Shatapatha Brahmana · Chapter 9.3.4

९.३.४ vājaprasavīyahomaḥ
athāto vājaprasavīyaṃ juhoti / annaṃ vai vājo'nnaprasavīyaṃ hāsyaitadannamevāsmā etena prasauti -

etadvā enaṃ devāḥ / etenānnena prītvaitaiḥ kāmairabhiṣicyaitayā vasordhārayāthainametadbhūya evāprīṇaṃstathaivainamayametadetenānnena prītvaitaiḥ kāmairabhiṣicyaitayā vasordhārayā'thainametadbhūya eva prīṇāti -

yadvevaitadvājaprasavīyaṃ juhoti / abhiṣeka evāsyaiṣa etadvā enaṃ devā etenānnena prītvaitaiḥ kāmairabhiṣicyaitayā vasordhārayā'thainametadbhūya evābhyaṣiñcaṃstathaivainamayametadetenānnena prītvaitaiḥ kāmairabhiṣicyaitayā vasordhārayā'thainametadbhūya evābhiṣiñcati -

sarvauṣadhaṃ bhavati / sarvametadannaṃ yatsarvauṣadhaṃ sarveṇaivainametadannena prīṇātyatho sarveṇaivainametadannenābhiṣiñcati teṣāmekamannamuddharettasya nāśnīyādyāvajjīvamaudumbareṇa camasenaudumbareṇa sruveṇa tayorukto bandhuścatuḥsraktī bhavataścatasro vai diśaḥ sarvābhya evainametaddigbhyo'nnena prīṇātyatho sarvābhya evainametaddigbhyo'nnenābhiṣiñcati -

yadvevaitadvājaprasavīyaṃ juhoti / etā ha devatāḥ sutā etena savena yenaitatsoṣyamāṇo bhavati tā evaitatprīṇāti tā asmā iṣṭāḥ prītā etaṃ savamanumanyante tābhiranumataḥ sūyate yasmai vai rājāno rājyamanumanyante sa rājā bhavati na sa yasmai na tadyadagnau juhoti tadagnimabhiṣiñcatyatho yadetābhyo devatābhyo juhoti tadu tāndevānprīṇāti ya etasya savasyeśate -

atha vā etatpārthānyapi juhoti / etadvai devā akāmayantātraiva sarvaiḥ savaiḥ sūyemahīti te'traiva sarvaiḥ savairasūyanta tathaivaitadyajamāno'traiva sarvaiḥ savaiḥ sūyate -

tadyāni pārthāni / tāni rājasūyasya vājaprasavīyaṃ tadyattāni juhoti tadrājasūyena sūyate'tha yāni caturdaśottarāṇi tato yāni sapta pūrvāṇi tāni vājapeyasya vājaprasavīyaṃ tadyattāni juhoti tadvājapeyena sūyate'tha yāni saptottarāṇi tānyagnestadyattāni juhoti tadagnisavena sūyate -

sa vai rājasūyasya pūrvāṇi juhoti / atha vājapeyasya rājā vai rājasūyeneṣṭvā bhavati samrāḍvājapeyena rājyamu vā agre'tha sāmrājyaṃ tasmādvājapeyeneṣṭvā na rājasūyena yajeta pratyavarohaḥ sa yathā samrāṭ sanrājā syāttādṛktat -

agneruttamāni juhoti / sarve haite savā yadagnisavaḥ sarvaṃ haitadagnisavena suto bhavati rājā ca samrāṭca tasmādagneruttamāni juhoti -

९.३.४.१० abhiṣekaḥ
athainaṃ kṛṣṇājine'bhiṣiñcati / yajño vai kṛṣṇājinaṃ yajña evainametadabhiṣiñcati lomataśchandāṃsi vai lomāni chandaḥsvevainametadabhiṣiñcatyuttaratastasyopari bandhuḥ prācīnagrīve taddhi devatrā -

taṃ haike dakṣiṇato'gnerabhiṣiñcanti / dakṣiṇato vā annasyopacārastadenamannasyārdhādabhiṣiñcāma iti na tathā kuryādeṣā vai dikpitṝṇāṃ kṣipre haitāṃ diśaṃ praiti yaṃ tathābhiṣiñcanti -

āhavanīya u haike'bhiṣiñcanti / svargo vai loka āhavanīyastadenaṃ svarge loke'bhiṣiñcāma iti na tathā kuryāddaivo vā asyaiṣa ātmā mānuṣo'yamanena hāsya te martyenātmanaitaṃ daivamātmanaitaṃ daivamātmānamanuprasajanti yaṃ tathā'bhiṣiñcanti -

uttarata evainabhiṣiñcet / eṣā hobhayeṣāṃ devamanuṣyāṇāṃ digyadudīcī prācī svāyāmevainametaddiśyāyattaṃ pratiṣṭhitamabhiṣiñcati na vai sva āyatane pratiṣṭhito riṣyati -

āsīnaṃ bhūtamabhiṣiñcet / āsta iva vai bhūtastiṣṭhantaṃ bubhūṣantaṃ tiṣṭhatīva vai bubhūṣanbastājine puṣṭikāmamabhiṣiñcetkṛṣṇājine brahmavarcasakāmamubhayorubhayakāmaṃ taduttarataḥ pucchasyottaraloma prācīnagrīvamupastṛṇāti -

āspṛṣṭaṃ pariśritaḥ / tadyatkṛṣṇājinamāspṛṣṭaṃ pariśrito bhavati tatho hāsyaiṣa daiva ātmā kṛṣṇājine'bhiṣikto bhavatyatha yadenamanvārabdhamagniṃ tiṣṭhantamabhiṣiñcati tathā haitasmāddaivādabhiṣekānna vyavacchidyate -

agnau hutvāthainamabhiṣiñcati / daivo vā asyaiṣa ātmā mānuṣo'yaṃ devā u vā agre 'tha manuṣyāstasmādagnau hutvāthainaṃ tasyaiva pariśiṣṭenābhiṣiñcatyatra taṃ sruvamanuprāsyati -

athainaṃ dakṣiṇaṃ bāhumanuparyāvṛtyābhiṣiñcati / devasya tvā savituḥ prasave'śvinorbāhubhyāṃ pūṣṇo hastābhyāṃ sarasvatyai vāco yanturyantreṇāgneḥ sāmrājyenābhiṣiñcāmīti vāgvai sarasvatī tasyā idaṃ sarvaṃ yantraṃ savitṛprasūta evainametadanena sarveṇa sarasvatyai vāco yanturyantreṇāgneḥ sāmrājyenābhiṣiñcatyatra taṃ camasamanuprāsyati yadatra viliptaṃ tannedbahirddhā'gnerasaditi -

taṃ vai madhye pārthānāmabhiṣiñcati / saṃvatsaro vai pārthāni saṃvatsarasyaivainametanmadhyata ādadhāti ṣaṭpurastājjuhoti ṣaḍupariṣṭātṣaḍvā ṛtava ṛtubhirevainametatatsuṣuvāṇamubhayataḥ parigṛhṇāti bṛhaspatiḥ pūrveṣāmuttamo bhavatīndra uttareṣāṃ prathamo brahma vai bṛhaspatiḥ kṣatramindro brahmaṇā caivainametatkṣatreṇa ca suṣuvāṇamubhayataḥ parigṛhṇāti -