Shatapatha Brahmana · Chapter 9.4.1

९.४.१ rāṣṭrabhṛddhomaḥ
athāto rāṣṭrabhṛto juhoti / rājāno vai rāṣṭrabhṛtaste hi rāṣṭrāṇi bibhratyetā ha devatāḥ sutā etena savena yenaitatsoṣyamāṇo bhavati tā evaitatprīṇāti tā asmā iṣṭāḥ prītā etaṃ savamanumanyante tābhiranumataḥ sūyate yasmai vai rājāno rājyamanumanyante sa rājā bhavati na sa yasmai na tadyadrājāno rāṣṭrāṇi bibhrati rājāna u ete devāstasmādetā rāṣṭrabhṛtaḥ -

yadvevaitā rāṣṭrabhṛto juhoti /prajāpatervisrastānmithunānyudakrāmangandharvāpsaraso bhūtvā tāni ratho bhūtvā paryagacchattāni parigatyātmannadhattātmannakuruta tathaivainānyayametatparigatyātmandhatta ātmankurute -

sa yaḥ sa prajāpatirvyasraṃsata / ayameva sa yo'yamagniścīyate'tha yānyasmāttāni mithunānyudakrāmannetāstā devatā yābhya etajjuhoti -

gandharvāpsarobhyo juhoti / gandharvāpsaraso hi bhūtvodakrāmannnatho gandhena ca vai rūpeṇa ca gandharvāpsarasaścaranti tasmādyaḥ kaśca mithunamupapraiti gandhaṃ caiva sa rūpaṃ ca kāmayate -

mithunāni juhoti / mithunādvā adhi prajātiryo vai prajāyate sa rāṣṭraṃ bhavatyarāṣṭraṃ vai sa bhavati yo na prajāyate tadyanmithunāni rāṣṭraṃ bibhrati mithunā u ete devāstasmādetā rāṣṭrabhṛta ājyena dvādaśagṛhītena tā u dvādaśaivāhutayo bhavanti tasyokto bandhuḥ -

puṃse pūrvasmai juhoti / atha strībhyaḥ pumāṃsaṃ tadvīryeṇātyādadhātyekasmā iva puṃse juhoti bahvībhya iva strībhyastasmādapyekasya puṃso bahvyo jāyā bhavantyubhābhyāṃ vaṣaṭkāreṇa ca svāhākāreṇa ca puṃse juhoti svāhākāreṇaiva strībhyaḥ pumāṃsameva tadvīryeṇātyādadhāti -

ṛtāṣāḍṛtadhāmeti / satyasāṭ satyadhāmetyetadagnirgandharvastasyauṣadhayo'psarasa ityagnirha gandharva oṣadhibhirapsarobhirmithunena sahoccakrāma mudo nāmetyoṣadhayo vai muda oṣadhibhirhīdaṃ sarvaṃ modate sa na idaṃ brahmakṣatraṃ pātu tasmai svāhā vāṭtābhyaḥ svāheti tasyokto bandhuḥ -

saṃhita iti / asau vā ādityaḥ saṃhita eṣa hyahorātre saṃdadhāti viśvasāmetyeṣa hyeva sarvaṃ sāma sūryo gandharvastasya marīcayo'psarasa iti sūryo ha gandharvo marīcibhirapsarobhirmithunena sahoccakrāmāyuvo nāmetyāyuvānā iva hi marīcayaḥ plavante sa na idaṃ brahma kṣatraṃ pātviti tasyokto bandhuḥ -

suṣumṇa iti / suyajñiya ityetatsūryaraśmiriti sūryasyeva hi candramaso raśmayaścandramā gandharvastasya nakṣatrāṇyapsarasa iti candramā ha gandharvo nakṣatrairapsarobhirmithunena sahoccakrāma bhekurayo nāmeti bhākurayo ha nāmaite bhāṃ hi nakṣatrāṇi kurvanti sa na idaṃ brahma kṣatraṃ pātviti tasyokto bandhuḥ -

iṣira iti / kṣipra ityetadviśvavyacā ityeṣa hīdaṃ sarvaṃ vyacaḥ karoti vāto gandharvastasyāpo apsarasa iti vāto ha gandharvo'dbhirapsarobhirmithunena sahoccakrāmorjo nāmetyāpo vā ūrjo'dbhyo hyūrgjāyate sa na idaṃ brahma kṣatraṃ pātviti tasyokto bandhuḥ -

bhujyuḥ suparṇa iti / yajño vai bhujyuryajño hi sarvāṇi bhūtāni bhunakti yajño gandharvastasya dakṣiṇā apsarasa iti yajño ha gandharvo dakṣiṇābhirapsarobhirmithunena sahoccakrāma stāvā nāmeti dakṣiṇā vai stāvā dakṣiṇābhirhi yajña stūyate'tho yo vai kaśca dakṣiṇāṃ dadāti stūyata eva sa sa na idaṃ brahma kṣatraṃ pātviti tasyokto bandhuḥ -

prajāpatirviśvakarmeti / prajāpatirvai viśvakarmā sa hīdaṃ sarvamakaronmano gandharvastasya ṛksāmānyapsarasa iti mano ha gandharva ṛksāmairapsarobhirmithunena sahoccakrāmeṣṭayo nāmetyṛksāmāni vā eṣṭaya ṛksāmairhyāśāsata iti no'stvitthaṃ no'stviti sa na idaṃ brahma kṣatraṃ pātviti tasyokto bandhuḥ -

atha rathaśīrṣe juhoti / eṣa vai sa sava etadvai tatsūyate yamasmai tametā devatāḥ savamanumanyante yābhiranumataḥ sūyate yasmai vai rājāno rājyamanumanyante sa rājā bhavati na sa yasmai nājyena pañcagṛhītena tā u pañcaivāhutayo hutā bhavanti tasyokto bandhuḥ -

śīrṣataḥ / śīrṣato vā abhiṣicyamāno'bhiṣicyata upari dhāryamāṇa upari hi sa yametadabhiṣiñcati samānena mantreṇa samāno hi sa yametadabhiṣiñcati sarvataḥ parihāraṃ sarvata evainametadabhiṣiñcati -

yadveva rathaśīrṣe juhoti / asau vā āditya eṣa ratha etadvai tadrūpaṃ kṛtvā prajāpatiretāni mithunāni parigatyātmannadhattātmannakuruta tathaivainānyayametatparigatyātmandhatta ātmankuruta upari dhāryamāṇa upari hi sa ya etāni mithunāni parigatyātmannadhattātmannakuruta samānena mantreṇa samāno hi sa ya etāni mithunāni parigatyātmannadhattātmannakuruta sarvataḥ parihāraṃ sarvato hi sa ya etāni mithunāni parigatyātmannadhattātmannakuruta -

sa no bhuvanasya pate prajāpata iti / bhuvanasya hyeṣa patiḥ prajāpatiryasya ta upari gṛhā yasya vehetyupari ca hyetasya gṛhā iha cāsmai brahmaṇe'smai kṣatrāyetyayaṃ vā agnirbrahma ca kṣatraṃ ca mahi śarma yaccha svāheti mahaccharma yaccha svāhetyetat -