Shiva Purana · Chapter 2.2.23

brahmovāca //
evaṃ kṛtvā vihāraṃ vai śaṃkareṇa ca sā satī //
saṃtuṣṭā sābhavaccāti virāgā samajāyata

ekasmindivase devī satī rahasi saṃgatā //
śivaṃ praṇamya sadbhaktyā nyasyoccaiḥ sukṛtāṃjaliḥ

suprasannaṃ prabhuṃ natvā sā dakṣatanayā satī //
uvāca sāṃjalirbhaktyā vinayāvanatā tataḥ

satyuvāca //
devadeva mahādeva karuṇā sāgara prabho //
dīnoddhara mahāyogin kṛpāṃ kuru mamopari

tvaṃ paraḥ puruṣassvāmī rajassattvatamaḥ paraḥ //
nirguṇassaguṇassākṣī nirvikārī mahāprabhuḥ

dhanyāhaṃ te priyā jātā kāminī suvihāriṇī //
jātastvaṃ me patissvāminbhaktivātsalyato hara

kṛto bahusamā nātha vihāraḥ paramastvayā //
saṃtuṣṭāhaṃ maheśāna nivṛttaṃ me manastataḥ

jñātumicchāmi deveśa paraṃ tattvaṃ sukhāvaham //
yaṃ na saṃsāraduḥkhādvai tarejjīvoṃjasā hara

yatkṛtvā viṣayī jīvassa labhetparamaṃ padam //
saṃsārī na bhavennātha tattvaṃ vada kṛpāṃ kuru

brahmovāca//
ityapṛcchatsma sadbhaktyā śaṃkaraṃ sā satī mune //
ādiśaktirmaheśānī jīvoddhārāya kevalam //2.2.23.१०/
ākarṇya tacchivaḥ svāmī svecchayopāttavigrahaḥ //
avocatparamaprītassatīṃ yogaviraktadhīḥ

// śiva uvāca //
śṛṇu devi pravakṣyāmi dākṣāyaṇi maheśvari //
paraṃ tattvaṃ tadevānuśayī mukto bhavedyataḥ // १२ /
paratattvaṃ vijānīhi vijñānaṃ parameśvarī //
dvitīyaṃ smaraṇaṃ yatra nāhaṃ brahmeti śuddhadhīḥ

taddurlabhaṃ trilokesmiṃstajjñātā viralaḥ priye //
yādṛśo yassadāsohaṃ brahmasākṣātparātparaḥ

tanmātā mama bhaktiśca bhuktimuktiphalapradā //
sulabhā matprasādāddhi navadhā sā prakīrtitā

bhaktau jñāne na bhedo hi tatkartussarvadā sukham //
vijñānaṃ na bhavatyeva sati bhaktivirodhinaḥ

bhaktyā hīnassadāhaṃ vai tatprabhāvādgṛheṣvapi //
nīcānāṃ jātihīnānāṃ yāmi devi na saṃśayaḥ

sā bhaktirdvividhā devi saguṇā nirguṇā matā //
vaidhī svābhāvikī yā yā varā sā tvavarā smṛtā

naiṣṭhikyā naiṣṭhikī bhedāddvividhe dvividhe hi te //
ṣaḍvidhā naiṣṭhikī jñeyā dvitīyaikavidhā smṛtā

vihitāvihitābhedāttāmanekāṃ vidurbudhāḥ //
tayorbahuvidhatvācca tattvaṃ tvanyatra varṇitam

te navāṃge ubhe jñeye varṇite munibhiḥ priye //
varṇayāmi navāṃgāni premataḥ śṛṇu dakṣaje

śravaṇaṃ kīrtanaṃ caiva smaraṇaṃ sevanaṃ tathā //
dāsyaṃ tathārcanaṃ devi vaṃdanaṃ mama sarvadā

sakhyamātmārpaṇaṃ ceti navāṃgāni vidurbudhāḥ //
upāṃgāni śive tasyā bahūni kathitāni vai

śṛṇu devi navāṃgānāṃ lakṣaṇāni pṛthakpṛthak //
mama bhaktermano dattvā bhakti muktipradāni hi

kathādernityasammānaṃ kurvandehādibhirmudā //
sthirāsanena tatpānaṃ yattacchravaṇamucyate

hṛdākāśena saṃpaśyañ janmakarmāṇi vai mama //
prītyācoccāraṇaṃ teṣāmetatkīrtanamucyate

vyāpakaṃ devi māṃ dṛṣṭvā nityaṃ sarvatra sarvadā //
nirbhayatvaṃ sadā loke smaraṇaṃ tadudāhṛtam

aruṇodayamārabhya sevākāleṃcitā hṛdā //
nirbhayatvaṃ sadā loke smaraṇaṃ tadudāhṛtam

sadā sevyānukūlyena sevanaṃ taddhi gogaṇaiḥ //
hṛdayāmṛtabhogena priyaṃ dāsyamudāhṛtam

sadā bhṛtyānukūlyena vidhinā me parātmane //
arpaṇaṃ ṣoḍaśānāṃ vai pādyādīnāṃ tadarcanam

maṃtroccāraṇadhyānābhyāṃ manasā vacasā kramāt //
yadaṣṭāṃgena bhūsparśaṃ tadvai vaṃdanamucyate

maṃgalāmaṃgalaṃ yadyatkarotītīśvaro hi me //
sarvaṃ tanmaṃgalāyeti viśvāsaḥ sakhyalakṣaṇam

kṛtvā dehādikaṃ tasya prītyai sarvaṃ tadarpaṇam//
nirvāhāya ca śūnyatvaṃ yattadātmasamarpaṇam

navāṃgānīti madbhakterbhuktimuktipradāni ca //
mama priyāṇi cātīva jñānotpattikarāṇi ca

upāṃgāni ca madbhakterbahūni kathitāni vai //
bilvādisevanādīni samū hyāni vicārataḥ

itthaṃ sāṃgopāṃgabhaktirmama sarvottamā priye //
jñānavairāgyajananī muktidāsī virājate

sarvakarmaphalotpattissarvadā tvatsamapriyā //
yaccitte sā sthitā nityaṃ sarvadā soti matpriyaḥ

trailokye bhaktisadṛśaḥ paṃthā nāsti sukhāvahaḥ //
caturyugeṣu deveśi kalau tu suviśeṣataḥ

kalau tu jñānavairāgo vṛddharūpau nirutsavau //
grāhakābhāvato devi jātau jarjara tāmati

kalau pratyakṣaphaladā bhaktissarvayugeṣvapi //
tatprabhāvādahaṃ nityaṃ tadvaśo nātra saṃśayaḥ

yo bhaktimānpumām̐lloke sadāhaṃ tatsahāyakṛt //
vighnahartā ripustasya daṃḍyo nātra ca saṃśayaḥ

bhaktahetorahaṃ devi kālaṃ krodhapariplutaḥ
adahaṃ vahninā netrabhavena nijarakṣakaḥ

bhaktahetorahaṃ devi ravyuparyabhavaṃ kila/
atikrodhānvitaḥ śūlaṃ gṛhītvā'nvajayaṃ purā

bhaktahetorahaṃ devi rāvaṇaṃ sagaṇaṃ krudhā //
tyajati sma kṛto naiva pakṣapāto hi tasya vai

bhaktahetorahaṃ devi vyāsaṃ hi kumatigraham //
kāśyā nyasārayat krodhāddaṇḍayitvā ca naṃdinā

kiṃ bahūktena deveśi bhaktyādhīnassadā hyaham //
tatkartuṃ puruṣasyātivaśago nātra saṃśayaḥ

brahmovāca //
itthamākarṇya bhaktestu mahattvaṃ dakṣajā satī //
jaharṣātīva manasi praṇanāma śivaṃ mudā

punaḥ papraccha sadbhaktyā tatkāṇḍaviṣayaṃ mune //
śāstraṃ sukhakaraṃ loke jīvoddhāraparāyaṇam

sayaṃtramaṃtraśāstraṃ ca tanmāhātmyaṃ viśeṣataḥ //
anyāni dharmavastūni jīvoddhārakarāṇi hi

śaṃkaropi tadākarṇya satīṃ praśnaṃ prahṛṣṭadhīḥ //
varṇayāmāsa suprītyā jīvoddhārāya kṛtsnaśaḥ

tatra śāstraṃ sayaṃtraṃ hi sapaṃcāṅgaṃ maheśvaraḥ //
babhāṣe mahimānaṃ ca tattaddaivavarasya vai

setihāsakathaṃ teṣāṃ bhaktamāhātmyameva ca //
savarṇāśramadharmāṃśca nṛpadharmān munīśvara

sutastrīdharmamāhātmyaṃ varṇāśramamanaśvaram //
vaidyaśāstraṃ tathā jyotiśśāstraṃ jīvasukhāvaham

sāmudrikaṃ paraṃ śāstramanyacchāstrāṇi bhūriśaḥ //
kṛpāṃ kṛtvā mahe śāno varṇayāmāsa tattvataḥ

itthaṃ trilokasukhadau sarvajñau ca satīśivau //
lokopakārakaraṇadhṛtasadguṇavigrahau

cikrīḍāte bahuvidhe kailāse himavadgirau //
anyasthaleṣu ca tadā parabrahmasvarūpiṇau

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe bhaktiprabhāvavarṇanaṃ nāma trayoviṃśo'dhyāyaḥ