Shatapatha Brahmana · Chapter 8.5.4

sarvato aṣāḍhāyā velāyāṃ stomabhāgānāmupadhānam

tā aṣāḍhāyai velayopadadhāti / vāgvā aṣāḍhā rasa eṣa vāci tadrasaṃ dadhāti tasmātsarveṣāmaṅgānāṃ vācaivānnasya rasaṃ vijānāti -

yadvevāṣāḍhāyai / iyaṃ vā aṣāḍhā'sāvāditya stomabhāgā amuṃ tadādityamasyāṃ pratiṣṭhāyāṃ pratiṣṭhāpayati -

yadvevāṣāḍhāyai / iyaṃ vā aṣāḍhā hṛdayaṃ stomabhāgā asyāṃ taddhṛdayaṃ mano dadhāti tasmādasyāṃ hṛdayena manasā cetayate sarvata upadadhāti sarvatastaddhṛdayaṃ mano dadhāti tasmādasyāṃ sarvato hṛdayena manasā cetayate'tho puṇyā haitā lakṣmyastā etatsarvato dhatte tasmādyasya sarvato lakṣma bhavati taṃ puṇyalakṣmīka ityācakṣate -

athaināḥ purīṣeṇa pracchādayati / annaṃ vai purīṣaṃ rasa eṣa tametattiraḥ karoti tasmāttira ivānnasya rasaḥ -

yadveva purīṣeṇa / annaṃ vai purīṣaṃ rasa eṣo'nnaṃ ca tadrasaṃ ca saṃtanoti saṃdadhāti -

yadveva purīṣeṇa / hṛdayaṃ vai stomabhāgāḥ purītatpurīṣaṃ hṛdayaṃ tatpurītatā pracchādayati -

yadveva purīṣeṇa / saṃvatsara eṣo'gnistametaccitipurīṣairvyāvartayati tadyāścatasraḥ prathamāścitayaste catvāra ṛtavo'tha stomabhāgā upadhāya purīṣaṃ nivapati sā pañcamī citiḥ sa pañcama ṛtuḥ -

tadāhuḥ / yallokampṛṇāntā anyāścitayo bhavanti nātra lokampṛṇāmupadadhāti kā'tra lokampṛṇetyasau vā ādityo lokampṛṇaiṣa u eṣā citiḥ saiṣā svayaṃ lokampṛṇā citiratha yadata ūrdhvamā purīṣātsā ṣaṣṭhī citiḥ sa ṣaṣṭha ṛtuḥ -

atha purīṣaṃ nivapati / tatra vikarṇīṃ ca svayamātṛṇṇāṃ copadadhāti hiraṇyaśakalaiḥ prokṣatyagnimabhyādadhāti sā saptamī citiḥ sa saptama ṛtuḥ -

tā u vai ṣaḍeva / yaddhi vikarṇī ca svayamātṛṇṇā ca ṣaṣṭhyā eva tacciteḥ -

tā u vai pañcaiva / yajuṣā'nyāsu purīṣaṃ nivapati tūṣṇīmatra tenaiṣā na citiratholokampṛṇāntā anyāścitayo bhavanti nātra lokampṛṇāmupadhāti teno evaiṣā na citiḥ -

tā u vai tisra eva / ayameva lokaḥ prathamā citirdyauruttamātha yā etāstisrastadantarikṣaṃ tadvā idamekamivaivāntarikṣaṃ tā evaṃ tisra evaṃ pañcaivaṃ ṣaḍevaṃ sapta -