Shiva Purana · Chapter 2.2.2

sūta uvāca //
ityākarṇya vacastasya nemiṣāraṇyavāsinaḥ //
papraccha ca muniśreṣṭhaḥ kathāṃ pāpapraṇāśinīm

nārada uvāca //
vidhevidhe mahā bhāga kathāṃ śaṃbhośśubhāvahām //
śṛṇvan bhavanmukhāṃbhojānna tṛptosmi mahāprabho

ataḥ kathaya tatsarvaṃ śivasya caritaṃ śubham //
satīkīrtyanvitaṃ divyaṃ śrotumicchāmi viśvakṛt

satī hi kathamutpannā dakṣadāreṣu śobhanā //
kathaṃ haro manaścakre dārāharaṇakarmaṇi

kathaṃ vā dakṣakopena tyaktadehā satī purā //
himavattanayā jātā bhūyo vākāśamāgatā

pārvatyāśca tapo'tyugraṃ vivāhaśca kathaṃ tvabhūt //
kathamarddhaśarīrasthā babhūva smaranāśinaḥ

etatsarvaṃ samācakṣva vistareṇa mahāmate //
nānyosti saṃśayacchettā tvatsamo na bhaviṣyati

brahmovāca //
śṛṇu tvaṃ ca mune sarvaṃ satīśivayaśaśśubham //
pāvanaṃ paramaṃ divyaṃ guhyādguhyatamaṃ param

etacchaṃbhuḥ purovāca bhaktavaryāya viṣṇave //
pṛṣṭastena mahābhaktyā paropakṛtaye mune //

tatassopi mayā pṛṣṭo viṣṇuśśaivavarassudhīḥ //
prītyā mahyaṃ samācakhyau vistarānmunisattama

ahaṃ tatkathayiṣyāmi kathāmetāṃ purātanīm //
śivāśivayaśoyuktāṃ sarvakāmaphalapradām

purā yadā śivo devo nirguṇo nirvikalpakaḥ //
arūpaśśaktirahitaścinmātrassadasatparaḥ

abhavatsaguṇassopi dvirūpaśśaktimānprabhuḥ //
somo divyākṛtirvipra nirvi kārī parātparaḥ

tasya vāmāṃgajo viṣṇurbrahmāhaṃ dakṣiṇāṃgajaḥ //
rudro hṛdayato jāto'bhavacca munisattama

sṛṣṭikartābhavaṃ brahmā viṣṇuḥ pālanakārakaḥ //
layakartā svayaṃ rudrastridhābhūtassadāśivaḥ

tamevāhaṃ samārādhya brahmā lokapitāmahaḥ//
prajā sasarja sarvāstāssurāsuranarādikāḥ

sṛṣṭvā prajāpatīn dakṣapramukhānsurasattamān //
amanyaṃ suprasannohaṃ nijaṃ sarvamahonnatam

marīcimatriṃ pulahaṃ pulastyāṃgirasau kratum //
vasiṣṭhaṃ nāradaṃ dakṣaṃ bhṛguṃ ceti mahāprabhūn

brahmāhaṃ mānasānputrānasarjaṃ ca yadā mune //
tadā manmanaso jātā cārurūpā varāṃganā

nāmnā saṃdhyā divakṣāṃtā sāyaṃ saṃdhyā japaṃtikā //
atīva sundarī subhrūrmunicetovimohinī

na tādṛśī devaloke na martye na rasātale //
kālatrayepi vai nārī sampūrṇaguṇaśālinī

dṛṣṭvāhaṃ tāṃ samutthāya cintayanhṛdi hṛdgatam//
dakṣādayaśca sraṣṭāro marīcyādyāśca matsutāḥ

evaṃ ciṃtayato me hi brahmaṇo munisattama //
mānasaḥ puruṣo maṃjurāvirbhūto mahādbhutaḥ

kāṃcanīkṛtajātābhaḥ pīnoraskassunāsikaḥ //
suvṛttorukaṭījaṃgho nīlavelitakesaraḥ

lagnabhrūyugalo lolaḥ pūrṇacandranibhānanaḥ //
kapāṭāyatasadvakṣo romarājīvarājitaḥ

abhramātaṃgakākāraḥ pīno nīlasuvāsakaḥ //
āraktapāṇinayanamukhapādakarodbhavaḥ

kṣīṇamadhyaścārudantaḥ pramattagajagaṃdhanaḥ//
praphullapadmapatrākṣaḥ kesaraghrāṇatarpaṇaḥ

kaṃbugrīvo mīnaketuḥ prāṃśurmakaravāhanaḥ //
paṃcapuṣpāyudho vegī puṣpakodaṃḍamaṃḍitaḥ

kāṃtaḥ kaṭākṣapātena bhrāmayannayanadvayam //
sugaṃdhimāruto tāta śṛṃgārarasasevitaḥ

taṃ vīkṣya puruṣaṃ sarve dakṣādyā matsutāśca te //
autsukyaṃ paramaṃ jagmurvismayāviṣṭamānasāḥ

abhavadvikṛtaṃ teṣāṃ matsutānāṃ mano drutam //
dhairyaṃ naivālabhattāta kāmākulitacetasām

māṃ sopi vedhasaṃ vīkṣya sraṣṭāraṃ jagatāṃ patim //
praṇamya puruṣaḥ prāha vinayānatakaṃdharaḥ

puruṣa uvāca //
kiṃ kariṣyāmyahaṃ karma brahmaṃstatra niyojaya//
mānyodya puruṣo yasmāducitaḥ śobhito vidhe

abhimānaṃ ca yogyaṃ ca sthānaṃ patnī ca yā mama //
tanme vada trilokeśa tvaṃ sraṣṭā jagatāṃ patiḥ

brahmovāca //
evaṃ tasya vacaḥ śrutvā puruṣasya mahātmanaḥ //
kṣaṇaṃ na kiṃcitprāvocatsa sraṣṭā cātivismitaḥ

ato manassusaṃyamya samyagutsṛjya vismayam //
avocatpuruṣaṃ brahmā tatkāmaṃ ca samāvahan

// brahmovāca // //
anena tvaṃ svarūpeṇa puṣpabāṇaiśca paṃcabhiḥ //
mohayan puruṣān strīśca kuru sṛṣṭiṃ sanātanīm

asmiñjīvāśca devādyāstrailokye sacarācare //
ete sarve bhaviṣyanti na kṣamāstyavalaṃbane

ahaṃ vā vāsudevo vā sthāṇurvā puruṣottamaḥ //
bhaviṣyāmastava vaśe kimanye prāṇadhārakāḥ

pracchannarūpo jaṃtūnāṃ praviśanhṛdayaṃ sadā //
sukhahetuḥ svayaṃ bhūtvā sṛṣṭiṃ kuru sanātanīm

tvatpuṣpabāṇasya sadā sukhalakṣyaṃ manodbhutam //
sarveṣāṃ prāṇināṃ nityaṃ sadā madakaro bhavān

iti te karma kathitaṃ sṛṣṭiprāvartakaṃ punaḥ //
nāmānyete vadiṣyaṃti sutā me tava tattvataḥ

brahmovāca //
ityuktvāhaṃ suraśreṣṭha svasutānāṃ mukhāni ca//
ālokya svāsane pādme propaviṣṭo'bhavaṃ kṣaṇam

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe kāmaprādurbhāvo nāma dvitīyo'dhyāyaḥ