Shiva Gita · Chapter 5

śrīsūta uvāca /
atha prādurabhūttatra hiraṇmayaratho mahān //
anekadivyaratnāṃśukirmīritadigantaraḥ

nadyupāntikapaṅkāḍhyamahīcakracatuṣṭayaḥ /
muktātoraṇasaṃyuktaḥ śvetacchatraśatāvṛtaḥ

śuddhahemakhurairāḍhyaturaṃgagaṇasaṃyutaḥ /
muktāvitānavilasadūrdhvadivyavṛṣadhvajaḥ

mattavāraṇikāyuktaḥ pañcatattvopaśobhitaḥ //
pārijātatarūdbhūtapuṣpamālābhirañjitaḥ

mṛganābhisamudbhūtakastūrīmadapaṅkilaḥ /
karpūrāgarudhūpotthagandhākṛṣṭamadhuvrataḥ

saṃvartaghanaghoṣāḍhyo nānāvādyasamanvitaḥ /
vīṇāveṇusvanāsaktakinnarīgaṇasaṃkulaḥ

evaṃ kṛtvā rathaśreṣṭhaṃ vṛṣāduttīrya śaṃkaraḥ /
ambayā sahitastatra paṭatalpe'viśattadā

suranīrajanetrīṇāṃ śvetacāmaracālanaiḥ /
divyavyajanavātaiśca prahṛṣṭo nīlalohitaḥ

kvaṇatkaṅkaṇanidhvānairmañjumañjīrasiṃjitaiḥ //
vīṇāveṇusvanairgītaiḥ pūrṇamāsījjagatrayam

śukavākyakalārāvaiḥ śvetapārāvatasvanaiḥ //
unnidrabhūṣāphaṇināṃ darśanādeva barhiṇaḥ //
nanṛturdarśayantaḥ svāṃścandrakānkoṭisaṃkhyayā

praṇamantaṃ yato rāmamutthāpya vṛṣabhadhvajaḥ //
ānināya rathaṃ divyaṃ prahṛṣṭenāntarātmanā

kamaṇḍalujalaiḥ svacchaiḥ svayamācamya yatnataḥ /
samācāmyātha purataḥ svāṅke rāmamupānayat

atha divyaṃ dhanustasmai dadau tūṇīramakṣayam //
mahāpāśupataṃ nāma divyamastraṃ dadau tataḥ

uktaśca tena rāmo'pi sādaraṃ candramaulinā //
jagannāśakaraṃ raudramugramastramidaṃ nṛpa

ato nedaṃ prayoktavyaṃ sāmānyasamarādike /
anyo nāsti pratīghāta etasya bhuvanatraye

tasmātprāṇātyaye rāma prayoktavyamupasthite //
anyadaitatprayuktaṃ cejjagatsaṃkṣayakṛdbhavet

athāhūya suraśreṣṭhānlokapālānmaheśvaraḥ /
uvāca paramaprītaḥ svaṃsvamastraṃ prayacchata

rāghavo'yaṃ ca tairastrai rāvaṇaṃ nihaniṣyati /
tasmai devairavadhyatvamiti datto varo mayā

tasmādvānaratāmetya bhavanto yuddhadurmadāḥ //
sāhāyyamasya kurvantu tena susthā bhaviṣyatha

tadājñāṃ śirasā gṛhya surāḥ prāñjalayastadā /
praṇamya caraṇau śaṃbhoḥ svaṃsvamastraṃ dadurmudā

nārāyaṇāstraṃ daityāriraindramastraṃ puraṃdaraḥ //
brahmāpi brahmadaṇḍāstramāgneyāstraṃ dhanaṃjayaḥ

yāmyaṃ yamo'pi mohāstraṃ rakṣorājastathā dadau //
varuṇo vāruṇaṃ prādādvāyavyāstraṃ prabhañjanaḥ

kauberaṃ ca kubero'pi raudramīśāna eva ca /
sauramastraṃ dadau sūraḥ saumyaṃ somaśca pāvakam //
viśvedevā dadustasmai vasavo vāsavābhidham

atha tuṣṭaḥ praṇamyeśaṃ rāmo daśarathātmajaḥ //
prāñjaliḥ praṇato bhūtvā bhaktiyukto vyajijñapat

śrīrāma uvāca /
bhagavanmānuṣaireva nollaṅghyo lavaṇāmbudhiḥ //
tatra laṅkābhidhaṃ durgaṃ durjayaṃ devadānavaiḥ

anekakoṭayastatra rākṣasā balavattarāḥ /
sarve svādhyāyaniratāḥ śivabhaktā jitendriyāḥ

anekamāyāsaṃyuktā buddhimanto'gnihotriṇaḥ //
kathamekākinā jeyā mayā bhrātrā ca saṃyuge

īśvara uvāca /
rāvaṇasya vadhe rāma rakṣasāmapi māraṇe /
vicāro na tvayā kāryastasya kālo'yamāgataḥ

adharme tu pravṛttāste devabrāhmaṇapīḍane/
tasmādāyuḥ kṣayaṃ yātaṃ teṣāṃ śrīrapi suvrata

rājastrīlaṅghanāsaktaṃ rāvaṇaṃ nihaniṣyasi //
pānāsakto ripurjetuṃ sukaraḥ samarāṅgaṇe

adharmanirataḥ śatrurbhāgyenaiva hi labhyate /
adhītavedaśāstro'pi sadā dharmarato'pi vā / /
vināśakāle saṃprāpte dharmamārgāccyuto bhavet

pīḍyante devatāḥ sarvāḥ satataṃ yena pāpinā /
brāhmaṇā ṛṣayaścaiva tasya nāśaḥ svayaṃ sthitaḥ

kiṣkindhānagare rāma devānāmaṃśasaṃbhavāḥ /
vānarā bahavo jātā durjayā balavattarāḥ

sāhāyyaṃ te kariṣyanti tairbadhāna payonidhim /
anekaśailasaṃbaddhe setau yāntu balīmukhāḥ /
rāvaṇaṃ sagaṇaṃ hatvā tāmānaya nijapriyām

śastrairyuddhe jayo yatra tatrāstrāṇi na yojayet /
nirastreṣvalpaśastreṣu palāyanapareṣu ca /
astrāṇi muñcandivyāni svayameva vinaśyati

athavā kiṃ bahūktena mayaivotpāditaṃ jagat //
mayaiva pālyate nityaṃ mayā saṃhriyate'pi ca

ahameko jaganmṛtyurmṛtyorapi mahīpate /
grase'hameva sakalaṃ jagadetaccarācaram

mama vakragatāḥ sarve rākṣasā yuddhadurmadāḥ //
nimittamātrastvaṃ bhūyāḥ kīrtimāpsyasi saṃgare