Scripture Library

Shatapatha Brahmana · Chapter 9.3.3

9.3.3.9.3.3.1

athaitānyajñakratūñjuhoti / agniśca me gharmaśca ma ityetairevainametadyajñakratubhiḥ prīṇātyatho etairevainametadyajñakratubhirabhiṣiñcati -

9.3.3.9.3.3.2

athāyuja stomāñjuhoti / etadvai devāḥ sarvānkāmānāptvā'yugbhi stomaiḥ svargaṃ lokamāyaṃstathaivaitadyajamānaḥ sarvānkāmānāptvā'yugbhi stomaiḥ svargaṃ lokameti -

9.3.3.9.3.3.3

tadvai trayastriṃśāditi / anto vai trayastriṃśo'yujāṃ stomānāmantata eva taddevāḥ svargaṃ lokamāyaṃstathaivaitadyajamāno'ntata eva svargaṃ lokameti -

9.3.3.9.3.3.4

atha yugmato juhoti / etadvai chandāṃsyabruvanyātayāmā vā ayuja stomā yugmabhirvayaṃ stomaiḥ svargaṃ lokamayāmeti tāni yugmabhi stomaiḥ svargaṃ lokamāyaṃstathaivaitadyajamāno yugmabhi stomaiḥ svargaṃ lokameti -

9.3.3.9.3.3.5

tadvā aṣṭācatvariṃśāditi / anto vā aṣṭācatvāriṃśo yugmatāṃ stomānāmantata eva tacchandāṃsi svargaṃ lokamāyaṃstathaivaitadyajamāno'ntata eva svargaṃ lokameti -

9.3.3.9.3.3.6

sa āha / ekā ca me tisraśca me catasraśca me'ṣṭau ca ma iti yathā vṛkṣaṃ rohannuttarāmuttarāṃ śākhāṃ samālambhaṃ rohettādṛktadyadveva stomāñjuhotyannaṃ vai stomā annenaivainametadabhiṣiñcati -

9.3.3.9.3.3.7

atha vayāṃsi juhoti / paśavo vai vayāṃsi paśubhirevainametadannena prīṇātyatho paśubhirevainametadannenābhiṣiñcati -

9.3.3.9.3.3.8

atha nāmagrāhaṃ juhoti / etadvai devāḥ sarvānkāmānāptvā'thaitameva pratyakṣamaprīṇaṃstathaivaitadyajamānaḥ sarvānkāmānāptvāthaitameva pratyakṣaṃ prīṇāti vājāya svāhā prasavāya svāheti nāmānyasyaitāni nāmagrāhamevainametatprīṇāti -

9.3.3.9.3.3.9

trayodaśaitāni nāmāni bhavanti / trayodaśa māsāḥ saṃvatsarastrayodaśāgneścitipurīṣāṇi yāvānagniryāvatyasya mātrā tāvataivainametatprīṇāti yadveva nāmagrāhaṃ juhoti nāmagrāhamevainametadabhiṣiñcati -

9.3.3.9.3.3.10

athāha / iyaṃ te rāṇmitrāya yantāsi yamana ūrje tvā vṛṣṭyai tvā prajānāṃ tvā''dhipatyāyetyannaṃ vā ūrgannaṃ vṛṣṭirannenaivainametatprīṇāti -

9.3.3.9.3.3.11

yadvevāha / iyaṃ te rāṇmitrāya yantā'si yamana ūrje tvā vṛṣṭyai tvā prajānāṃ tvā''dhipatyāyetīdaṃ te rājyamabhiṣikto'sītyetanmitrasya tvaṃ yantā'si yamana ūrje cano'si vṛṣṭyai ca no'si prajānāṃ ca na ādhipatyāyāsītyupabruvata evainametadetasmai naḥ sarvasmā asyetasmai tvā sarvasmā abhyaṣicāmahīti tasmādu hedaṃ mānuṣaṃ rājānamabhiṣiktamupabruvate -

9.3.3.9.3.3.12

atha kalpāñjuhoti / prāṇā vai kalpāḥ prāṇānevāsminnetaddadhātyāyuryajñena kalpatāṃ prāṇo yajñena kalpatāmityetānevāsminnetatkḷptānprāṇāndadhāti -

9.3.3.9.3.3.13

dvādaśa kalpāñjuhoti / dvādaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvataivāsminnetatkḷptānprāṇāndadhāti yadveva kalpāñjuhoti prāṇā vai kalpā amṛtamu vai prāṇā amṛtenaivainametadabhiṣiñcati -

9.3.3.9.3.3.14

athāha stomaśca yajuśca ṛkca sāma sa bṛhacca rathantaraṃ ceti trayī haiṣā vidyānnaṃ vai trayī vidyānnenaivainametatprīṇātyatho annenaivainametadabhiṣiñcati svardevā aganmāmṛtā' abhūmeti svarhi gacchatyamṛto hi bhavati prajāpateḥ prajā abhūmeti prajāpaterhi prajā bhavati veṭsvāheti vaṣaṭkāro haiṣa paro'kṣaṃ yadveṭkāro vaṣaṭkāreṇa vā vai svāhākāreṇa vā devebhyo'nnaṃ pradīyate tadenametābhyāmubhābhyāṃ prīṇāti vaṣaṭkāreṇa ca svāhākāreṇa cātho etābhyāmevainametadubhābhyāmabhiṣiñcatyatra tāṃ srucamanuprāsyati yadatrājyaliptaṃ tannedbahirddhāgnerasaditi -

9.3.3.9.3.3.15

tasyai vā etasyai vasordhārāyai / dyaurevātmābhramūdho vidyutstano dhāraiva dhārā divo'dhi gāmāgacchati -

9.3.3.9.3.3.16

tasyai gaurevātmā / ūdha evodha stana stano dhāraiva dhārā goradhi yajamānam -

9.3.3.9.3.3.17

tasyai yajamāna evātmā / bāhurūdhaḥ srukstano dhāraiva dhārā yajamānādadhi devāndevebhyo'dhi gāṃ goradhi yajamānaṃ tadetadanantamakṣayyaṃ devānāmannaṃ pariplavate sa yo haitadevaṃ vedaivaṃ haivāsyaitadanantamakṣayyamannaṃ bhavatyathātaḥ sampadeva -

9.3.3.9.3.3.18

tadāhuḥ / kathamamasyaiṣā vasordhārā saṃvatsaramagnimāpnoti kathaṃ saṃvatsareṇāgninā sampadyata iti ṣaṣṭiśca ha vai trāṇi ca śatānyeṣā vasordhārātha ṣaḍatha pañcatriṃśattato yāni ṣaṣṭiśca trīṇi ca śatāni tāvanti saṃvatsarasyāhāni tatsaṃvatsarasyāhānyāpnotyatha yāni ṣaṭṣaḍvā ṛtavastadṛtūnāṃ rātrīrāpnoti tadubhayāni saṃvatsarasyāhorātrāṇyāpnotyatha yāni pañcatriṃśatsa trayodaśo māsaḥ sa ātmā triṃśadātmā pratiṣṭhā dve prāṇā dve śira eva pañcatriṃśametāvānvai saṃvatsara evamu hāsyaiṣā vasordhārā saṃvatsaramagnimāpnotyevaṃ saṃvatsareṇāgninā sampadyata etāvatya u vai śāṇḍile'gnau madhyato yajuṣmatya iṣṭakā upadhīyante'gnayo haite pṛthagyadetā iṣṭakā evamu hāsyaite'gnayaḥ pṛthagvasordhārayābhihutā bhavanti -

9.3.3.9.3.3.19

tadāhuḥ / kathamasyaiṣā vasordhārā mahadukthamāpnoti kathaṃ mahatokthena sampadyata ityetasyā eva vasordhārāyai yāni nava prathamāni yajūṃṣi tattrivṛcchiro'tha yānyaṣṭācatvāriṃśattau caturviṃśau pakṣāvatha yāni pañcaviṃśatiḥ sa pañcaviṃśa ātmātha yānyekaviṃśatistadekaviṃśaṃ pucchamatha yāni trayastriṃśatsa vaśo'tha yā aśītayaḥ saivāśītīnāmāptiraśītibhirhi mahadukthamākhyāyate'tha yadūrdhvamaśītibhyo yadevādo mahata ukthasyordhvamaśītibhya etadasya tadevamu hāsyaiṣā vasordhārā mahadukthamāpnotyevaṃ mahatokthena sampadyate -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0