Shiva Purana · Chapter 2.3.38

// brahmovāca //
atha śaileśvaraḥ prīto himavānmuni sattama //
svapuraṃ racayāmāsa vicitraṃ paramotsavam

siktamārgaṃ saṃskṛtaṃ ca śobhitaṃ paramarddhibhiḥ //
dvāri dvāri ca rambhādi maṅgalaṃ dravyasaṃyutam

prāṃgaṇaṃ racayāmāsa rambhāstaṃbhasamanvitam //
paṭṭasūtraissaṃnibaddharasālapallavānvitam

mālatīmālyasaṃyuktaṃ lasattoraṇasuprabham //
śobhitammaṃgaladravyaiścaturdikṣu sthitaiśśubhaiḥ

tathaiva sarvaṃ parayā mudānvitaścakre girīndrassvasutārthameva//
gargampuraskṛtya mahāprabhāvaṃ prastāvayogyaṃ ca sumaṃgalaṃ hi

āhūya viśvakarmāṇaṃ kārayāmāsa sādaram //
maṇḍapaṃ ca suvistīrṇaṃ vedikādimanoharam

ayutena surarṣe tadyojanānāṃ ca vistṛtam //
anekalakṣaṇopetaṃ nānāścaryyasamanvitam // ७ /
sthāvaraṃ jaṃgamaṃ sarvaṃ sadṛśantairmanoharam //
sarvato'dbhutasarvatvaṃ nānāvastucamatkṛtam

jaṃgamaṃ vijitantatra sthāvareṇa viśeṣataḥ //
jaṃgamena ca tatrāsījjitaṃ sthāvarameva hi

payasā ca jitā tatra sthalabhūmirna cānyathā //
jalaṃ kiṃ hi sthalaṃ kiṃ hi na viduḥ ke'pi kovidāḥ

kvacitsiṃhāḥ kṛtrimāśca kvacitsārasapaṃktayaḥ //
kvacicchikhaṇḍinastatra kṛtrimāśca manoharāḥ //

kvacitstriyaḥ kṛtrimāśca nṛtyantyaḥ puruṣaissaha //
mohayantyo janānsarvānpaśyantyaḥ kṛtrimāstathā

tathā tenaiva vidhinā dvārapālā manoharāḥ //
hastairdhanūṃṣi coddhṛtya sthāvarā jaṃgamopamāḥ

dvāri sthitā mahālakṣmīḥ kṛtrimā racitādbhutā//
sarvalakṣaṇasaṃyuktā gatāḥ sākṣatpayorṇavāta

gajāścālaṅkṛtā hyāsankṛtrimā akṛtopamāḥ //
tathāśvāḥ na sādibhiścaiva gajāśca gajasādibhiḥ

rathā rathibhirākṛṣṭā mahāścaryasamanvitāḥ //
vāhanāni tathānyāni pattayaḥ kṛtrimāstathā

evaṃ vimohanārthantu kṛtaṃ vai viśvakarmaṇā //
devānāṃ ca munīnāṃ ca tena prītātmanā mune

mahādvāri sthitau nandī kṛtrimaśca kṛto mune //
śuddhasphaṭikasaṃkāśo yathā nandī tathaiva saḥ //१-//
tasyopari mahādivyampuṣpakaṃ ratnabhūṣitam //
rājitaṃ pallavaiśśubhraścāmaraiśca suśobhitam

vāmapārśve gajau dvau ca śuddhakāśmīrasannibhau //
caturdanto ṣaṣṭivarṣau bhedamānau mahāprabhau

tathaivārkanibhau tena kṛtau cāśvau mahāprabhau //
cāmarālaṃkṛtau divyau divyālaṅkārabhūṣitau

daṃśitā vararatnāḍhyā lokapālāstathaiva ca //
sarve devā yathārthaṃ vai kṛtā vai viśvakarmaṇā

tathā hi ṛṣayassarve bhṛgvādyāśca tapodhanāḥ //
anye hyupasurāstadvatsiddhāścānye'pi vai kṛtāḥ

viṣṇuśca pārṣadaissarvairgaruḍākhyaissamanvitaḥ //
kṛtrimo nirmitastadvatparamāścaryarūpavān

tathaivāhaṃ sutaivedaissiddhaiśca parivāritaḥ //
kṛtrimo nirmitastadvatpaṭhansūktāni nārada

airāvatagajārūḍhaśśakrassvadalasaṃyutaḥ //
kṛtrimo nirmitastadvatparipūrṇendusaṃnibhaḥ

kiṃ bahūktena devarṣe sarvo vai viśvakarmaṇā //
himāgapreritenāśu klṛptassurasamājakaḥ

evaṃbhūtaḥ kṛtastena maṇḍapo divyarūpavān //
anekāścaryasambhūto mahāndevavimohanaḥ

athājñapto girīśena viśvakarmā mahāmatiḥ //
nivāsārthaṃ surādīnāṃ tattallokām hi yatnataḥ

tatraiva ca mahāmañcāḥ suprabhāḥ paramādbhutāḥ //
racitāssukhadā divyā steṣāṃ vai viśvakarmaṇā

tathāptasaptalokaṃ vai virece kṣaṇato'dbhutam //
dīptyā paramayā yuktaṃ nivāsārthaṃ svayambhuvaḥ

tathaiva viṣṇostvaparaṃ vaikuṇṭhākhyaṃ mahojjvalam //
virece kṣaṇato divyaṃ nānāścaryasamanvitam

amareśagṛhandivyaṃ tathaivādbhutamuttamam//
virece viśvakarmāsau sarvaiśvaryasamanvitam

gṛhāṇi lokapālānāṃ virece sundarāṇi ca //
tadvatsa prītito divyānyadbhutāni mahānti ca

anyeṣāmamarāṇāṃ ca sarveṣāṃ kramaśastathā //
sadanāni vicitrāṇi racitāni ca tena vai

viśvakarmā mahābuddhiḥ prāptaśambhumahāvaraḥ //
virece kṣaṇataḥ sarvaṃ śivatuṣṭyarthameva ca

tathaiva citraṃ paramaṃ mahojjvalaṃ mahāprabhandevavaraissupūjitam //
girīśacihnaṃ śivalokasaṃsthitaṃ suśobhitaṃ śambhugṛhaṃ cakāra

evambhūtā kṛtā tena racanā viśvakarmaṇā //
vicitrā śivatuṣṭyarthaṃ parāścaryā mahojjvalā

evaṃ kṛtvākhilaṃ cedaṃ vyavahāraṃ ca laukikam //
paryyaikṣiṣṭa mudā śambhvāgamanaṃ sa himācalaḥ

iti proktamaśeṣeṇa vṛttāntampramudāvaham //
himālayasya devarṣe kimbhūyaḥ śrotumicchasi

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe maṇḍapādiracanāvarṇanaṃ nāmāṣṭatriṃśo'dhyāyaḥ