Scripture Library

Shatapatha Brahmana · Chapter 9.3.2

9.3.2.9.3.2.1

vasordhārā homam
९.३.२ vasordhārāhomaḥ
athāto vasordhārāṃ(vā.saṃ. १८.१) juhoti / atraiṣa sarvo'gniḥ saṃskṛtaḥ sa eṣo'tra vasustasmai devā etāṃ dhārāṃ prāgṛhṇaṃstayainamaprīṇaṃstadyadetasmai vasava etāṃ dhārāṃ prāgṛhṇaṃstasmādenāṃ vasordhāretyācakṣate tathaivāsmā ayametāṃ dhārāṃ pragṛhṇāti tayainaṃ prīṇāti -

9.3.2.9.3.2.2

yadvevaitāṃ vasordhārāṃ juhoti / abhiṣeka evāsyaiṣa etadvā enaṃ devāḥ sarvaṃ kṛtsnaṃ saṃskṛtyāthainametaiḥ kāmairabhyaṣiñcannetayā vasordhārayā tathaivainamayametatsarvaṃ kṛtsnaṃ saṃskṛtyāthainametaiḥ kāmairabhiṣiñcatyetayā vasordhārayājyena pañcagṛhītenaudumbaryā srucā tasyokto bandhuḥ -

9.3.2.9.3.2.3

vaiśvānaraṃ hutvā / śiro vai vaiśvānaraḥ śīrṣṇo vā annamadyate'tho śīrṣato vā'abhiṣicyamāno'bhiṣicyate mārutānhutvā prāṇā vai mārutāḥ prāṇairu vā annamadyate'tho prāṇeṣu vā abhiṣicyamāno'bhiṣicyate -

9.3.2.9.3.2.4

tadvā araṇye'nūcye / vāgvā araṇye'nūcyo vāco vā annamadyate'tho vācā vā'abhiṣicyamāno'bhiṣicyate tadetatsarvaṃ vasu sarve hyete kāmāḥ saiṣā vasumayī dhārā yathā kṣīrasya vā sarpiṣo vaivamārabhyāyaiveyamājyāhutirhūyate tadyadeṣā vasumayī dhārā tasmādenāṃ vasordhāretyācakṣate -

9.3.2.9.3.2.5

sa āha / idaṃ ca ma idaṃ ca ma ityanena ca tvā prīṇāmyanena cānena ca tvā'bhiṣiñcāmyanena cetyetadatho idaṃ ca me dehīdaṃ ca ma iti sā yadaivaiṣā dhārāgniṃ prāpnuyādathaitadyajuḥ pratipadyeta -

9.3.2.9.3.2.6

etadvā enaṃ devāḥ / etenānnena prītvaitaiḥ kāmairabhiṣicyaitayā vasordhārayā'thainametānkāmānayācanta tebhya iṣṭaḥ prīto'bhiṣikta etānkāmānprāyacchattathaivainamayadetenānnena prītvaitaiḥ kāmairabhiṣicyaitayā vasordhārayā'thainametānkāmānyācate tasmā iṣṭaḥ prīto'bhiṣikta'etānkāmānprayacchati dvaudvau kāmau saṃyunaktyavyavacchedāya yathā vyokasau saṃyuñjyādevaṃ yajñena kalpantāmiti -

9.3.2.9.3.2.7

etadvai devā abruvan / kenemānkāmānpratigrahīṣyāma ityātmanaivetyabruvanyajño vai devānāmātmā yajña u eva yajamānasya sa yadāha yajñena kalpantāmityātmanā me kalpantāmityevaitadāha -

9.3.2.9.3.2.8

dvādaśasu kalpayati / dvādaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvataivainametadannena prīṇātyatho tāvataivainametadannenābhiṣiñcati caturdaśasu kalpayatyaṣṭāsu kalpayati daśasu kalpayati trayodaśasu kalpayati -

9.3.2.9.3.2.9

athottarahomāḥ
athārdhendrāṇi juhoti / sarvametadyadardhendrāṇi sarveṇaivainametatprīṇātyatho sarveṇaivainametadabhiṣiñcati -

9.3.2.9.3.2.10

atha grahāñjuhoti / yajño vai grahā yajñenaivainametadannena prīṇātyatho yajñenaivainametadannenābhiṣiñcati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0