શતપથબ્રાહ્મણમ્ · અધ્યાય 8.5.4

સર્વતો અષાઢાયા વેલાયાં સ્તોમભાગાનામુપધાનમ્

તા અષાઢાયૈ વેલયોપદધાતિ । વાગ્વા અષાઢા રસ એષ વાચિ તદ્રસં દધાતિ તસ્માત્સર્વેષામઙ્ગાનાં વાચૈવાન્નસ્ય રસં વિજાનાતિ -

યદ્વેવાષાઢાયૈ । ઇયં વા અષાઢાઽસાવાદિત્ય સ્તોમભાગા અમું તદાદિત્યમસ્યાં પ્રતિષ્ઠાયાં પ્રતિષ્ઠાપયતિ -

યદ્વેવાષાઢાયૈ । ઇયં વા અષાઢા હૃદયં સ્તોમભાગા અસ્યાં તદ્ધૃદયં મનો દધાતિ તસ્માદસ્યાં હૃદયેન મનસા ચેતયતે સર્વત ઉપદધાતિ સર્વતસ્તદ્ધૃદયં મનો દધાતિ તસ્માદસ્યાં સર્વતો હૃદયેન મનસા ચેતયતેઽથો પુણ્યા હૈતા લક્ષ્મ્યસ્તા એતત્સર્વતો ધત્તે તસ્માદ્યસ્ય સર્વતો લક્ષ્મ ભવતિ તં પુણ્યલક્ષ્મીક ઇત્યાચક્ષતે -

અથૈનાઃ પુરીષેણ પ્રચ્છાદયતિ । અન્નં વૈ પુરીષં રસ એષ તમેતત્તિરઃ કરોતિ તસ્માત્તિર ઇવાન્નસ્ય રસઃ -

યદ્વેવ પુરીષેણ । અન્નં વૈ પુરીષં રસ એષોઽન્નં ચ તદ્રસં ચ સંતનોતિ સંદધાતિ -

યદ્વેવ પુરીષેણ । હૃદયં વૈ સ્તોમભાગાઃ પુરીતત્પુરીષં હૃદયં તત્પુરીતતા પ્રચ્છાદયતિ -

યદ્વેવ પુરીષેણ । સંવત્સર એષોઽગ્નિસ્તમેતચ્ચિતિપુરીષૈર્વ્યાવર્તયતિ તદ્યાશ્ચતસ્રઃ પ્રથમાશ્ચિતયસ્તે ચત્વાર ઋતવોઽથ સ્તોમભાગા ઉપધાય પુરીષં નિવપતિ સા પઞ્ચમી ચિતિઃ સ પઞ્ચમ ઋતુઃ -

તદાહુઃ । યલ્લોકમ્પૃણાન્તા અન્યાશ્ચિતયો ભવન્તિ નાત્ર લોકમ્પૃણામુપદધાતિ કાઽત્ર લોકમ્પૃણેત્યસૌ વા આદિત્યો લોકમ્પૃણૈષ ઉ એષા ચિતિઃ સૈષા સ્વયં લોકમ્પૃણા ચિતિરથ યદત ઊર્ધ્વમા પુરીષાત્સા ષષ્ઠી ચિતિઃ સ ષષ્ઠ ઋતુઃ -

અથ પુરીષં નિવપતિ । તત્ર વિકર્ણીં ચ સ્વયમાતૃણ્ણાં ચોપદધાતિ હિરણ્યશકલૈઃ પ્રોક્ષત્યગ્નિમભ્યાદધાતિ સા સપ્તમી ચિતિઃ સ સપ્તમ ઋતુઃ -

તા ઉ વૈ ષડેવ । યદ્ધિ વિકર્ણી ચ સ્વયમાતૃણ્ણા ચ ષષ્ઠ્યા એવ તચ્ચિતેઃ -

તા ઉ વૈ પઞ્ચૈવ । યજુષાઽન્યાસુ પુરીષં નિવપતિ તૂષ્ણીમત્ર તેનૈષા ન ચિતિરથોલોકમ્પૃણાન્તા અન્યાશ્ચિતયો ભવન્તિ નાત્ર લોકમ્પૃણામુપધાતિ તેનો એવૈષા ન ચિતિઃ -

તા ઉ વૈ તિસ્ર એવ । અયમેવ લોકઃ પ્રથમા ચિતિર્દ્યૌરુત્તમાથ યા એતાસ્તિસ્રસ્તદન્તરિક્ષં તદ્વા ઇદમેકમિવૈવાન્તરિક્ષં તા એવં તિસ્ર એવં પઞ્ચૈવં ષડેવં સપ્ત -