Shiva Purana · Chapter 2.3.36

brahmovāca //
vasiṣṭhasya vacaḥ śrutvā sagaṇopi himālayaḥ //
vismito bhāryyayā śailānuvāca sa girīśvaraḥ

himālaya uvāca //
he mero girirāṭ sahya gandhamādana mandara //
maināka vindhya śailendrāssarve śṛṇuta madvacaḥ

vasiṣṭho hi vadatyevaṃ kiṃ me kāryyaṃ vicāryyate //
yathā tathā ca śaṃsadhvaṃ nirṇīya manasākhilam

brahmovāca //
tacchutvā vacanaṃ tasya sumerupramukhāśca te //
procurhimālayaṃ prītyā sunirṇīya mahīdharāḥ

śailā ūcuḥ //
adhunā kiṃ vimarśena kṛtaṃ kāryyaṃ tathaiva hi //
utpanneyaṃ mahābhāga devakāryārthameva hi

pradātavyā śivāyeti śivasyārthevatāriṇī //
anayārādhito rudro rudreṇa yadi bhāṣitā

brahmovāca//
etacchrutvā vacasteṣāmmervādīnāṃ himācalaḥ //
suprasannatarobhūdvai jahāsa girijā hṛdi

arundhatī ca tāṃ menāṃ bodhayāmāsa kāraṇāt //
nānāvākyasamūhenetihāsairvividhairapi

atha sā menakā śailapatnī buddhvā prasannadhīḥ //
munīnarundhatīṃ śailaṃ bhojayitvā bubhoja ca

atha śailavaro jñānī susaṃsevya munīṃśca tām //
uvāca sāñjaliḥ prītyā prasannātmāgatabhramaḥ

himācala uvāca //
saptarṣayo mahābhāgā vacaḥ śṛṇuta māmakam //
vismayo me gatassarvaśśivayoścaritaṃ śrutam

/
madīyaṃ ca śarīramvai patnī menā sutāssutā //
ṛddhissiddhiśca cānyadvai śivasyaiva na cānyathā

// brahmovāca //
ityuktvā sa tadā putrīṃ dṛṣṭvā tatsādaraṃ ca tām //
bhūṣayitvā tadaṅgāni ṛṣyutsaṃge nyaveśayet

uvāca ca punaḥ prītyā śailarāja ṛṣīṃstadā///
ayaṃ bhāgo mayā tasmai dātavya iti niścitam

// ṛṣaya ūcuḥ //
śaṃkaro bhikṣukastetha svayaṃ dātā bhavān gire //
bhaikṣyañca pārvatī devī kimataḥ paramuttamam

himavan śikharāṇānte yaddhetossadṛśī gatiḥ //
dhanyastvaṃ sarvaśailānāmadhipassarvato varaḥ

// brahmovāca //
evamuktvā tu kanyāyai munayo vimalāśayāḥ //
āśiṣaṃ dattavantaste śivāya sukhadā bhava

spṛṣṭvā kareṇa tāṃ tatra kalyāṇaṃ te bhaviṣyati //
śuklapakṣe yathā candro varddhantāṃ tvadguṇāstathā

ityuktvā munayassarve dattvā te giraye mudā //
puṣpāṇi phalayuktāni pratyayaṃ cakrire tadā

arundhatī tadā tatra menāṃ sā susukhī mudā //
guṇaiśca lobhayāmāsa śivasya paramā satī

haridrākuṃkumaiśśailaśmaśrūṇi pratyamārjayat //
laukikācāramādhāya maṃgalāyanamuttamam

tataśca te caturthehni saṃdhāryya lagnamuttamam //
parasparaṃ ca santuṣya saṃjagmuśśivasannidhim

tatra gatvā śivaṃ natvā stutvā vivi dhasūktibhiḥ //
ūcuḥ sarve vasiṣṭhādyā munayaḥ parameśvaram

ṛṣaya ūcuḥ //
devadeva mahādeva parameśa mahāprabho //
śṛṇvasmadvacanaṃ prītyā yatkṛtaṃ sevakaistava

bodhito girirājaśca menā vividhasūktibhiḥ //
setihāsaṃ maheśāna prabuddhosau na saṃśayaḥ

vākyadattā girīndreṇa pārvatī te hi nānyathā //
udvāhāya pragaccha tvaṃ gaṇairdevaiśca saṃyutaḥ

gaccha śīghraṃ mahādeva himācalagṛhaṃ prabho //
vivāhaya yathā rītiḥ pārvatīmātmajanmane

// brahmovāca //
tacchrutvā vacanaṃ teṣāṃ laukikācāratatparaḥ//
prahṛṣṭātmā maheśānaḥ prahasyedamuvāca saḥ

maheśa uvāca //
vivāho hi mahābhāgā na dṛṣṭo na śruto mayā //
yathā purā bhavadbhistadvidhiḥ procyo viśeṣataḥ

// brahmovāca //
tadākarṇya maheśasya laukikaṃ vacanaṃ śubham //
pratyūcuḥ prahasantaste devadevaṃ sadāśivam

ṛṣaya ūcuḥ //
viṣṇumāhūya vai śīghraṃ sasamājaṃ viśeṣataḥ //
brahmāṇaṃ sasutaṃ prītyā tathā devaṃ śatakratum

tathā ṛṣigaṇānsarvān yakṣagandharvakinnarān //
siddhān vidyādharāṃścaiva tathā caivāpsarogaṇān

etāṃścānyānprabho sarvānānaya sveha sādaram //
sarvaṃ saṃsādhayiṣyanti tvatkāryyaṃ te na saṃśayaḥ

brahmovāca //
ityuktvā sapta ṛṣayastadājñāṃ prāpya te mudā //
svadhāma prayayussarve śaṃsantaḥ śaṅkarīṃ gatim

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṃḍe saptaṛṣivacanaṃ nāma ṣaṭtriṃśo'dhyāyaḥ