Shiva Purana · Chapter 1.25

sūta uvāca /
śaunakarṣe mahāprājña śivarūpamahāpate /
śṛṇu rudrā kṣamāhātmyaṃ samāsātkathayāmyaham

śivapriyatamo jñeyo rudrā kṣaḥ parapāvanaḥ /
darśanātsparśanājjāpyātsarvapāpaharaḥ smṛtaḥ

purā rudrā kṣamahimā devyagre kathito mune /
lokopakaraṇārthāya śivena paramātmanā

śiva uvāca /
śṛṇu devimaheśāni rudrā kṣamahimā śive /
kathayāmi tavaprītyā bhaktānāṃ hitakāmyayā

divyavarṣasahasrāṇi maheśāni punaḥ purā /
tapaḥ prakurvatastrastaṃ manaḥ saṃyamya vai mama

svataṃtreṇa pareśena lokopakṛtikāriṇā /
līlayā parameśāni cakṣurunmīlitaṃ mayā

puṭābhyāṃ cārucakṣurbhyāṃ patitā jalabiṃdavaḥ /
tatrāśrubindavo jātā vṛkṣā rudrā kṣasaṃjñakāḥ

sthāvaratvamanuprāpya bhaktānugrahakāraṇāt /
te dattā viṣṇubhaktebhyaścaturvarṇebhya eva ca

bhūmau gauḍodbhavāṃścakre rudrā kṣāñchivavallabhān /
mathurāyāmayodhyāyāṃ laṃkāyāṃ malaye tathā

sahyādrau ca tathā kāśyāṃ daśeṣvanyeṣu vā tathā /
parānasahyapāpaughabhedanāñchrutinodanāt

brāhmaṇāḥ kṣatriyā vaiśyāḥ śūdrā jātā mamājñayā /
rudrā kṣāste pṛthivyāṃ tu tajjātīyāḥ śubhākṣakāḥ

śvetaraktāḥ pītakṛṣṇā varṇājñeyāḥ kramādbudhaiḥ /
svajātīyaṃ nṛbhirdhāryaṃ rudrā kṣaṃ varṇataḥ kramāt

varṇaistu tatphalaṃ dhāryaṃ bhuktimuktiphalepsubhiḥ /
śivabhaktairviśeṣeṇa śivayoḥ prītaye sadā

dhātrīphalapramāṇaṃ yacchreṣṭhametadudāhṛtam /
badarīphalamātraṃ tu madhyamaṃ saṃprakīrttitam

adhamaṃ caṇamātraṃ syātprakriyaiṣā parocyate /
śṛṇu pārvati suprītyā bhaktānāṃ hitakāmyayā

badarīphalamātraṃ ca yatsyātkila maheśvari /
tathāpi phaladaṃ loke sukhasaubhāgyavarddhanam

dhātrīphalasamaṃ yatsyātsarvāriṣṭavināśanam /
guṃjayā sadṛśaṃ yatsyātsarvārthaphalasādhanam

yathā yathā laghuḥ syādvai tathādhikaphalapradam /
ekaikataḥ phalaṃ proktaṃ daśāṃśairadhikaṃ budhaiḥ

rudrā kṣadhāraṇaṃ proktaṃ pāpanāśanahetave /
tasmācca dhāraṇī yo vai sarvārthasādhano dhruvam

yathā ca dṛśyate loke rudrā kṣaphaladaḥ śubhaḥ /
na tathā dṛśyate'nyā ca mālikā parameśvari

samāḥ snigdhā dṛḍhāḥ sthūlāḥ kaṃṭakaiḥ saṃyutāḥ śubhāḥ /
rudrā kṣāḥ kāmadā devi bhuktimuktipradāḥ sadā

krimiduṣṭaṃ chinnabhinnaṃ kaṃṭakairhīnameva ca /
vraṇayuktamavṛttaṃ ca rudrā kṣānṣaḍvivarjayet

svayameva kṛtadvāraṃ rudrā kṣaṃ syādihottamam /
yattu pauruṣayatnena kṛtaṃ tanmadhyamaṃ bhavet

rudrā kṣadhāraṇaṃ prāptaṃ mahāpātakanāśanam /
rudra saṃkhyāśataṃ dhṛtvā rudra rūpo bhavennaraḥ

ekādaśaśatānīha dhṛtvā yatphalamāpyate /
tatphalaṃ śakyate naiva vaktuṃ varṣaśatairapi

śatārddhena yutaiḥ paṃcaśatairvai mukuṭaṃ matam /
rudrā kṣairviracetsamyagbhaktimānpuruṣo varaḥ

tribhiḥ śataiḥ ṣaṣṭiyuktaistrirāvṛttyā tathā punaḥ /
rudrā kṣairupavītaṃ va nirmīyādbhaktitatparaḥ

śikhāyāṃ ca trayaṃ proktaṃ rudra kṣāṇāṃ maheśvari /
karṇayoḥ ṣaṭ ca ṣaṭcaiva vāmadakṣiṇayostathā

śatamekottaraṃ kaṃṭhe bāhvorvai rudra saṃkhyayā /
kūrparadvārayostatra maṇibaṃdhe tathā punaḥ

upavīte trayaṃ dhāryaṃ śivabhaktiratairnaraiḥ /
śeṣānurvaritānpaṃca sammitāndhārayetkaṭau

etatsaṃkhyā dhṛtā yena rudrā kṣāḥ parameśvari /
tadrū paṃ tu praṇamyaṃ hi stutyaṃ sarvairmaheśavat

evaṃbhūtaṃ sthitaṃ dhyāne yadā kṛtvāsanairjanam /
śiveti vyāharaṃścaiva dṛṣṭvā pāpaiḥ pramucyate

śatādikasahasrasya vidhireṣa prakīrtitaḥ /
tadabhāve prakāronyaḥ śubhaḥ saṃprocyate mayā

śikhāyāmekarudrā kṣaṃ śirasā triṃśataṃ vahet /
paṃcāśacca gale dadhyādbāhvoḥ ṣoḍaśa ṣoḍaśa

maṇibaṃdhe dvādaśadviskaṃdhe paṃcaśataṃ vahet /
aṣṭottaraśatairmālyamupavītaṃ prakalpayet

evaṃ sahasrarudrā kṣāndhārayedyo dṛḍhavrataḥ /
taṃ namaṃti surāḥ sarve yathā rudra stathaiva saḥ

ekaṃ śikhāyāṃ rudrā kṣaṃ catvāriṃśattu mastake /
dvātriṃśatkaṇṭhadeśe tu vakṣasyaṣṭottaraṃ śatam

ekaikaṃ karṇayoḥ ṣaṭṣaḍbāhvoḥ ṣoḍaśa ṣoḍaśa /
karayoravimānena dviguṇena munīśvara

saṃkhyā prītirdhṛtā yena sopi śaivajanaḥ paraḥ /
śivavatpūjanīyo hi vaṃdyassarvairabhīkṣṇaśaḥ

śirasīśānamaṃtreṇa karṇe tatpuruṣeṇa ca /
aghoreṇa gale dhāryaṃ tenaiva hṛdayepi ca

aghorabījamaṃtreṇa karayordhārayetsudhīḥ /
paṃcadaśākṣagrathitāṃ vāmadevena codare

paṃca brahmabhiraṃgaśca trimālāṃ paṃcasapta ca /
athavā mūlamaṃtreṇa sarvānakṣāṃstudhārayet

madyaṃ māṃsaṃ tu laśunaṃ palāṇḍuṃ śigrumeva ca /
śleṣmāṃtakaṃ viḍvarāhaṃ bhakṣaṇe varjayettataḥ

valakṣaṃ rudrā kṣaṃ dvijatanubhireveha vihitaṃ suraktaṃ kṣattrāṇāṃ pramuditamume pītamasakṛt

chinnaṃ khaṃḍitaṃ bhinnaṃ vidīrṇa /
tato vaiśyairdhāryaṃ pratidivasabhāvaśyakamaho tathā kṛṣṇaṃ śūdrai ḥ! śrutigaditamārgoyamagaje

varṇī vanī gṛhayatīrniyamena dadhyādetadra hasyaparamo na hi jātu tiṣṭhet /
rudrā kṣadhāraṇamidaṃ sukṛtaiśca labhyaṃ tyaktvedametadakhilānnarakānprayāṃti

ādāvāmalakātsvato laghutarā rugṇāstataḥ kaṃṭakaiḥ saṃdaṣṭāḥ kṛmibhistanūpakaraṇacchidre ṇa hīnāstathā /
dhāryā naiva śubhepsubhiścaṇakavadrudrā kṣamapyaṃtato rudrā kṣomama liṃgamaṃgalamume sūkṣmaṃ praśastaṃ sadā

sarvāśramāṇāṃ varṇānāṃ strīśūdrā ṇāṃ śivājñayā /
dhāryāḥ sadaiva rudrā kṣā yatīnāṃ praṇavena hi

divā bibhradrā trikṛtai rātrau vibhraddivākṛtaiḥ /
prātarmadhyāhnasāyāhne mucyate sarvapātakaiḥ

ye tripuṇḍradharā loke jaṭādhāriṇa eva ye /
ye rudrā kṣadharāste vai yamalokaṃ prayāṃti na

rudrā kṣamekaṃ śirasā bibharti tathā tripuṇḍraṃ ca lalāṭamadhye /
paṃcākṣaraṃ ye hi japaṃti maṃtraṃ pūjyā bhavadbhiḥ khalu te hi sādhavaḥ

yasyāṇge nāsti rudrā kṣastripuṇḍraṃ bhālapaṭṭake /
mukhe paṃcākṣaraṃ nāsti tamānaya yamālayam

jñātvā jñātvā tatprabhāvaṃ bhasmarudrā kṣadhāriṇaḥ /
te pūjyāḥ sarvadāsmākaṃ no netavyāḥ kadācana

evamājñāpayāmāsa kālopi nijakiṇkarān /
tatheti mattvā te sarve tūṣṇīmāsansuvismitāḥ

ata eva mahādevi rudrā kṣotyaghanāśanaḥ /
taddharo matpriyaḥ śuddho'tyaghavānapi pārvati

haste bāhau tathā mūrdhni rudrā kṣaṃ dhārayettu yaḥ /
avadhyaḥ sarvabhūtānāṃ rudra rūpī caredbhuvi

surāsurāṇāṃ sarveṣāṃ vaṃdanīyaḥ sadā sa vai /
pūjanīyo hi dṛṣṭasya pāpahā ca yathā śivaḥ

dhyānajñānāvamuktopi rudrā kṣaṃ dhārayettu yaḥ /
sarvapāpavinirmuktaḥ sa yāti paramāṃ gatim

rudrā kṣeṇa japanmantraṃ puṇyaṃ koṭiguṇaṃ bhavet /
daśakoṭiguṇaṃ puṇyaṃ dhāraṇāllabhate naraḥ

yāvatkālaṃ hi jīvasya śarīrastho bhavetsa vai /
tāvatkālaṃ svalpamṛtyurna taṃ devi vibādhate

tripuṃḍreṇa ca saṃyuktaṃ rudrā kṣāvilasāṃgakam /
mṛtyuṃjayaṃ japaṃtaṃ ca dṛṣṭvā rudra phalaṃ labhet

paṃcadevapriyaścaiva sarvadevapriyastathā /
sarvamantrāñjapedbhakto rudrā kṣamālayā priye

viṣṇvādidevabhaktāśca dhārayeyurna saṃśayaḥ /
rudra bhakto viśeṣeṇa rudrā kṣāndhārayetsadā

rudrā kṣā vividhāḥ proktāsteṣāṃ bhedānvadāmyaham /
śṛṇu pārvati sadbhaktyā bhuktimuktiphalapradān

ekavaktraḥ śivaḥ sākṣādbhuktimuktiphalapradaḥ /
tasya darśanamātreṇa brahmahatyā vyapohati

yatra saṃpūjitastatra lakṣmīrdūratarā na hi /
naśyaṃtyupadra vāḥ sarve sarvakāmā bhavaṃti hi

dvivaktro devadeveśassarvakāmaphalapradaḥ /
viśeṣataḥ sa rudrā kṣo govadhaṃ nāśayeddrutam

trivaktro yo hi rudrā kṣaḥ sākṣātsādhanadassadā /
tatprabhāvādbhaveyurvai vidyāḥ sarvāḥ pratiṣṭhitāḥ

caturvaktraḥ svayaṃ brahmā narahatyāṃ vyapohati /
darśanātsparśanātsadyaścaturvargaphalapradaḥ

paṃcavaktraḥ svayaṃ rudra ḥ! kālāgnirnāmataḥ prabhuḥ /
sarvamuktipradaścaiva sarvakāmaphalapradaḥ

agamyāgamanaṃ pāpamabhakṣyasya ca bhakṣaṇam /
ityādisarvapāpāni paṃcavaktro vyapohati

ṣaḍvaktraḥ kārtikeyastudhāraṇāddakṣiṇe bhuje /
brahmahatyādikaiḥ pāpairmucyate nātra saṃśayaḥ

saptavaktro maheśāni hyanaṃgo nāma nāmataḥ /
dhāraṇāttasya deveśidaridro pīśvaro bhavet

rudrā kṣaścāṣṭavaktraśca vasumūrtiśca bhairavaḥ /
dhāraṇāttasya pūrṇāyurmṛto bhavati śūlabhṛt

bhairavo navavaktraśca kapilaśca muniḥ smṛtaḥ /
durgā vāta dadhiṣṭhātrī navarūpā maheśvarī

taṃ dhārayedvāmahaste rudrā kṣaṃ bhaktitatparaḥ /
sarveśvaro bhavennūnaṃ mama tulyo na saṃśayaḥ

daśavaktro maheśāni svayaṃ devo janārdanaḥ /
dhāraṇāttasya deveśi sarvānkāmānavāpnuyāt

ekādaśamukho yastu rudrā kṣaḥ parameśvari /
sa rudro dhāraṇāttasya sarvatra vijayī bhavet

dvādaśāsyaṃ tu rudrā kṣaṃ dhārayetkeśadeśake /
ādityāścaiva te sarvedvādaśaiva sthitāstathā

trayodaśamukho viśvedevastaddhāraṇānnaraḥ /
sarvānkāmānavāpnoti saubhāgyaṃ maṃgalaṃlabhet

caturdaśamukho yo hi rudrā kṣaḥ paramaḥ śivaḥ /
dhārayenmūrdhni taṃ bhaktyā sarvapāpaṃ praṇaśyati

iti rudrā kṣabhedā hi proktā vai mukhabhedataḥ /
tattanmaṃtrāñchṛṇu prītyā kramācchailleśvarātmaje

ॐ hrīṃ namaḥ १ ॐ namaḥ २ ॐ klīṃ namaḥ ३ ॐ hrīṃ namaḥ ४ ॐ hrīṃ namaḥ ५ ॐ hrīṃ huṃ namaḥ ६ ॐ huṃnamaḥ ७ ॐ huṃ namaḥ ८ ॐ hrīṃ huṃ namaḥ ९ ॐ hrīṃ namaḥ namaḥ १० ॐ hrīṃ huṃ namaḥ ११ ॐ krauṃ kṣauṃ rauṃ namaḥ १२ ॐ hrīṃ namaḥ १३ ॐ nama

bhaktiśraddhā yutaścaiva sarvakāmārthasiddhaye /
rudrā kṣāndhārayenmaṃtrairdevanālasya varjitaḥ

vinā maṃtreṇa ho dhatte rudrā kṣaṃ bhuvi mānavaḥ /
sa yāti narakaṃ ghoraṃ yāvadindrā ścaturdaśa

rudrā kṣamālinaṃ dṛṣṭvā bhūtapretapiśācakāḥ /
ḍākinīśākinī caiva ye cānye dro hakārakāḥ

kṛtrimaṃ caiva yatkiṃcidabhicārādikaṃ ca yat /
tatsarvaṃ dūrato yāti dṛṣṭvā śaṃkitavigraham

rudrā kṣamālinaṃ dṛṣṭvā śivo viṣṇuḥ prasīdati /
devīgaṇapatissūryaḥ surāścānyepi pārvati

evaṃ jñātvā tu māhātmyaṃ rudrā kṣasya maheśvari /
samyagdhāryāssamaṃtrāśca bhaktyādharmavivṛddhaye

ityuktaṃ girijāgre hi śivena paramātmanā /
bhasmarūdrā kṣamāhātmyaṃ bhuktimuktiphalapradam

śivasyātipriyau jñeyau bhasmarudrā kṣadhāriṇau /
taddhāraṇaprabhāvaddhi bhuktirmuktirna saṃśayaḥ

bhasmarudrā kṣadhārī yaḥ śivabhaktassa ucyate /
paṃcākṣarajapāsaktaḥ paripūrṇaśca sanmukhe

vinā bhasmatripuṃḍreṇa vinā rudrā kṣamālayā /
pūjitopi mahādevo nābhīṣṭaphaladāyakaḥ

tatsarvaṃ ca samākhyātaṃ yatpṛṣṭaṃ hi munīśvara /
bhasmarudrā kṣamāhātmyaṃ sarvakāmasamṛddhidam

etadyaḥ śṛṇuyānnityaṃ māhātmyaparamaṃ śubham /
rudrā kṣabhasmanorbhaktyāsarvānkāmānavāpnuyāt

iha sarvasukhaṃ bhuktvā putrapautrādisaṃyutaḥ /
labhetparatra sanmokṣaṃ śivasyātipriyo bhavet

vidyeśvarasaṃhiteyaṃ kathitā vo munīśvarāḥ /
sarvasiddhipradā nityaṃ muktidā śivaśāsanāt

iti śrīśivamahāpurāṇe prathamāyāṃ vidyeśvarasaṃhitāyāṃ sādhyasādhanakhaṇḍe rudrā kṣamahātmyavarṇanonāma pañcaviṃśo'dhyāyaḥ

iti śrīśivamahāpurāṇe prathamā vidyeśvarasaṃhitā samāptā/