Shiva Purana · Chapter 2.3.37

nārada uvāca //
tāta prājña vadedānīṃ saptarṣiṣu gateṣu ca //
kimakārṣīddhimagiristanme kṛtvā kṛpāṃ prabho

// brahmovāca //
gateṣu teṣu muniṣu saptasvapi munīśvara //
sārundhatīṣu himavān yadakārṣīdbravīmi te

tata āmantrya svabhrātṝn mervādīn sasutapriyaḥ //
mahāmanāssa mumude himavān parvateśvaraḥ

tadājñaptastataḥ prītyā himavān lagna patrikām //
lekhayāmāsa suprītyā gargeṇa svapurodhasā

atha prasthāpayāmāsa tāṃ śivāya sa patrikām//
nānāvidhāstu sāmagryaḥ svajanairmuditātmabhiḥ

te janāstatra gatvā ca kailāse śivasannidhim //
daduśśivāya tatpatraṃ tilakaṃ samvidhāya ca

sanmānitā viśeṣeṇa prabhuṇā ca yathocitam //
sarve te prītimanasa ājagmuśśailasannidhim

sanmānitānviśeṣeṇa maheśenāgatāñjanān //
dṛṣṭvā suharṣitāñcchailo mumodātīva cetasi

tato nimantraṇaṃ cakre svabandhūnāṃ pramoditaḥ //
nānādeśasthitānāñca nikhilānāṃ sukhāspadam

tatassa kārayāmāsa svarṇasaṃgrahamādarāt //
nānāvidhāśca sāmagrīrvivāhakaraṇocitāḥ

taṇḍulānāṃ bahūñchailān pṛthukānāṃ tathaiva ca //
guḍānāṃ śarkarāṇāñca lavaṇānāṃ tathaiva ca

kṣīrāṇāṃ ca ghṛtānāñca dadhnāṃ vāpīścakāra saḥ//
yavādidhānyapiṣṭānāṃ laḍḍukānāṃ tathaiva ca

śaṣkulīnāṃ svastikānāṃ śarkarāṇāṃ tathaiva ca //
amṛtekṣurasānāṃ ca tatra vāpīścakāra saḥ

bahvīrhaiyaṃgavānāñca hyāsavānāṃ tathaiva ca //
nānā pakvānnasaṃghāṃśca mahāsvādurasām̐stathā

nānā vyañjanavastūni gaṇadevahitāni ca //
amūlyanānāvastrāṇi vahniśaucāni yāni ca

maṇiratnaprakārāṇi suvarṇarajatāni ca //
dravyāṇyetāni cānyāni saṃgṛhya vidhipūrvakam

maṃgalaṃ kartumārebhe girirmaṃgalakṛddine //
saṃskāraṃ kārayāmāsuḥ pārvatyāḥ parvatastriyaḥ

tā maṃgalaṃ mudā cakrurbhūṣitā bhūṣaṇaiḥ svayam //
puradvijastriyo dṛṣṭvā lokācāraṃ pracakrire

sotsavaṃ vividhaṃ tatra sumaṃgalapurassaram //
himālayo'pi hṛṣṭātmā kṛtvācāraṃ sumaṃgalam

sarvabhāvena suprīto bandhuvargāgamotsukaḥ //
etasminnantare tasya bāndhavāśca nimantritāḥ

ājagmussastriyo hṛṣṭāssasutāssaparicchadāḥ //
tadaiva śṛṇu devarṣe giryyāgamanamādṛtaḥ

varṇayāmi samāsena śivaprītivivṛddhaye //
devālaya giriryo hi divyarūpadharo mahān

nānāratnaparibhrājatsamājassaparicchadaḥ //
nānāmaṇimahāratnasāramādāya yatnataḥ

suveṣālaṃkṛtaḥ śrīmān jagāma sa himālayam //
mandarassarvaśobhāḍhyassanārītanayo giriḥ

sūpāyanāni saṃgṛhya jagāma vividhāni ca //
astācalopi divyātmā sopāyana udāradhīḥ

bahuśobhāsamāyukta ājagāma mudānvitaḥ //
udayācala ādāya sadratnāni maṇīnapi

/
atyutkṛṣṭaparīvāra ājagāma mahāsukhī //
malayo girirājo hi saparīvāra ādṛtaḥ

sudivyaracanāyukta āyayau bahusadbalaḥ //
sadyo darduranāmā ca muditassakalatrakaḥ

bahuśobhānvitastātaḥ yayau himagirergṛham//
niṣadopi prahṛṣṭātmā saparicchada āyayau

sasutastrīgaṇaḥ prītyā yayau himagirergṛham //
ājagāma mahābhāgyo bhūdharo gandhamādanaḥ

karavīrastathaivāpi mahāvibhava saṃyutaḥ //
mahendraḥ parvataśreṣṭha ājagāma himālayam //३ १ //
sagaṇassasutastrīko bahuśobhāsamanvitaḥ //
pāriyātro hi hṛṣṭātmā maṇi ratnākarassayut

sagaṇassaparīvāra āyayau himabhūdharam //
krauñcaḥ parvatarājo hi mahābalaparicchadaḥ //
ājagāma giriśreṣṭhassa mupāyana ādṛtaḥ

puruṣottamaśailopi saparicchada ādṛtaḥ //
mahopāyanamādāyājagāma himabhūdharam

nīlaḥ salīlassa sutassastrīko dravyasaṃyutaḥ //
ājagāma himāgasya gṛhamānandasaṃyutaḥ

trikūṭaścitrakūṭopi veṃkaṭaḥ śrīgiristathā //
gokāmukhī nāradaśca himagehamupāgamat

vindhyaśca parvataśreṣṭho nānāsampatsamanvitaḥ //
ājagāma prahṛṣṭātmā sadāratanayaśśubhaḥ

kālaṃjaro mahāśailo bahuharṣasamanvitaḥ //
bahubhassagaṇaḥ prītyājagāmahimabhūdharam

kailāsastu mahāśailo mahāharṣasamanvitaḥ//
ājagāma kṛpāṃ kṛtvā sarvopari lasatprabhuḥ

anyepi bhūbhṛto ye hi dvīpeṣvanyeṣvapi dvija //
ihāpi ye'calāssarve āyayuste himālayam

nimantritā nagāstatra tena pūrvaṃ mudā mune //
āyayurnikhilāḥ prītyā vivāhaśśivayoriti

tadā sarve samāyātāśśoṇabhadrādayaḥ khalu//
bahuśobhā mahāprītyā vivāhaśśivayoriti

nadyassarvāssamāyātā nānālaṃkārasaṃyutāḥ //
divya rūpadharāḥ prītyā vivāhaśśivayoriti

godāvarī ca yamunā brahmastrīrveṇikā tathā //
āyayau himaśailamvai vivāhaśśivayoriti

gaṃgā tu sumahāprītyā nānālaṃkārasaṃyutā //
divyarūpā yayau prītyā vivāhaśśivayoriti

narmadā tu mahāmodā rudrakanyā saridvarā //
mahāprītyā jagāmāśu vivāhaśśivayoriti

āgataistaistataḥ sarvaissarvato himabhūdharam//
saṃkulāsītpurī divyā sarvaśobhāsamanvitā

mahotsavā lasatketudhvajātoraṇakādhikā //
vitānavinivṛttārkā tathā nānālasatprabhā

himālayopi suprītyādareṇa vividhena ca //
teṣāṃ cakāra sanmānaṃ tāsāṃ caiva yathāyatham

sarvānnivāsayāmāsa susthāneṣu pṛthak pṛthak //
sāmagrībhiranekābhistoṣayāmāsa kṛtsnaśaḥ

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pāvatīkhaṇḍe lagnapatrasaṃpreṣaṇasāmagrīsaṃgrahaśailāgamanavarṇanaṃ nāma saptatriṃśo'dhyāyaḥ