Shiva Purana · Chapter 2.1.18

brahmovāca //
śrutvā tathā sa vṛttāṃtaṃ prāktanaṃ svaṃ viniṃdya ca //
kāṃciddiśaṃ samālokya niryayau dīkṣitāṃgajaḥ

kiyacciraṃ tato gatvā yajñadattātmajassa hi //
duṣṭo guṇanidhistasthau gatotsāho visarjitaḥ

ciṃtāmavāpa mahatīṃ kva yāmi karavāṇi kim //
nāhamabhyastavidyo'smi na caivātidhano'smyaham

deśāṃtare yasya dhanaṃ sa sadyassukhamedhate //
bhayamasti dhane caurātsa vighnassarvatobhavaḥ

yājakasya kule janma kathaṃ me vyasanaṃ mahat//
aho balīyānhi vidhirbhāvikarmānusaṃdhayet

bhikṣitunnādhigacchāmi na me paricitiḥ kvacit //
na ca pārśve dhanaṃ kiñcitkimatra śaraṇaṃ bhavet

sadānabhyudite bhānau prasūrme miṣṭabhojanam //
dadyādadyātra kaṃ yāce na ceha jananī mama

brahmovāca // //
iti ciṃtayatastasya bahuśastatra nārada //
ati dīnaṃ tarormūle bhānurastācalaṃ gataḥ

etasminneva samaye kaścinmāheśvaro naraḥ //
sahopahārānādāya nagarādbahirabhyagāt

nānāvidhānmahādivyānsvajanaiḥ parivāritaḥ //
samabhyarcitumīśānaṃ śivarātrāvupoṣitaḥ

śivālayaṃ praviśyātha sa bhaktaśśivasaktadhīḥ //
yathocitaṃ sucittena pūjayāmāsa śaṃkaram

pakvānnagaṃdhamāghrāya yajñadattātmajo dvijaḥ //
pitṛtyakto mātṛhīnaḥ kṣudhitaḥ sa tamanvagāt

idamannaṃ mayā grāhyaṃ śivāyopakṛtaṃ niśi //
supte śaivajane daivātsarvasminvividhaṃ mahat

ityāśāmavalambyātha dvāri śaṃbhorupāviśat //
dadarśa ca mahāpūjāṃ tena bhaktena nirmitām

vidhāya nṛtyagītādi bhaktāssuptāḥ kṣaṇe yadā //
naivedyaṃ sa tadādātuṃ bhargāgāraṃ viveśa ha

dīpaṃ maṃdaprabhaṃ dṛṣṭvā pakvānnavīkṣaṇāya saḥ //
nijacailāṃjalādvartiṃ kṛtvā dīpaṃ prakāśya ca

yajñadattātmajasso'tha śivanaivedyamādarāt //
jagrāha sahasā prītyā pakvānna vahuśastataḥ

tataḥ pakvānnamādāya tvaritaṃ gacchato bahiḥ //
tasya pādatalāghātātprasuptaḥ kopyabudhyata

ko'yaṃ ko'yaṃ tvarāpanno gṛhyatāṃ gṛhyatā masau //
iti cukrośa sa jano girā bhayamahoccayā

yāvadbhayātsamāgatya tāvatsa purarakṣakaiḥ //
palāyamāno nihataḥ kṣaṇādaṃdhatvamāgataḥ

abhakṣayacca naivedyaṃ yajñadattātmajo mune //
śivānugrahato nūnaṃ bhāvipuṇyabalānna saḥ

atha baddhassamāgatya pāśamudgarapāṇibhiḥ //
ninīṣubhiḥ saṃyamanīṃ yāmyaissa vikaṭairbhaṭaiḥ

tāvatpāriṣadāḥ prāptāḥ kiṃki ṇījālamālinaḥ //
divyaṃ vimānamādāya taṃ netuṃ śūlapāṇayaḥ

śivagaṇā ūcuḥ // //
muṃcatainaṃ dvijaṃ yāmyā gaṇāḥ parama dhārmikam //
daṇḍayogyo na vipro'sau dagdhasarvāghasaṃcayaḥ

ityākarṇya vacaste hi yamarājagaṇāstataḥ //
mahādevagaṇānāhurbabhūvuścakitā bhṛśam

śaṃbhorgaṇānathālokya bhītaistairyamakiṃkaraiḥ //
avādi praṇatairitthaṃ durvṛtto'yaṃ gaṇā dvijaḥ

yamagaṇā ūcuḥ //
kulācāraṃ pratīryyaiṣa pitrorvākyaparāṅmukhaḥ //
satyaśaucaparibhraṣṭassaṃdhyāsnānavivarjitaḥ

āstāṃ dūresya karmānyacchivanirmālyalaṃghakaḥ //
pratyakṣato'tra vīkṣadhvamaspṛśyo'yaṃ bhavādṛśām

śivanirmālyabhoktāraśśivanirmmālyalaṃghakāḥ //
śivanirmālyadātāraḥ sparśasteṣāṃ hyapuṇyakṛt

viṣamālokya vā peyaṃ śreyo vā sparśanaṃ param//
sevitavyaṃ śivasvaṃ na prāṇaḥ kaṇṭhagatairapi

yūyaṃ pramāṇaṃ dharmeṣu yathā na ca tathā vayam //
asti ceddharmaleśosya gaṇāstaṃ śṛṇumo vayam

itthaṃ tadvākyamākarṇya yāmānāṃ śivakiṃkarāḥ //
smṛtvā śivapadāmbhojaṃ procuḥ pāriṣadāstu tān

śivakiṃkarā ūcuḥ // //
kiṃkarāśśivadharmā ye sūkṣmāste tu bhavādṛśaiḥ //
sthūlalakṣyaiḥ kathaṃ lakṣyā lakṣyā ye sūkṣmadṛṣṭibhiḥ

anenānenasā karma yatkṛtaṃ śṛṇuteha tat //
yajñadattātmajenātha sāvadhānatayā gaṇāḥ

pataṃtī liṃgaśirasi dīpacchāyā nivāritā //
svacailāṃcalato'nena dattvā dīpadaśāṃ niśi

aparopi paro dharmo jātastatrāsya kiṃkaraḥ //
śṛṇvataḥ śivanāmāni prasaṃgādapi gṛhṇatām/'/३६//
bhaktena vidhinā pūjā kriyamāṇā nirīkṣitā //
upoṣitena bhūtāyāmanenāsthitacetasā

śivalokamayaṃ hyadya gaṃtāsmābhissahaiva tu //
kaṃcitkālaṃ mahābhogānkariṣyati śivānugaḥ

kaliṃgarājo bhavitā tato nirdhūtakalmaṣaḥ//
eṣa dvijavaro nūnaṃ śivapriyataro yataḥ

anyatkiṃcinna vaktavyaṃ yūyaṃ yāta yathāgatam //
yamadūtāssvalokaṃ tu suprasannena cetasā

// brahmovāca // //
ityākarṇya vacasteṣāṃ yamadūtā munīśvara //
yathāgataṃ yayussarve yamalokaṃ parāṅmukhāḥ

sarvaṃ nivedayāmāsuśśamanāya gaṇā mune //
tadvṛttamāditaḥ proktaṃ śaṃbhudūtaiśca dharmataḥ

// dharmarāja uvāca // //
sarve śṛṇuta madvākyaṃ sāvadhānatayā gaṇāḥ //
tadeva prītyā kuruta macchāsanapurassaram

ye tripuṇḍradharā loke vibhūtyā sitayā gaṇāḥ//
te sarve parihartavyā nānetavyāḥ kadācana

uddhūlanakarā ye hi vibhūtyā sitayā gaṇāḥ //
te sarve parihartavyā nānetavyāḥ kadācana

śivaveṣatayā loke yena kenāpi hetunā//
te sarve parihartavyā nānetavyāḥ kadācana

ye rudrākṣadharā loke jaṭādhāriṇa eva ye //
te save parihartavyā nānetavyāḥ kadācana

upajīvanahetośca śivaveṣadharā hi ye //
te sarve parihartavyā nānetavyāḥ kadācana//

daṃbhenāpi cchalenāpi śivaveṣadharā hi ye //
te sarve parihartavyā nānetavyāḥ kadācana

evamājñāpayāmāsa sa yamo nija kiṃkarān //
tatheti matvā te sarve tūṣṇīmāsañchucismitāḥ

// brahmovāca //
pārṣadairyamadūtebhyo mocitastviti sa dvijaḥ//
śivalokaṃ jagāmāśu tairgaṇaiśśucimānasaḥ

tatra bhuktvākhilānbhogānsaṃsevya ca śivāśivau //
ariṃdamasya tanayaḥ kaliṃgādhipaterabhūt

dama ityabhidhāno'bhūcchivasevāparāyaṇaḥ//
bālo'pi śiśubhiḥ sākaṃ śivabhaktiṃ cakāra saḥ

kramādrājyamavāpātha pitaryuparate yuvā //
prītyā pravartayāmāsa śivadharmāṃśca sarvaśaḥ

nānyaṃ dharmaṃ sa jānāti durdamo bhūpatirdamaḥ//
śivālayeṣu sarveṣu dīpadānādṛte dvijaḥ

grāmādhīśānsamāhūya sarvānsa viṣayasthitān //
itthamājñāpayāmāsa dīpā deyāśśivālaye

anyathā satyamevedaṃ sa me daṇḍyo bhaviṣyati //
dīpa dānācchivastuṣṭo bhavatīti śrutīritam

yasyayasyābhito grāmaṃ yāvataśca śivālayāḥ//
tatratatra sadā dīpo dyotanīyo'vicāritam

mamājñābhaṃgadoṣeṇa śiraśchetsyāmyasaṃśayam//
iti tadbhayato dīpā dīptāḥ pratiśivālayam

anenaiva sa dharmeṇa yāvajjīvaṃ damo nṛpaḥ //
dharmarddhiṃ mahatīṃ prāpya kāladharmavaśaṃ gataḥ

sa dīpavāsanāyogādbahūndīpānpradīpya vai //
alakāyāḥ patirabhūdratnadīpaśikhāśrayaḥ

evaṃ phalati kālena śive'lpamapi yatkṛtam //
iti jñātvā śive kāryaṃ bhajanaṃ susukhārthibhiḥ

kva sa dīkṣitadāyādaḥ sarvadharmāratiḥ sadā //
śivālaye daivayogādyātaścorayituṃ vasu //
svārthadīpadaśodyotaliṃgamaulitamoharaḥ

kaliṃgaviṣaye rājyaṃ prāpto dharmaratiṃ sadā //
śivālaye samuddīpya dīpānprāgvāsanodayāt

kaiṣā dikpālapadavī munīśvara vilokaya //
manuṣyadharmiṇānena sāṃprataṃ yeha bhujyate

iti proktaṃ guṇanidheryajñadattātmajasya hi //
caritaṃ śivasaṃtoṣaṃ śṛṇvatāṃ sarvakāmadam

sarvadevaśivenāsau sakhitvaṃ ca yatheyivān //
tadapyekamanā bhūtvā śṛṇu tāta bravīmi te

iti śrīśivamahāpurāṇe dvitīyāyāṃ rudrasaṃhitāyāṃ prathamakhaṇḍe sṛṣṭyu pākhyāne kailāśagamanopākhyāne guṇanidhisadgativarṇano nāmāṣṭādaśo'dhyāyaḥ