Shatapatha Brahmana · Chapter 8.7.4

atha svayamātṛṇṇāsu sāmāni gāyati / ime vai lokāḥ svayamātṛṇṇāstā etāḥ śarkarāstā devā upadhāyaitādṛśīrevāpaśyanyathaitāḥ śuṣkāḥ śarkarāḥ -

te'bruvan / upa tajjānīta yathaiṣu lokeṣu rasamupajīvanaṃ dadhāmeti te'bruvaṃścetayadhvamiti citimicchateti vāva tadabruvaṃstadicchata yathaiṣu lokeṣu rasamupajīvanaṃ dadhāmeti -

te cetayamānāḥ / etāni sāmānyapaśyaṃstānyagāyaṃstaireṣu lokeṣu rasamupajīvanamadadhustathaivaitadyajamāno yadetāni sāmāni gāyatyeṣvevaitallokeṣu rasamupajīvanaṃ dadhāti -

svayamātṛṇṇāsu gāyati / ime vai lokāḥ svayamātṛṇṇā eṣvevaitallokeṣu rasamupajīvanaṃ dadhāti -

sa vai bhūrbhuvaḥ svariti / etāsu vyāhṛtiṣu gāyati bhūriti vā ayaṃ loko bhuva ityantarikṣalokaḥ svarityasau loka eṣvevaitallokeṣu rasamupajīvanaṃ dadhāti -

tāni vai nānāprastāvāni / samānanidhanāni tāni yannānāprastāvāni nānāhyapaśyannatha yatsamānanidhanānyekā hyeva yajñasya pratiṣṭhaikaṃ nidhanaṃ svarga eva lokastasmātsvarjyotirnidhanāni -

athainaṃ hiraṇyaśakalaiḥ prokṣati / atraiṣa sarvo'gniḥ saṃskṛtastasmindevā etadamṛtaṃ rūpamuttamadadhustathaivāsminnayametadamṛtaṃ rūpamuttamaṃ dadhāti -

yadvevainaṃ hiraṇyaśakalaiḥ prokṣati / etadvā asminnado'mūṃ purastādramyāṃ tanūṃ madhyato dadhāti rukmaṃ ca puruṣaṃ cāthainametatsarvamevopariṣṭādramyayā tanvā pracchādayati -

dvābhyāṃdvābhyāṃ śatābhyām / dvipādyajamāno yajamāno'gniryāvānagniryāvatyasya mātrā tāvataivāsminnetadamṛtaṃ rūpamuttamaṃ dadhāti pañca kṛtvaḥ pañcacitiko'gniḥ pañca'rtavaḥ saṃvatsaraḥ saṃvatsaro'gniryāvānagniryāvatyasya mātrā tāvataivāsminnetadamṛtaṃ rūpamuttamaṃ dadhāti sahasreṇa sarvaṃ vai sahasraṃ sarveṇaivāsminnetadamṛtaṃ rūpamuttamaṃ dadhāti -

paścādagre prāṅtiṣṭhan / athottarato dakṣiṇātha purastātpratyaṅṅatha jaghanena parītya dakṣiṇata udaṅtiṣṭhaṃstaddakṣiṇāvṛttaddhi devatrāthānuparītya paścātprāṅtiṣṭhaṃstatho hāsyaitatprāgeva karma kṛtaṃ bhavati -

sahasrasya pramāsi / sahasrasya pratimāsi sahasrasyonmāsi sāhasro'si sahasrāya tveti
sarvaṃ vai sahasraṃ sarvamasi sarvasmai tvetyetat -

athātaścitipurīṣāṇāmeva mīmāṃsā / ayameva lokaḥ prathamā citiḥ paśavaḥ purīṣaṃ yatprathamāṃ citiṃ purīṣeṇa pracchādayatīmaṃ tallokaṃ paśubhiḥ pracchādayati -

antarikṣameva dvitīyā citiḥ / vayāṃsi purīṣaṃ yaddvitīyāṃ citiṃ purīṣeṇa pracchādayatyantarikṣaṃ tadvayobhiḥ pracchādayati -

dyaureva tṛtīyā citiḥ / nakṣatrāṇi purīṣaṃ yattṛtīyāṃ citiṃ purīṣeṇa pracchādayati divaṃ tannakṣatraiḥ pracchādayati -

yajña eva caturthī citiḥ / dakṣiṇāḥ purīṣaṃ yaccaturthī citiṃ purīṣeṇa pracchādayati yajñaṃ taddakṣiṇābhiḥ pracchādayati -

yajamāna eva pañcamī citiḥ / prajā purīṣaṃ yatpañcamīṃ citiṃ purīṣeṇa pracchādayati yajamānaṃ tatprajayā pracchādayati -

svarga eva lokaḥ ṣaṣṭhī citiḥ / devāḥ purīṣaṃ yatṣaṣṭhīṃ citiṃ purīṣeṇa pracchādayati svargaṃ tallokaṃ devaiḥ pracchādayati -

amṛtameva saptamī citiḥ tāmuttamāmupadadhātyamṛtaṃ tadasya sarvasyottamaṃ dadhāti tasmādasya sarvasyāmṛtamuttamaṃ tasmāddevā anantarhitāstasmādu te'mṛtā ityadhidevatam -

athādhyātmam / yaiveyaṃ pratiṣṭhā yaścāyamavāṅprāṇastatprathamā citirmāṃsampurīṣaṃ yatprathamāṃ citiṃ purīṣeṇa pracchādayatyetasya tadātmano māṃsaiḥ saṃcchādayatīṣṭakā upadhāyāsthīṣṭakā asthi tanmāṃsaiḥ saṃcchādayati nādhastātsaṃcchādayati tasmādime prāṇā adhastādasaṃcchannā upariṣṭāttu pracchādayatyetadasya tadātmana upariṣṭānmāṃsaiḥ saṃcchādayati tasmādasyaitadātmana upariṣṭānmāṃsaiḥ saṃcchannaṃ nāvakāśate -

yadūrdhvaṃ pratiṣṭhāyā avācīnaṃ madhyāt / taddvitīyā citirmāṃsaṃ purīṣaṃ yaddvitīyāṃ citiṃ purīṣeṇa pracchādayatyetadasya tadātmano māṃsaiḥ saṃcchādayatīṣṭakā upadhāyāsthīṣṭakā asthi tanmāṃsaiḥ saṃcchādayati purīṣa upadadhāti purīṣeṇa pracchādayatyetadasya tadātmana ubhayato māṃsaiḥ saṃcchādayati tasmādasyaitadātmana ubhayato māṃsaiḥ saṃcchannaṃ nāvakāśate -

madhyameva tṛtīyā citiḥ / yadūrdhvaṃ madhyādavācīnaṃ grīvābhyastaccaturthī citirgrīvā eva pañcamī citiḥ śira eva ṣaṣṭhī citiḥ prāṇā eva saptamī citistāmuttamāmupadadhāti prāṇāṃstadasya sarvasyottamāndadhāti tasmādasya sarvasya prāṇā uttamāḥ purīṣa upadadhāti māṃsaṃ vai purīṣaṃ māṃsena tatprāṇānpratiṣṭhāpayati nopariṣṭātpracchādayati tasmādime prāṇā upariṣṭādasaṃcchannāḥ -