Shiva Purana · Chapter 2.3.41

brahmovāca//
tatassammantrya ca mithaḥ prāpyājñāṃ śāṃkarīṃ hariḥ //
mune tvāmpreṣayāmāsa prathamaṃ kudharālayam

atha praṇamya sarveśaṃ gatastvaṃ nāradāgrataḥ //
hariṇā noditaḥ prītyā himācalagṛhamprati

tvaṃ mune'paśya ātmānaṃ gatvā tadvrīḍayānvitam //
kṛtrimaṃ racitaṃ tatra vismito viśvakarmaṇā

śrāntastvamātmanā tena kṛtrimeṇa mahāmune //
avalokaparasso'bhūccaritaṃ viśvakarmaṇaḥ

praviṣṭo maṇḍapastasya himādre ratnacitritam //
suvarṇakalaśairjuṣṭaṃ rambhādibahuśobhitam

sahasrastambhasaṃyuktaṃ vicitramparamādbhutam //
vedikāṃ ca tathā dṛṣṭvā vismayaṃ tvaṃ mune hyayāḥ

tadāvocaśca sa mune nārada tvaṃ nageśvaram //
vismito'tīva manasi naṣṭajñāno vimūḍhadhīḥ

āgatāste kimadhunā devā viṣṇupurogamāḥ //
tathā maharṣayassarve siddhā upasurāstathā

mahādevo vṛṣārūḍho gaṇaiśca parivāritaḥ //
āgataḥ kiṃ vivāhārthaṃ vada tathyaṃ nageśvara

brahmovāca //
ityevaṃ vacanaṃ śrutvā tava vismita cetasaḥ //
uvāca tvāṃ mune tathyaṃ vākyaṃ sa himavān giriḥ

himavānuvāca //
he nārada mahāprājñāgato naivādhunā śivaḥ //
vivāhārthaṃ ca pārvatyāssagaṇassavarātakaḥ

viśvakarmakṛtaṃ citraṃ viddhi nārada saddhiyā //
vismayantyaja devarṣe svastho bhava śivaṃ smara

bhuktvā viśramya suprītaḥ kṛpāṃ kṛtvā mamopari //
mainākādidharaissārddhaṃ gaccha tvaṃ śaṃkarāntikam

ebhissameto giribhirmahāmata saṃprārthya śīghraṃ śivamatra cānaya //
devaissametaṃ ca maharṣisaṃghaissurāsurairarcitapādapallavam

brahmovāca //
tatheti coktvāgama āśu hi tvaṃ sadaiva taiśśailasutādibhiśca //
tatratyakṛtyaṃ suvidhāya bhuktvā mahāmanāstvaṃ śivasa nnidhānam

tatra dṛṣṭo mahādevo devādiparivāritaḥ //
namaskṛtastvayā dīptaśśailaistairbhaktitaśca vai

tadā mayā viṣṇunā ca sarve devāssavāsavāḥ //
papracchustvāṃ mune sarve rudrasyānucarāstathā

vismitāḥ parvatāndṛṣṭvā sandehākulamānasāḥ //
mainākasahyamervādyānnānālaṃkārasaṃyutān

devā ūcuḥ //
he nārada mahāprājña vismitastvaṃ hi dṛśyase //
satkṛto'si himāgena kiṃ na vā vada vistarāt

ete kasmātsamāyātāḥ parvatā iha sattamāḥ //
mainākasahyamervādyāssupratāpāssvalaṃkṛtāḥ

kanyāṃ dāsyati śailo'sau sa bhave vā na nārada //
himālayagṛhe tāta kiṃ bhavatyadya tadvada

iti sandigdhamanasāmasmākaṃ ca divaukasām//
vad tvaṃ pṛcchamānānāṃ sandehaṃ hara suvrata

// brahmovāca //
ityākarṇya vacasteṣāṃ viṣṇvādīnāndivaukasām //
avocastānmune tvaṃ hi vismitastvāṣṭramāyayā

ekāntamāśritya ca māṃ hi viṣṇumabhāṣathā vākyamidaṃ mune tvam //
śacīpatiṃ sarvasureśvaraṃ vai pakṣācchidaṃ pūrvaripundharāṇām

nārada uvāca //
tvaṣṭrā kṛtantadvikṛtaṃ vicitraṃ vimohanaṃ sarvadivaukasāṃ hi //
yenaiva sarvānsa vimohituṃ surānsamicchati premata eva yuktyā

purā kṛtantasya vimohanantvayā suvismṛtantat sakalaṃ śacīpate //
tasmādasau tvāṃ vijigīṣureva gṛhe dhuvantasya girermahātmana

ahaṃ vimohitastena pratirūpeṇa bhāsvatā //
tathā viṣṇuḥ kṛtastena brahmā śakro'pi tādṛśaḥ

kimbahūktena deveśa sarvadevagaṇāḥ kṛtāḥ //
kṛtrimāścitrarūpeṇa na kiṃcidavaśeṣitam

vimohanārthaṃ sarveṣāṃ devānāṃ ca viśeṣataḥ //
kṛtā māyā citramayī parihāsavikāriṇī

// brahmovāca //
tacchutvā vacanastasya devendro vākyamabravīt //
viṣṇumprati tadā śīghraṃ bhayākulatanurharim

// devendra uvāca //
devadeva ramānātha tvaṣṭā māṃ nihaniṣyati//
putraśokena tapto'sau vyājenānena nānyathā

brahmovāca //
tasya tadvacanaṃ śrutvā devadevo janārdanaḥ //
uvāca prahasan vākyaṃ śakramāśvāsayaṃstadā

viṣṇuruvāca//
nivātakavacaiḥ pūrvaṃ mohito'si śacīpate//
mahāvidyāvalenaiva dānavaiḥ pūrvavairibhiḥ

parvato himavāneṣa tathānya'khilaparvatāḥ//
vipakṣā hi kṛtāssarve mama vākyācca vāsava

tenusmṛtyā tu vai dṛṣṭvā māyayā girayo hyamī // //
jetumicchantu ye mūḍhā na bhetavyamarāvapi

īśvaro no hi sarveṣāṃ śaṃkaro bhaktavatsalaḥ //
sarvathā kuśalaṃ śakra kariṣyati na saṃśayaḥ

brahmovāca //
evaṃ saṃvadamānantaṃ śakraṃ vikṛtamānasam //
hariṇoktaśca giriśo laukikīṃ gatimāśritaḥ

īśvara uvāca //
he hare he sureśāna kimbrūtho'dya parasparam //
ityuktvā tau maheśāno mune tvāmpratyuvāca saḥ

kiṃnu vakti mahāśailo yathārthaṃ vada nārada //
vṛttāntaṃ sakalambrūhi na gopyaṃ kartumarhasi

dadāti vā naiva dadāti śailassutāṃ svakīyāṃ vada tacca śīghram //
kinte dṛṣṭaṃ kiṃ kṛtantatra gatvā prītyā sarvaṃ tadvadāśvadya tāta

// brahmovāca //
hatyuktaśśambhunā tatra mune tvandevadarśanaḥ //
sarvaṃ rahasyavoco vai yaddṛṣṭantatra maṇḍape

nārada uvāca//
devadeva mahādeva śṛṇu madvacanaṃ śubham //
nāsti vighnabhayaṃ nātha vivāhe kiṃcideva hi

avaśyameva śaileśastubhyaṃ dāsyati kanyakām //
tvāmānayitumāyātā ime śailā na saṃśayaḥ

kintu hyamaramohārthaṃ māyā viracitādbhutā //
kutūhalārthaṃ sarvajña na kaścidvighnasambhavaḥ

vicitrammaṇḍapaṃ gehe'kārṣīttasya tadājñayā //
viśvakarmā mahāmāyī nānāścaryamayaṃ vibho

sarvadevasamājaśca kṛtastatra vimohanaḥ //
tandṛṣṭvā vismayaṃ prāptohaṃ tanmāyāvimohitaḥ

// brahmovāca //
tacchrutvā tadvacastāta lokācārakaraḥ prabhuḥ //
harṣādīnprahasañchambhuruvāca sakalānsurān

īśvara uvāca //
kanyāṃ dāsyati cenmahyaṃ parvato hi himācalaḥ //
māyayā mama kiṃ kāryaṃ vada viṣṇo yathātatham

he brahmañchakra munayasturā brūta yathārthataḥ //
māyayā mama kiṃ kāryaṃ kanyāṃ dāsyati cedgiriḥ

kenāpyupāyena phalaṃ hi sādhyamityucyate paṇḍitairnyāyavidbhiḥ //
tasmātsarvairgamyatāṃ śīghrameva kāryārthibhirviṣṇupurogamaiśca

brahmovāca //
evaṃ saṃvadamāno'sau devaiśśambhurabhūttadā //
kṛtaḥ smareṇaiva vaśī vaśaṃ vā prākṛto naraḥ

atha śambhvājñayā sarve viṣṇvādyā nirjarāstadā //
ṛṣayaśca mahātmāno yayurmohabhramāpaham

puraskṛtya mune tvāṃ ca parvatāṃstānsavismayāḥ //
himādreśca tadā jagmurmandiramparamādbhutam

atha viṣṇvādisaṃyukto muditaissvabalairyutaḥ//
ājagāmopahaimāgapuraṃ pramudito haraḥ

//
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe maṇḍaparacanāvarṇanaṃ nāmaikacatvāriṃśo'dhyāyaḥ