Scripture Library

Shatapatha Brahmana · Chapter 9.5.1

9.5.1.9.5.1.1

९.५.१.१ atha yajamānavratamīmāṃsā
athātaḥ payovratatāyai / payovrato dīkṣitaḥ syāddevebhyo ha vā amṛtamapacakrāma -

9.5.1.9.5.1.2

te hocuḥ / śrameṇa tapasedamanvicchāmeti tacchrameṇa tapasānvaicchaṃste dīkṣitvā payovratā abhavannetadvai tapo yo dīkṣitvā payovrato'sattasya ghoṣamāśuśruvuḥ -

9.5.1.9.5.1.3

te hocuḥ / nedīyo vai bhavati bhūyastapa upāyāmeti te trīntstanānupeyustatparādadṛśuḥ -

9.5.1.9.5.1.4

te hocuḥ / nedīyo vai bhavati bhūyastapa upāyāmeti te dvau stanā upeyustannedīyasaḥ parādadṛśuḥ -

9.5.1.9.5.1.5

te hocuḥ / nedīyo vai bhavati bhūyastapa upāyāmeti ta ekaṃ stanamupeyustadadhijagāma na tvabhipattuṃ śekuḥ -

9.5.1.9.5.1.6

te hocuḥ adhi vā aganna tvabhipattuṃ śaknumaḥ sarvaṃ tapa upāyāmeti ta upavasathe'nāśakamupeyuretadvai sarvaṃ tapo yadanāśakastasmādupavasathe nāśnīyāt -

9.5.1.9.5.1.7

tatprātarabhipadya / abhiṣutyāgnāvajuhavustadagnāvamṛtamadadhuḥ sarveṣāmu haiṣa devānāmātmā yadagnistadyadagnāvamṛtamadadhustadātmannamṛtamadadhata tato devā amṛtā abhavan -

9.5.1.9.5.1.8

tadyattadamṛtaṃ somaḥ saḥ / tadadyāpi yajamānaḥ śrameṇa tapasānvicchati sa dīkṣitvā payovrato bhavatyetadvai tapo yo dīkṣitvā payovrato'sattasya ghoṣamāśṛṇotītyahe kraya iti -

9.5.1.9.5.1.9

sa trīntstanānupaiti / tatparāpaśyati sa dvau stanā upaiti tannedīyasaḥ parāpaśyati sa ekaṃ stanamupaiti tadadhigacchati na tvabhipattuṃ śaknoti sa upavasathe'nāśakamupaityetadvai sarvaṃ tapo yadanāśakastasmādupavasathe nāśnīyāt -

9.5.1.9.5.1.10

tatprātarabhipadya / abhiṣutyāgnau juhoti tadagnāvamṛtaṃ dadhātyatha bhakṣayati tadātmannamṛtaṃ dhatte so'mṛto bhavatyetadvai manuṣyasyāmṛtatvaṃ yatsarvamāyureti tatho hānenātmanā sarvamāyureti -

9.5.1.9.5.1.11

agnau hutvātha bhakṣayati / daivo vā asyaiṣa ātmā mānuṣo'yaṃ devā u vā agre'tha manuṣyāstasmādagnau hutvātha bhakṣayati -

9.5.1.9.5.1.12

९.५.१.१२ atha samiṣṭayajurmīmāṃsā
athātaḥ samiṣṭayajuṣāmeva mīmāṃsā / devāścāsurāścobhaye prājāpatyāḥ prajāpateḥ piturdāyamupeyurvācameva satyānṛte satyaṃ caivānṛtaṃ ca ta ubhaya eva satyamavadannubhaye'nṛtaṃ te ha sadṛśaṃ vadantaḥ sadṛśā evāsuḥ -

9.5.1.9.5.1.13

te devā utsṛjyānṛtam / satyamanvālebhire'surā u hotsṛjya satyamanṛtamanvālebhire -

9.5.1.9.5.1.14

taddhedaṃ satyamīkṣāṃ cakre / yadasureṣvāsa devā vā utsṛjyānṛtaṃ satyamanvālapsata hanta tadayānīti taddevānājagāma -

9.5.1.9.5.1.15

anṛtamu hekṣāṃ cakre / yaddeveṣvāsāsurā vā utsṛjya satyamanṛtamanvālapsata hanta tadayānīti tadasurānājagāma -

9.5.1.9.5.1.16

te devāḥ / sarvaṃ satyamavadantsarvamasurā anṛtaṃ te devā āsakti satyaṃ vadanta aiṣāvīratarā ivāsuranāḍhyatarā iva tasmādu haitadya āsakti satyaṃ vadatyaiṣāvīratara ivaiva bhavatyanāḍhyatara iva sa ha tvevāntato bhavati devā hyevāntato'bhavan -

9.5.1.9.5.1.17

atha hāsurāḥ / āsaktyanṛtaṃ vadanta ūṣa iva pipiśurāḍhyā ivāsustasmādu haitadya āsaktyanṛtaṃ vadatyūṣa ivaiva piśyatyāḍhya iva bhavati parā ha tvevāntato bhavati parā hyasurā abhavan -

9.5.1.9.5.1.18

tadyattatsatyam / trayī sā vidyā te devā abruvanyajñaṃ kṛtvedaṃ satyaṃ tanavāmahā iti -

9.5.1.9.5.1.19

te dīkṣaṇīyāṃ niravapan / tadu hāsurā anububudhire yajñaṃ vai kṛtvā taddevāḥ satyaṃ tanvate preta tadāhariṣyāmo yadasmākaṃ tatreti tasya samiṣṭayajurahutamāsāthājagmustasmāttasya yajñasya samiṣṭayajurna juhvati te devā asurānpratidṛśya samullupya yajñamanyatkartuṃ dadhrire'nyadvai kurvantīti punaḥ preyuḥ -

9.5.1.9.5.1.20

teṣu preteṣu / prāyaṇīyaṃ niravapaṃstadu hāsurā anveva bubudhire tasya śaṃyoruktamāsāthājagmustasmātsa yajñaḥ śaṃyvantaste devā asurānpratidṛśya samullupya yajñamanyadeva kartuṃ dadhrire'nyadvai kurvantīti punareva preyuḥ -

9.5.1.9.5.1.21

teṣu preteṣu / rājānaṃ krītvā paryuhyāthāsmā ātithyaṃ havirniravapaṃstadu hāsurā anveva bubudhire tasyeḍopahūtā''sāthājagmustasmātsa yajña iḍāntaste devā asurānpratidṛśya samullupya yajñamanyadeva kartuṃ dadhrire'nyadvai kurvantīti punareva preyuḥ -

9.5.1.9.5.1.22

teṣu preteṣu / upasado'tanvata te tisra eva sāmidhenīranūcya devatā evāyajanna prayājānnānuyājānubhayato yajñasyodasādayanbhūyiṣṭhaṃ hi tatrātvaranta tasmādupasatsu tisra eva sāmidhenīranūcya devatā eva yajati na prayājānnānuyājānubhayato yajñasyotsādayati -

9.5.1.9.5.1.23

ta upavasathe'gnīṣomīyaṃ paśumālebhire / tadu hāsurā anveva bubudhire tasya samiṣṭayajūṃṣyahutānyāsurathājagmustasmāttasya paśoḥ samiṣṭayajūṃṣi na juhvati te devā asurānpratidṛśya samullupya yajñamanyadeva kartuṃ dadhrire/ anyadvai kurvantīti punareva preyuḥ// -

9.5.1.9.5.1.24

teṣu preteṣu / prātaḥ prātaḥsavanamatanvata tadu hāsurā anveva bubudhire tasyaitāvatkṛtamāsa yāvatprātaḥsavanamathājagmuste devā asurānpratidṛśya samullupya yajñamanyadeva kartuṃ dadhrire/ anyadvai kurvantīti punareva preyuḥ// -

9.5.1.9.5.1.25

teṣu preteṣu / mādhyandinaṃ savanamatanvata tadu hāsurā anveva bubudhire tasyaitāvatkṛtamāsa yāvanmādhyandinamathājagmuste devā asurānpratidṛśya samullupya yajñamanyadeva kartuṃ dadhrire/ anyadvai kurvantīti punareva preyuḥ// -

9.5.1.9.5.1.26

teṣu pretaṣu / savanīyena paśunā'caraṃstadu hāsurā anveva bubudhire tasyaitāvatkṛtamāsa yāvadetasya paśoḥ kriyate'thājagmuste devā asurānpratidṛśya samullupya yajñamanyadeva kartuṃ dadhrire/ anyadvai kurvantīti punareva preyuḥ// -

9.5.1.9.5.1.27

teṣu preteṣu / tṛtīyasavanamatanvata tatsamasthāpayanyatsamasthāpayaṃstatsarvaṃ satyamāpnuvaṃstato'surā apapupruvire tato devā abhavanparāsurā bhavatyātmanā parā'sya dviṣanbhrātṛvyo bhavati ya evaṃ veda -

9.5.1.9.5.1.28

te devā abruvan / ye na ime yajñāḥ sāmisaṃsthitā yānimānvijahato'gāmopa tajjānīta yathemāntsaṃsthāpayāmeti te'bruvaṃścetayadhvamiti citimicchateti vāva tadabruvaṃstadicchata yathemānyajñāntsaṃsthāpayāmeti -

9.5.1.9.5.1.29

te cetayamānāḥ / etāni samiṣṭayajūṃṣyapaśyaṃstānyajuhavustairetānyajñāntsamasthāpayanyatsamasthāpayaṃstasmātsaṃsthitayajūṃṣyatha yatsamayajaṃstasmātsamiṣṭayajūṃṣi -

9.5.1.9.5.1.30

te vā ete nava yajñāḥ / navaitāni samiṣṭayajūṃṣi tadyadetāni juhotyetānevaitadyajñāntsaṃsthāpayatyubhayāni juhotyadhvarasya cāgneścādhvarasya pūrvāṇyathāgnestasyokto bandhuḥ -

9.5.1.9.5.1.31

dve agnerjuhoti / dvipādyajamāno yajamāno'gniryāvānagniryāvatyasya mātrā tāvataivaitadyajñaṃ saṃsthāpayatīṣṭo yajño bhṛgubhiriṣṭo agnirāhutaḥ pipartu na iti -

9.5.1.9.5.1.32

tānyubhayānyekādaśa sampadyante / ekādaśākṣarā triṣṭubvīryaṃtriṣṭubvīryamevaitadyajñamabhisampādayati -

9.5.1.9.5.1.33

yadvevaikādaśa / ekādaśākṣarā vai triṣṭuptraiṣṭubha indra indro yajñasyātmendro devatā tadya eva yajñasyātmā yā devatā tasminnevaitadyajñamantataḥ pratiṣṭhāpayati -

9.5.1.9.5.1.34

९.५.१.३४ atha devikāhavīṃṣi
samiṣṭayajūṃṣi hutvāvabhṛthaṃ yanti / avabhṛthādudetyodayanīyena caritvānūbandhyasya paśupuroḍāśamanu devikānāṃ havīṃṣi nirvapati -

9.5.1.9.5.1.35

etadvai prajāpatiḥ / prāpya rāddhvevāmanyata sa dikṣu pratiṣṭhāyedaṃ sarvaṃ dadhadvidadhadatiṣṭhadyaddadhadvidadhadatiṣṭhattasmāddhātā tathaivaitadyajamāno dikṣu pratiṣṭhāyedaṃ sarvaṃ dadhadvidadhattiṣṭhati -

9.5.1.9.5.1.36

yadvevaitāni havīṃṣi nirvapati / diśa eṣo'gnistā u evāmūḥ purastāddarbhastambaṃ ca logeṣṭakāścopadadhāti tāḥ prāṇabhṛtaḥ prathamāyāṃ citau sarvaiva dvitīyā sarvā tṛtīyā sarvā caturthyatha pañcamyai citerasapatnā nākasadaḥ pañcacūḍāstā ūrdhvā utkrāmantya āyaṃstābhyaḥ prajāpatirabibhetsarvaṃ vā idamimāḥ parācyo'tyeṣyantītitā dhātā bhūtvā paryagacchattāsu pratyatiṣṭhat -

9.5.1.9.5.1.37

sa yaḥ sa dhātāsau sa ādityaḥ / atha yattaddiśāṃ paramaṃ krāntametattadyasminneṣa etatpratiṣṭhitastapati -

9.5.1.9.5.1.38

sa yaḥ sa dhātāyameva sa dhātraḥ / dvādaśakapālaḥ puroḍāśo dvādaśakapālo dvādaśamāsāḥ saṃvatsaraḥ saṃvatsaraḥ prajāpatiḥ prajāpatirdhātātha yattaddiśāṃ paramaṃ krāntametāni tāni pūrvāṇi havīṃṣyanumatyai carū rākāyai caruḥ sinīvālyai caruḥ kuhvyai carustadyadetāni nirvapati yadeva taddiśāṃ paramaṃ krāntaṃ tasminnevainametatpratiṣṭhāpayati taṃ sarvaṃ juhotyetasyaiva kṛtsnatāyai -

9.5.1.9.5.1.39

tā vā etā devyaḥ / diśo hyetāśchandāṃsi vai diśaśchandāṃsi devyo'thaiṣa kaḥ prajāpatistadyaddevyaśca kaśca tasmāddevikāḥ pañca bhavanti pañca hi diśaḥ -

9.5.1.9.5.1.40

tadāhuḥ / naitāni havīṃṣi nirvapennedatirecayānīti tāni vai nirvapedeva kāmebhyo vā etāni havīṃṣi nirupyante na vai kāmānāmatiriktamasti yadvai kiṃ ca paśupuroḍāśamanu havirnirupyate paśāveva sa madhyato medho dhīyata ubhayāni nirvapatyadhvarasya cāgneścādhvarasya pūrvamathāgnestasyokto bandhuruccaiḥ paśupuroḍāśo bhavatyupāṃśvetānīṣṭirhyanubrūhi preṣyeti paśupuroḍāśasyāhānubrūhi yajetyeteṣāmiṣṭirhi samānaḥ sviṣṭakṛtsamānīḍā -

9.5.1.9.5.1.41

tasya vā etasya paśoḥ / juhvati samiṣṭayajūṃṣyabhyavayanti hṛdayaśūlenāvabhṛthaṃ saṃsthā hyeṣa paśurhṛdayaśūlena caritvā -

9.5.1.9.5.1.42

pratyetya vaiśvakarmaṇāni juhoti / viśvāni karmaṇyayamagnistānyasyātra sarvāṇi karmāṇi kṛtāni bhavanti tānyetatprīṇāti tāni haviṣā devatāṃ karoti yasyai vai devatāyai havirgṛhyate sā devatā na sā yasyai na gṛhyate'tho viśvakarmāyamagnistamevaitatprīṇāti -

9.5.1.9.5.1.43

९.५.१.४३ atha vaiśvakarmaṇahomaḥ
yadveva vaiśvakarmaṇāni juhoti / prāyaṇaṃ ca hāgnerudayanaṃ ca sāvitrāṇi prāyaṇaṃ vaiśvakarmaṇānyudayanaṃ sa yatsāvitrāṇyeva juhuyānna vaiśvakarmaṇāni yathā prāyaṇameva kuryānnodayanaṃ tādṛktadatha yadvaiśvakarmaṇānyeva juhuyānna sāvitrāṇi yathodayanameva kuryānna prāyaṇaṃ tādṛktadubhayāni juhoti prāyaṇaṃ ca tadudayanaṃ ca karoti -

9.5.1.9.5.1.44

aṣṭāvamūni bhavanti / evamimāni tadyathā prāyaṇaṃ tathodayanaṃ karoti svāhākāro'mīṣāṃ navamo bhavatyevameṣāṃ tadyathā prāyaṇaṃ tathodayanaṃ karotyāhutiramīṣāṃ daśamī bhavatyevameṣāṃ tadyathā prāyaṇaṃ tathodayanaṃ karoti saṃtatāṃ tatrāhutiṃ juhoti reto vai tatra yajño retaso'vicchedāya sruveṇeha svāhākāraṃ niruktaṃ hi reto jātaṃ bhavati -

9.5.1.9.5.1.45

yadākūtāt / samasusroddhṛdo vā manaso vā sambhṛtaṃ cakṣuṣo vetyetasmāddhyetatsarvasmādagre karma samabhavattadanu preta sukṛtāmu lokaṃ yatra ṛṣayo jagmuḥ prathamajāḥ purāṇā ityamūnetadṛṣīnāha -

9.5.1.9.5.1.46

etaṃ sadhastha / pari te dadāmīti svargo vai lokaḥ sadhasthastadenaṃ svargāya lokāya paridadāti yamāvahācchevadhiṃ jātavedāḥ anvāgantā yajñapatirvo atra taṃ sma jānīta parame vyomanniti yathaiva yajustathā bandhuḥ -

9.5.1.9.5.1.47

etaṃ jānātha / parame vyomandevāḥ sadhasthā vida rūpamasya yadāgacchātpathibhirdevayānairiṣṭāpūrte kṛṇavāthāvirasmā iti yathaiva yajustathābandhurudbudhyasvāgne yena vahasīti tayorukto bandhuḥ -

9.5.1.9.5.1.48

prastareṇa paridhinā / srucā vedyā ca barhiṣā ṛcemaṃ yajñaṃ no naya svardeveṣu gantava ityetairno yajñasya rūpaiḥ svargaṃ lokaṃ gamayetyetat -

9.5.1.9.5.1.49

yaddattaṃ yatparādānam / yatpūrtaṃ yāśca dakṣiṇāḥ tadagnirvaiśvakarmaṇaḥ svardeveṣu no dadhaditi yaccaiva samprati dadhmo yaccāsamprati tanno'yamagnirvaiśvakarmaṇaḥ svarge loke dadhātvityetat -

9.5.1.9.5.1.50

yatra dhārā anapetāḥ / madhorghṛtasya ca yāḥ tadagnirvaiśvakarmaṇaḥ svardeveṣu no dadhaditi yathaiva yajustathā bandhuḥ -

9.5.1.9.5.1.51

aṣṭau vaiśvakarmaṇāni juhoti / aṣṭākṣarā gāyatrī gāyatro'gniryāvānagniryāvatyasya mātrā tāvataivainametadannena prīṇāti -

9.5.1.9.5.1.52

vaiśvakarmaṇāni hutvā nāma karoti / yadā vai sarvaḥ kṛtsno jāto bhavatyatha nāma kurvantyatra vā eṣa sarvaḥ kṛtsno jāto bhavati -

9.5.1.9.5.1.53

nāma kṛtvāthainamupatiṣṭhate / sarveṇa vā eṣa etamātmanā cinoti sa yadetāmatrātmanaḥ paridāṃ na vadetātra haivāsyaiṣa ātmānaṃ vṛñjītātha yadetāmatrātmanaḥ paridāṃ vadate tatho hāsyaiṣa ātmānaṃ na vṛṅkte ye agnayaḥ pāñcajanyā asyāṃ pṛthivyāmadhi teṣāmasi tvamuttamaḥ pra no jīvātave suveti ye kecāgnayaḥ pañcacitikā asyāṃ pṛthivyāmadhi teṣāmasi tvaṃ sattamaḥ proasmāñjīvanāya suvetyetadanuṣṭubhā vāgvā anuṣṭubvāgu sarvāṇi chandāṃsi sarvairevāsmā etacchandobhirnihnuta upasthāyāgniṃ samārohya nirmathyodavasānīyayā yajate -

9.5.1.9.5.1.54

atha maitrāvaruṇyā payasyayā yajate / devatrā vā eṣa bhavati ya etatkarma karoti daivamvetanmithunaṃ yanmitrāvaruṇau sa yadetayāniṣṭvā mānuṣyāṃ caretpratyavarohaḥ sa yathā daivaḥ sanmānuṣaḥ syāttādṛktadatha yadetayā maitrāvaruṇyā payasyayā yajate daivamevaitanmithunamupaityetayeṣṭvā kāmaṃ yathāpratirūpaṃ caret -

9.5.1.9.5.1.55

yadvevaitayā maitrāvaruṇyā payasyayā yajate / prajāpatervisrastādretaḥ parāpatattaṃ yatra devāḥ samaskurvaṃstadasminnetayā maitrāvaruṇyā payasyayā reto'dadhustathaivāsminnayametaddadhāti -

9.5.1.9.5.1.56

sa yaḥ sa prajāpatirvyasraṃsata / ayameva sa yo'yamagniścīyate'tha yadasmāttadretaḥ parāpatadeṣā sā payasyā maitrāvaruṇī bhavati prāṇodānau vai mitrāvaruṇau prāṇodānā u vai retaḥ siktaṃ vikurutaḥ payasyā bhavati payo hi reto yajño bhavati yajño hyeva yajñasya reta upāṃśu bhavatyupāṃśu hi retaḥ sicyate'ntato bhavatyantato hi reto dhīyate -

9.5.1.9.5.1.57

tasyai vājinena caranti / tasmindakṣiṇāṃ dadhāti tūparau mithunau dadyādityabhyājñāya naivamanya iti ha smāha māhitthiḥ sravatyu haiṣāgnicita āhutiḥ somāhutiryāmaniṣṭake juhoti -

9.5.1.9.5.1.58

sa svayamātṛṇṇā evopadadhīta / ime vai lokāḥ svayamātṛṇṇā ima u lokā eṣo'gniścitaḥ -

9.5.1.9.5.1.59

ṛtavyā evopadadhīta / saṃvatsaro vā ṛtavyāḥ saṃvatsara eṣo'gniścitaḥ -

9.5.1.9.5.1.60

viśvajyotiṣa evopadadhīta / etā vai devatā viśvajyotiṣa etā u devatā eṣo'gniścitaḥ -

9.5.1.9.5.1.61

९.५.१.६१ atha gārhapatyasya punaścitiḥ
punaścitimevopadadhīta / punaryajño haiṣa uttarā haiṣā devayajyā punaryajñamevaitadupadhatta uttarāmeva devayajyāmupa hainaṃ punaryajño na tathā kuryādyo vāva cite'gnirnidhīyate tāmeveṣṭakāmeṣa sarvo'gnirabhisampadyate tadyadagnau juhoti tadevāsya yathā sarvasmiñchāṇḍile'gnau saṃcite pakṣapucchavatyāhutayo hutāḥ syurevamasyaitā āhutayo hutā bhavanti -

9.5.1.9.5.1.62

९.५.१.६२ atha ukhyasambharaṇamīmāṃsā
sarvāṇi vā eṣa bhūtāni / sarvāndevāngarbho bhavati yo'gniṃ bibharti sa yo'saṃvatsarabhṛtaṃ cinuta etāni ha sa sarvāṇi bhūtāni garbhaṃ bhūtaṃ nirhate yo nveva mānuṣaṃ garbhaṃ nirhanti tannveva paricakṣate'tha kiṃ ya etaṃ daivo hyeṣa nāsaṃvatsarabhṛtasya'rtvijā bhavitavyamiti ha smāha vātsyo nedasya devaretasasya nirhaṇyamānasya medyasānīti -

9.5.1.9.5.1.63

ṣaṇmāsyamantamaṃ cinvītetyāhuḥ / ṣaṇmāsyā vā antamā garbhā jātā jīvantīti sa yadyasaṃvatsarabhṛte mahadukthaṃ śaṃsedṛgaśītīḥ śaṃsedasarvaṃ vaitadyadasaṃvatsarabhṛto'sarvaṃ tadyadṛgaśītayo vikṛṣṭaṃ tvenaṃ sa bhūyo vikarṣedyadi caiva saṃvatsarabhṛtaḥ syādyadi cāsaṃvatsarabhṛtaḥ sarvameva mahadukthaṃ śaṃset -

9.5.1.9.5.1.64

atha ha śāṇḍilyāyanaḥ prācyāṃ jagāma / taṃ ha daiyāmpātiruvāca śāṇḍilyāyana kathamagniścetavyo glāyāmo'ha saṃvatsarabhṛtāyāgnimu cikīṣāmaha iti -

9.5.1.9.5.1.65

sa hovāca / kāmaṃ nvā enaṃ sa cinvīta yena purā saṃvatsaraṃ bhṛtaḥ syāttaṃ hyeva taṃ bhṛtaṃ santaṃ cinuta iti -

9.5.1.9.5.1.66

kāmamvevainaṃ sa cinvīta / yaḥ saṃvatsaramabhiṣaviṣyantsyādeṣa vā enaṃ pratyakṣamannena bibhartyetābhirāhutibhiḥ -

9.5.1.9.5.1.67

kāmamvevainaṃ sa cinvīta / yaḥ saṃvatsaramagnihotraṃ juhuyādbibharti vā enameṣa yo'gnihotraṃ juhoti -

9.5.1.9.5.1.68

kāmamvevainaṃ sa cinvīta / yaḥ saṃvatsaraṃ jātaḥ syātprāṇo vā agnistametadbibhartyatha ha vai retaḥ siktaṃ prāṇo'nvavarohati tadvindate tadyajjātaṃ jātaṃ vindate tasmājjātavedāstasmādapyevaṃvitkāmaṃ sadyobhṛtaṃ cinvīta yadu ha vā evaṃvitpibati vā pāyayati vā tadevāsya yathā sarvasmiñchāṇḍile'gnau saṃcite pakṣapucchavatyāhutayo hutāḥ syurevamasyaitā āhutayo hutā bhavanti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0