Shiva Purana · Chapter 2.2.16

// brahmovāca //
iti stutiṃ ca haryādikṛtāmākarṇya śaṃkaraḥ //
babhūvātiprasanno hi vijahāsa ca sūtikṛt

brahmaviṣṇū tu dṛṣṭvā tau sastrīkau saṃgatau haraḥ //
yathocitaṃ samābhāṣya papracchāgamanaṃ tayoḥ

rudra uvāca//
hahara hāvadha devā munayaścādya nirbhayāḥ //
nijāgamanahetuṃ hi kathayasva sutattvataḥ

kimarthamāgatā yūyaṃ kiṃ kāryaṃ ceha vidyate //
tatsarvaṃ śrotumicchāmi bhavatstutyā prasannadhīḥ

// brahmovāca //
iti pṛṣṭe hareṇāhaṃ sarvalokapitāmahaḥ //
mune'vocaṃ mahādevaṃ viṣṇunā paricoditaḥ

devadeva mahādeva karuṇāsāgara prabho //
yadarthamāgatāvāvāṃ tacchṛṇu tvaṃ surarṣibhiḥ

viśeṣatastavaivārthamāgatā vṛpabhadhvaja //
sahārthinassadāyogyamanyathā na jagadbhavet

kecidbhaviṣyaṃtyasurā mama vadhyā maheśvara //
harervadhyāstathā kecidbhavaṃtaścāpi kecana

kecittvadvīryajātasya tanayasya mahāprabho //
māyāvadhyāḥ prabho kecidbhaviṣyaṃtyasurāssadā

tavaiva kṛpayā śaṃbhossurāṇāṃ sukhamuttamam//
nāśayitvā'surān ghorāñjagatsvāsthyaṃ sadābhayam //2.2.16.१ ० //
yogayukte tvayi sadā rāga dveṣavivarjite //
dayāpātraikanirate na vadhyā hyathavā tava // १ १//
arādhiteṣu teṣvīśa kathaṃ sṛṣṭistathā sthitiḥ //
ataśca bhavitā yuktaṃ nityaṃnityaṃ vṛṣadhvaja

sṛṣṭisthityaṃtakarmāṇi na kāryāṇi yadā tadā //
śarīrabhedaścāsmākaṃ māyāyāśca na yujyate //१ ३//
ekasvarūpā hi vayaṃ bhinnāḥ kāryasya bhedataḥ //
kāryabhedo na siddhaścedrūpabhedā'prayojanaḥ

eka eva tridhā bhinnaḥ paramātmā maheśvaraḥ //
māyāsvākāraṇādeva svataṃtro līlayā prabhuḥ

vāmāṅgajo haristasya dakṣiṇāṃgabhavo hyaham //
śivasya hṛdayājjātastvaṃ hi pūrṇatanuśśivaḥ

itthaṃ vayaṃ tridhā bhūtāḥ prabhābhinnasvarūpiṇaḥ //
śivāśivasutāstattvaṃ hṛdā viddhi sanātana

ahaṃ viṣṇuśca sastrīkau saṃjātau kāryahetutaḥ //
lokakāryakarau prītyā tava śāsanataḥ prabho

tasmādviśvahitārthāya surāṇāṃ sukhahetave //
parigṛhṇīṣva bhāryārthe rāmāmekāṃ suśobhanām

anyacchṛṇu maheśāna pūrvavṛttaṃ smṛtaṃ mayā //
yannau puraḥpurā proktaṃ tvayaiva śivarūpiṇā

madrūpaṃ paramaṃ brahmannīdṛśaṃ bhavadaṃgataḥ //
prakaṭī bhavitā loke nāmnā rudraḥ prakīrtitaḥ

sṛṣṭikartā'bhavadbrahmā hariḥ pālanakārakaḥ //
layakārī bhaviṣyāmi rudrarūpo guṇākṛtiḥ

striyaṃ vivāhya lokasya kariṣye kāryamuttamam //
iti saṃsmṛtya svaproktaṃ pūrṇaṃ kuru nijaṃ paṇam

nideśastava ca svāminnahaṃ sṛṣṭikaro hariḥ //
pālako layahetustvamāvirbhūtassvayaṃ śivaḥ

tvāṃ vinā na samarthau hi āvāṃ ca svasvakarmaṇi //
lokakāryarato tasmādekāṃ gṛhṇīṣva kāminīm

yathā padmālayā viṣṇossāvitrī ca yathā mama //
tathā sahacarīṃ śaṃbho kāṃtāṃ gṛhṇīṣva saṃprati

brahmovāca //
iti śrutvā vaco me hi brahmaṇaḥ purato hareḥ //
sa māṃ jagāda lokeśaḥ smerānanamukho haraḥ

īśvara uvāca //
he brahman he hare me hi yuvāṃ priyatarau sadā //
dṛṣṭvā tvāṃ ca mamānaṃdo bhavatyatitarāṃ khalu

yuvāṃ suraviśiṣṭau hi tribhava svāminau kila //
kathanaṃ vāṃ gariṣṭheti bhavakāryaratātmanoḥ

ucitaṃ na suraśreṣṭhau vivāhakaraṇaṃ mama //
taporataviraktasya sadā viditayoginaḥ

yo nivṛttisumārgasthaḥ svātmārāmo niraṃjanaḥ //
avadhūtatanurjñānī svadraṣṭā kāmavarjitaḥ

avikārī hyabhogī ca sadāśuciramaṃgalaḥ //
tasya prayojanaṃ loke kāminyā kiṃ vadādhunā

kevalaṃ yogalagnasya mamānaṃdassadāsti vai //
jñānahīnastu puruṣo manute bahu kāmakam

vivāhakaraṇaṃ loke vijñeyaṃ parabaṃdhanam //
tasmāttasya rucirno me satyaṃ satyaṃ vadāmyaham

na svārthaṃ me pravṛttirhi samyaksvārthaviciṃtanāt //
tathāpi tatkariṣyāmi bhavaduktaṃ jagaddhitam

mattvā vaco gariṣṭhaṃ vā niyoktiparipūrttaye //
kariṣyāmi vivāhaṃ vai bhaktavaśyassadā hyaham

paraṃtu yādṛśīṃ kāṃtāṃ grahīṣyāmi tathāpaṇam //
tacchṛṇuṣva hare brahman yuktameva vaco mama

yā me tejassamarthā hi grahītuṃ syādvibhāgaśaḥ //
tāṃ nideśaya bhāryārthe yoginīṃ kāmarūpiṇīm

yogayukte mayi tathā yoginyeva bhaviṣyati //
kāmāsakte mayi tathā kāminyeva bhaviṣyati

yamakṣaraṃ vedavido nigadaṃti manīṣiṇaḥ //
jyotīrūpaṃ śivaṃ te ca ciṃtayiṣye sanātanam

tacciṃtāyāṃ yadā sakto brahman gacchāmi bhāvinīm //
tatra yā vighnajananī na bhavitrī hatāstu me

tvaṃ vā viṣṇurahaṃ vāpi śivasya brahmarūpiṇaḥ //
aṃśabhūtā mahābhāgā yogyaṃ tadanuciṃtanam

tacciṃtayā vinodvāhaṃ sthāsyāmi kamalāsana //
tasmājjāyāṃ prādiśa tvaṃ matkarmānugatāṃ sadā

tatrāpyekaṃ paṇaṃ me tvaṃ vṛṇu brahmam̐śca māṃ prati //
aviśvāso madukte cenmayā tyaktā bhaviṣyati

brahmovāca //
iti tasya vacaśśrutvāhaṃ sa viṣṇurharasya ca //
sasmitaṃ moditamano'vocaṃ ceti vinamrakaḥ

śṛṇu nātha maheśāna mārgitā yādṛśī tvayā //
nivedayāmi suprītyā tāṃ striyaṃ tādṛśīṃ prabho

umā sā bhinnarūpeṇa saṃjātā kāryasādhinī //
sarasvatī tathā lakṣmīrdvidhā rūpā purā prabho

pādmā kāṃtā'bhavadviṣṇostathā mama sarasvatī //
tṛtīyarūpā sā nābhūllokakāryahitaiṣiṇī

dakṣasya tanayā yābhūtsatī nāmnā tu sā vibho //
saivedṛśī bhavedbhāryā bhaveddhi hitakāriṇī

sā tapasyati deveśa tvadarthaṃ hi dṛḍhavratā //
tvāṃ patiṃ prāptukāmā vai mahātejovatī satī

dātuṃ gaccha varaṃ tasyai kṛpāṃ kuru maheśvara //
tāṃ vivāhaya suprītyā varaṃ dattvā ca tādṛśam

harermama ca devānāmiyaṃ vāñchāsti śaṃkara //
paripūraya saddṛṣṭyā paśyāmotsavamādarāt

maṅgalaṃ paramaṃ bhūyāttrilokeṣu sukhāvaham //
sarvajvaro vinaśyedvai sarveṣāṃ nātra saṃśayaḥ

athavāsmadvacaśśeṣe vadaṃta madhusūdanaḥ //
līlājākṛtimīśānaṃ bhaktavatsalamacyutaḥ

viṣṇuruvāca //
devadeva mahādeva karuṇākara śaṃkara //
yaduktaṃ brahmaṇā sarvaṃ maduktaṃ tanna saṃśayaḥ

tatkuruṣva maheśāna kṛpāṃ kṛtvā mamopari //
sanāthaṃ kuru saddṛṣṭyā trilokaṃ suvivāhyatām

brahmovāca //
ityuktvā bhagavān viṣṇustūṣṇīmāsa mune sudhīḥ //
tathā stutiṃ vihasyāha sa prabhurbhaktavatsalaḥ

tatastvāvāṃ ca saṃprāpya cājñāṃ sa munibhissuraiḥ //
agacchāvasveṣṭadeśaṃ sastrīkau paraharṣitau

iti śrīśivamahāpuṇe dvitīyāyāṃ rudrasaṃhitāyāṃ dvitīye satīkhaṃḍe viṣṇubrahmakṛtaśiva prārthanāvarṇanaṃ nāma ṣoḍaśo'dhyāyaḥ