṃ kiñcitkathanīyantvayā vibho //
matvā svasevakaṃ māṃ hi kṛpāṃ kuru namo'stu te

brahmovāca //
ityuktastu tvayā śambhuśśaṃkaro bhaktavatsalaḥ //
pratyuvāca prasannātmā sādaraṃ tvāṃ munīśvara

śiva uvāca //
viṣṇuprabhṛtidevāṃśca munīnsiddhānapi dhruvam //
tvannimantraya madvāṇyā mune'nyānapi sarvataḥ

sarva āyāntu sotsāhāssarvaśobhāsamanvitāḥ //
sastrīsutagaṇāḥ prītyā mama śāsanagauravāt

nāgamiṣyanti ye tvatra madvivāhotsave mune //
te svakīyā na mantavyā mayā devādayaḥ khalu

brahmovāca //
itīśājñāṃ tato dhṛtvā bhavāñchaṅkaravallabhaḥ //
sarvānnimantrayāmāsa taṃ taṃ gatvā drutaṃ mune

śambhūpakaṇṭhamāgatya drutaṃ munivaro bhavān//
taddūtyāttatra santasthau tadājñāmprāpya nārada

śivo'pi tasthau sotkaṇṭhastadāgamanalālasaḥ //
svagaṇaissotsavaissaveṃrnṛtyadbhissarvatodiśam

etasminneva kāle tu racayitvā svaveṣakam//
ājagāmācyutaśśīghraṃ kailāsaṃ saparicchadaḥ

śivampraṇamya sadbhaktyā sadārassadalo mudā//
tadājñāmprāpya santasthau susthāne prītamānasaḥ

tathāhaṃ svagaṇairāśu kailāsamagamaṃ mudā //
prabhumpraṇamyātiṣṭhaṃ vai sānandassvagaṇānvitaḥ

indrādayo lokapālā āyayussaparicchadāḥ//
tathaivālaṃkṛtāssarve sotsavāssakalatrakāḥ

tathaiva munayo nāgāssiddhā upasurā stathā //
āyayuścāpare'pīha sotsavāssunimantritāḥ

maheśvarastadā tatrāgatānāṃ ca pṛthak pṛthak //
sarveṣāmamarādyānāṃ satkāraṃ vyadadhānmudā

athotsavo mahānāsītkailāse paramodbhutaḥ //
nṛtyādikantadā cakruryathāyogyaṃ surastriyaḥ

etasminsamaye devā viṣṇvādyā ye samāgatāḥ //
yātrāṃ kārayituṃ śambhostatroṣuste'khilā mune

śivājñaptāstadā sarve madīyamiti yantritāḥ //
śivakāryamidaṃ sarvaṃ cakrire śivasevanam

mātarassapta tāstatra śivabhūṣāvidhimparam //
cakrire ca mudā yuktā yathāyogyantathā punaḥ /३६//
tasya svābhāviko veṣo bhūṣāvivirabhūttadā //
tasyecchayā muniśreṣṭha parameśasya suprabho

candraśca mukuṭasthāne sānnidhyamakarottadā //
locanaṃ sundaraṃ hyāsīttṛtīyantilakaṃ śubham

karṇābharaṇarūpau ca yau hi sarpau prakīrtitau //
kuṇḍale'bhavatāntasya nānāratnānvite mune

anyāṃgasaṃsthitāssarpāstadaṃgābharaṇāni ca //
babhūvuratiramyāṇi nānāratnamayāni ca

vibhūtiraṃgarāgo'bhūccandanādisamudbhavaḥ //
taddukūlamabhūddivyaṃ gajacarmādi sundaram

īdṛśaṃ sundaraṃ rūpaṃ jātaṃ varṇātiduṣkaram //
īśvaro'pi svayaṃ sākṣādaiśvaryaṃ labdhavānsvataḥ

tataśca sarve surapakṣadānavā nāgāḥ pataṃgāpsaraso maharṣayaḥ //
sametya sarve śivasannidhiṃ tadā mahotsavāḥ procuraho mudānvitāḥ

sarvai ūcuḥ //
gaccha gaccha mahādeva vivāhārthaṃ maheśvara //
girijāyā mahādevyāḥ sahāsmābhiḥ kṛpāṃ kuru

tato viṣṇuruvācedaṃ prastāvasadṛśaṃ vacaḥ //
praṇamya śaṃkaraṃ bhaktyā vijñānaprītamānasaḥ

// viṣṇuruvāca //
deva deva mahādeva śaraṇāgatavatsala //
kāryakarttā svabhaktānāṃ vijñaptiṃ śṛṇu me prabho

gṛhyoktavidhinā śambho svavivāhasya śaṃkara//
girīśasutayā devyā karma kartumihārhasi

tvayā ca kriyamāṇe tu vivāhasya vidhau hara //
sa eva hi tathā loke sarvassukhyātimāpnuyāta

maṇḍapasthāpanannāndīmukhantatkuladharmataḥ //
kāraya prītito nātha loke svaṃ khyāpayan yaśaḥ

brahmovāca //
evamuktastadā śambhurviṣṇunā parameśvaraḥ //
laukikācāranirato vidhinā taccakāra saḥ

ahaṃ hyadhikṛtastena sarvamabhyudayocitam //
akurvaṃ munibhiḥ prītyā tatra tatkarma cādarāt

kaśyapo'trirvaśiṣṭhaśca gautamo bhāgurirguruḥ //
kaṇvo bṛhaspatiśśaktirjamadagniḥ parāśaraḥ

mārkaṇḍeyaśśilāpāko'ruṇapālo'kṛtaśramaḥ //
agastyaścyavano gargaśśilādo'tha mahāmune

dadhīcirupamanyuśca bharadvājo'kṛtavraṇaḥ //
pippalādo'tha kuśikaḥ kautso vyāsaḥ saśiṣyakaḥ

ete cānye ca bahava āgatāśśivasannidhim //
mayā sunoditāstatra cakruste vidhivatkriyām

vedoktavidhinā sarve vedavedāṃgapāragāḥ //
rakṣāṃ cakrurmaheśasya kṛtvā kautukamaṃgalam

ṛgyajussāmasūktaistu tathā nānāvidhaiḥ paraiḥ //
maṃgalāni ca bhūrīṇi cakruḥ prītyarṣayo'khilāḥ

grahāṇāṃ pūjanaṃ prītyā cakruste śambhunā mayā //
maṇḍalasthasurāṇāṃ ca sarveṣāṃ vighnaśāntaye/५८//
tataśśivastu santuṣṭaḥ kṛtvā sarvaṃ yathocitam//
laukikaṃ vaidikaṃ karma nanāma ca mudā dvijān

atha sarveśvaro viprāndevānkṛtvā purassarān //
nissasāra mudā tasmātkailāsātparvatottamāt

bahiḥ kailāsakudharācchambhustasthau mudānvitaḥ //
devaissaha dvijaiścaiva nānāsvīkārakaḥ prabhuḥ

tadotsavo mahānāsīttatra devādibhiḥ kṛtaḥ //
santuṣṭyarthaṃ maheśasya gānavādyasunṛtyakaḥ

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe devanimantraṇa devāgamana śivayātrāvarṇanaṃ nāmaikonacatvāriṃśo'dhyāyaḥ