શિવ પુરાણ · અધ્યાય 2.3.36

બ્રહ્મોવાચ ॥
વસિષ્ઠસ્ય વચઃ શ્રુત્વા સગણોપિ હિમાલયઃ ॥
વિસ્મિતો ભાર્ય્યયા શૈલાનુવાચ સ ગિરીશ્વરઃ

હિમાલય ઉવાચ ॥
હે મેરો ગિરિરાટ્ સહ્ય ગન્ધમાદન મન્દર ॥
મૈનાક વિન્ધ્ય શૈલેન્દ્રાસ્સર્વે શૃણુત મદ્વચઃ

વસિષ્ઠો હિ વદત્યેવં કિં મે કાર્ય્યં વિચાર્ય્યતે ॥
યથા તથા ચ શંસધ્વં નિર્ણીય મનસાખિલમ્

બ્રહ્મોવાચ ॥
તચ્છુત્વા વચનં તસ્ય સુમેરુપ્રમુખાશ્ચ તે ॥
પ્રોચુર્હિમાલયં પ્રીત્યા સુનિર્ણીય મહીધરાઃ

શૈલા ઊચુઃ ॥
અધુના કિં વિમર્શેન કૃતં કાર્ય્યં તથૈવ હિ ॥
ઉત્પન્નેયં મહાભાગ દેવકાર્યાર્થમેવ હિ

પ્રદાતવ્યા શિવાયેતિ શિવસ્યાર્થેવતારિણી ॥
અનયારાધિતો રુદ્રો રુદ્રેણ યદિ ભાષિતા

બ્રહ્મોવાચ॥
એતચ્છ્રુત્વા વચસ્તેષામ્મેર્વાદીનાં હિમાચલઃ ॥
સુપ્રસન્નતરોભૂદ્વૈ જહાસ ગિરિજા હૃદિ

અરુન્ધતી ચ તાં મેનાં બોધયામાસ કારણાત્ ॥
નાનાવાક્યસમૂહેનેતિહાસૈર્વિવિધૈરપિ

અથ સા મેનકા શૈલપત્ની બુદ્ધ્વા પ્રસન્નધીઃ ॥
મુનીનરુન્ધતીં શૈલં ભોજયિત્વા બુભોજ ચ

અથ શૈલવરો જ્ઞાની સુસંસેવ્ય મુનીંશ્ચ તામ્ ॥
ઉવાચ સાઞ્જલિઃ પ્રીત્યા પ્રસન્નાત્માગતભ્રમઃ

હિમાચલ ઉવાચ ॥
સપ્તર્ષયો મહાભાગા વચઃ શૃણુત મામકમ્ ॥
વિસ્મયો મે ગતસ્સર્વશ્શિવયોશ્ચરિતં શ્રુતમ્

।
મદીયં ચ શરીરમ્વૈ પત્ની મેના સુતાસ્સુતા ॥
ઋદ્ધિસ્સિદ્ધિશ્ચ ચાન્યદ્વૈ શિવસ્યૈવ ન ચાન્યથા

॥ બ્રહ્મોવાચ ॥
ઇત્યુક્ત્વા સ તદા પુત્રીં દૃષ્ટ્વા તત્સાદરં ચ તામ્ ॥
ભૂષયિત્વા તદઙ્ગાનિ ઋષ્યુત્સંગે ન્યવેશયેત્

ઉવાચ ચ પુનઃ પ્રીત્યા શૈલરાજ ઋષીંસ્તદા॥।
અયં ભાગો મયા તસ્મૈ દાતવ્ય ઇતિ નિશ્ચિતમ્

॥ ઋષય ઊચુઃ ॥
શંકરો ભિક્ષુકસ્તેથ સ્વયં દાતા ભવાન્ ગિરે ॥
ભૈક્ષ્યઞ્ચ પાર્વતી દેવી કિમતઃ પરમુત્તમમ્

હિમવન્ શિખરાણાન્તે યદ્ધેતોસ્સદૃશી ગતિઃ ॥
ધન્યસ્ત્વં સર્વશૈલાનામધિપસ્સર્વતો વરઃ

॥ બ્રહ્મોવાચ ॥
એવમુક્ત્વા તુ કન્યાયૈ મુનયો વિમલાશયાઃ ॥
આશિષં દત્તવન્તસ્તે શિવાય સુખદા ભવ

સ્પૃષ્ટ્વા કરેણ તાં તત્ર કલ્યાણં તે ભવિષ્યતિ ॥
શુક્લપક્ષે યથા ચન્દ્રો વર્દ્ધન્તાં ત્વદ્ગુણાસ્તથા

ઇત્યુક્ત્વા મુનયસ્સર્વે દત્ત્વા તે ગિરયે મુદા ॥
પુષ્પાણિ ફલયુક્તાનિ પ્રત્યયં ચક્રિરે તદા

અરુન્ધતી તદા તત્ર મેનાં સા સુસુખી મુદા ॥
ગુણૈશ્ચ લોભયામાસ શિવસ્ય પરમા સતી

હરિદ્રાકુંકુમૈશ્શૈલશ્મશ્રૂણિ પ્રત્યમાર્જયત્ ॥
લૌકિકાચારમાધાય મંગલાયનમુત્તમમ્

તતશ્ચ તે ચતુર્થેહ્નિ સંધાર્ય્ય લગ્નમુત્તમમ્ ॥
પરસ્પરં ચ સન્તુષ્ય સંજગ્મુશ્શિવસન્નિધિમ્

તત્ર ગત્વા શિવં નત્વા સ્તુત્વા વિવિ ધસૂક્તિભિઃ ॥
ઊચુઃ સર્વે વસિષ્ઠાદ્યા મુનયઃ પરમેશ્વરમ્

ઋષય ઊચુઃ ॥
દેવદેવ મહાદેવ પરમેશ મહાપ્રભો ॥
શૃણ્વસ્મદ્વચનં પ્રીત્યા યત્કૃતં સેવકૈસ્તવ

બોધિતો ગિરિરાજશ્ચ મેના વિવિધસૂક્તિભિઃ ॥
સેતિહાસં મહેશાન પ્રબુદ્ધોસૌ ન સંશયઃ

વાક્યદત્તા ગિરીન્દ્રેણ પાર્વતી તે હિ નાન્યથા ॥
ઉદ્વાહાય પ્રગચ્છ ત્વં ગણૈર્દેવૈશ્ચ સંયુતઃ

ગચ્છ શીઘ્રં મહાદેવ હિમાચલગૃહં પ્રભો ॥
વિવાહય યથા રીતિઃ પાર્વતીમાત્મજન્મને

॥ બ્રહ્મોવાચ ॥
તચ્છ્રુત્વા વચનં તેષાં લૌકિકાચારતત્પરઃ॥
પ્રહૃષ્ટાત્મા મહેશાનઃ પ્રહસ્યેદમુવાચ સઃ

મહેશ ઉવાચ ॥
વિવાહો હિ મહાભાગા ન દૃષ્ટો ન શ્રુતો મયા ॥
યથા પુરા ભવદ્ભિસ્તદ્વિધિઃ પ્રોચ્યો વિશેષતઃ

॥ બ્રહ્મોવાચ ॥
તદાકર્ણ્ય મહેશસ્ય લૌકિકં વચનં શુભમ્ ॥
પ્રત્યૂચુઃ પ્રહસન્તસ્તે દેવદેવં સદાશિવમ્

ઋષય ઊચુઃ ॥
વિષ્ણુમાહૂય વૈ શીઘ્રં સસમાજં વિશેષતઃ ॥
બ્રહ્માણં સસુતં પ્રીત્યા તથા દેવં શતક્રતુમ્

તથા ઋષિગણાન્સર્વાન્ યક્ષગન્ધર્વકિન્નરાન્ ॥
સિદ્ધાન્ વિદ્યાધરાંશ્ચૈવ તથા ચૈવાપ્સરોગણાન્

એતાંશ્ચાન્યાન્પ્રભો સર્વાનાનય સ્વેહ સાદરમ્ ॥
સર્વં સંસાધયિષ્યન્તિ ત્વત્કાર્ય્યં તે ન સંશયઃ

બ્રહ્મોવાચ ॥
ઇત્યુક્ત્વા સપ્ત ઋષયસ્તદાજ્ઞાં પ્રાપ્ય તે મુદા ॥
સ્વધામ પ્રયયુસ્સર્વે શંસન્તઃ શઙ્કરીં ગતિમ્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં તૃતીયે પાર્વતીખંડે સપ્તઋષિવચનં નામ ષટ્ત્રિંશોઽધ્યાયઃ