Shiva Purana · Chapter 2.3.16

// brahmovāca //
atha te nirjarāssarve supraṇamya prajeśvaram //
tuṣṭuvuḥ parayā bhaktyā tārakeṇa prapīḍitāḥ

ahaṃ śrutvāmaranutiṃ yathārthāṃ hṛdayaṃgamā//
suprasannataro bhūtvā pratyavocaṃ divaukasaḥ

svāgataṃ svādhikārā vai nirvighnāḥ saṃti vastutaḥ //
kimarthamāgatā yūyamatra sarve vadaṃtu me

iti śrutvā vaco me te natvā sarve divaukasaḥ //
māmūcurnatakā dīnāstārakeṇa prapīḍitāḥ

devā ūcuḥ //
lokeśa tārako daityo vareṇa tava darpita //
nirasyāsmānhaṭhātsthānānyagrahīnno balātsvayam

bhavataḥ kimu na jñātaṃ duḥkhaṃ yannaḥ upasthitam //
tadduḥkhaṃ nāśaya kṣipraṃ vayaṃ te śaraṇaṃ gatāḥ

aharniśaṃ bādhatesmānyatra tatrāsthitānsa vai //
palāyamānāḥ paśyāmo yatra tatrāpi tārakam

tārakānnaśca yadduḥkhaṃ saṃbhūtaṃ sakaleśvara //
tena sarve vayaṃ tāta pīḍitā vikalā ati

agniryamotha varuṇo nirṛtirvāyureva ca// //
anye dikpatayaścāpi sarve yadvaśagāminaḥ

sarve manuṣyadharmāṇassarveḥ parikarairyutāḥ//
sevaṃte taṃ mahādaityaṃ na svataṃtrāḥ kadācana

evaṃ tenārditā devā vaśagāstasya sarvadā //
tadicchākāryyaniratāssarve tasyānujīvinaḥ

yāvatyo vanitāssarvā ye cāpyapsarasāṃ gaṇāḥ//
sarvāṃstānagrahīddaityastārako'sau mahābalī

na yajñāssaṃpravartate na tapasyaṃti tāpasāḥ//
dānadharmādikaṃ kiṃcinna lokeṣu pravarttate

tasya senāpatiḥ krauṃco mahāpāpyasti dānavaḥ //
sa pātālatalaṃ gatvā bādhate tvaniśaṃ prajāḥ

tena nastārakeṇedaṃ sakalaṃ bhuvanatrayam //
hṛtaṃ haṭhājjagaddhātaḥ pāpenākaruṇātmanā

vayaṃ ca tatra yāsyāmo yatsthānaṃ tvaṃ vinirdiśeḥ //
svasthāstadvāritāstena lokanāthasurāriṇā

tvaṃ no gatiśca śāstā ca dhātā trātā tvameva hi //
vayaṃ sarve tārakākhyavahnau dagdhāssuvihvalāḥ

tena krūrā upāya naḥ sarve hatabalāḥ kṛtāḥ//
vikāre sāṃnipāte vā vīryavaṃtyauṣadhāni ca

yatrāsmākaṃ jayāśā hi haricakre sudarśane //
utkuṃṭhitamabhūttasya kaṃṭhe puṣpamivārpitam

brahmovāca //
ityetadvacanaṃ śrutvā nirjarāṇāmahaṃ mune //
pratyavocaṃ surānsarvāṃstatkālasadṛśaṃ vacaḥ

brahmovāca //
mamaiva vacasā daityastārakākhyassamedhitaḥ//
na mattastasya hananaṃ yujyate hi divaukasaḥ

tato naiva vadho yogyo yato vṛddhimupāgataḥ //
viṣa vṛkṣo'pi saṃvardhya svayaṃ chettumasāṃpratam

yuṣmākaṃ cākhilaṃ kāryaṃ kartuṃ yogyo hi śaṃkaraḥ//
kintu svayaṃ na śakto hi pratikartuṃ praco ditaḥ

tārakākhyastu pāpena svayameṣyati saṃkṣayam //
yathā yūyaṃ saṃvidadhvamupadeśakarastvaham

na mayā tārako vadhyo hariṇāpi hareṇa ca//
nānyenāpi surairvāpi madvarātsatyamucyate

śivavīryyasamutpanno yadi syāttanayassurāḥ//
sa eva tārakākhyasya haṃtā daityasya nāparaḥ

yamupāyamahaṃ vacmi taṃ kurudhvaṃ surottamāḥ //
mahādevaprasādena siddhimeṣyati sa dhuvam

satī dākṣā yiṇī pūrvaṃ tyaktadehā tu yābhavat //
sotpannā menakāgarbhātsā kathā viditā hi vaḥ

tasyā avaśyaṃ giriśaḥ kariṣyati kara graham //
tatkurudhvamupāyaṃ ca tathāpi tridivaukasaḥ

tathā vidadhvaṃ sutarāṃ tasyāṃ tu pariyatnataḥ //
pārvatyāṃ menakājāyāṃ retaḥ pratinipātane

tamūrddhvaretasaṃ śaṃbhuṃ saiva pracyutaretasam //
kartuṃ samarthā nānyāsti tathā kāpyabalā balāt

sā sutā girirājasya sāṃprataṃ prauḍhayauvanā //
tapasyate himagirau nityaṃ saṃsevate haram

vākyāddhimavataḥ kālīṃ svapiturhaṭhataśśivā //
sakhībhyāṃ sevate sārddhaṃ dhyānasthaṃ parameśvaram

tāmagrato'rccamānāṃ vai trailokye varavarṇinīm //
dhyānasakto maheśo hi manasāpi na hīyate

bhāryyāṃ samīheta yathā sa kālīṃ candraśekharaḥ //
tathā vidhadhvaṃ tridaśā na cirādeva yatnataḥ

sthānaṃ gatvātha daityasya tamahaṃ tārakaṃ tataḥ //
nivārayiṣye kuhaṭhātsvasthānaṃ gacchatāmarāḥ

ityuktvāhaṃ surānśīghraṃ tārakākhyāsurasya vai //
upasaṃgamya suprītyā samābhāṣyedamabravam

// brahmovāca //
tejosāramidaṃ svargaṃ rājyaṃ tvaṃ paripāsi naḥ //
yadarthaṃ sutapastaptaṃ vāñchasi tvaṃ tato'dhikam

varaścāpyavaro datto na mayā svargarājyatā //
tasmātsvargaṃ parityajya kṣitau rājyaṃ samācara

devayogyāni tatraiva kāryyāṇi nikhilānyapi //
bhaviṣyatyarasuraśreṣṭha nātra kāryyā vicāraṇā

ityuktvāhaṃ ca saṃbodhyāsuraṃ taṃ sakaleśvaraḥ //
smṛtvā śivaṃ ca saśivaṃ tatrāṃtardhānamāgataḥ //४ १ //
tārako'pi parityajya svargaṃ kṣitimathābhyagāt//
śoṇitākhya pure sthitvā sarvarājyaṃ cakāra saḥ

devāssarve'pi tacchutvā madvākyaṃ supraṇamya mām //
śakrasthānaṃ yayuḥ prītyā śakreṇa susa māhitāḥ

tatra gatvā militvā ca vicāryya ca parasparam //
te sarve marutaḥ prītyā maghavaṃtaṃ vaco'bruvan

devā ūcuḥ // //
śambhoryyathā śivāyāṃ vai rucijāyeta kāmataḥ //
maghavaṃste prakartavyaṃ brahmoktaṃ sarvameva tat

//
brahmovāca//
ityevaṃ sarvavṛttāṃtaṃ vinivedya sureśvaram //
jagmuste sarvato devāḥ svaṃ svaṃ sthānaṃ mudānvitāḥ

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍa devasāṃtvanavarṇanaṃ nāma ṣoḍaśo'dhyāyaḥ