Shatapatha Brahmana · Chapter 8.5.3

८.५.३ athaikonatriṃśatstomabhāgeṣṭakopadhānam
atha stomabhāgā upadadhāti / etadvai prajāpateretadannamindro'bhyadhyāyatso'smādudacikramiṣattamabravītkathotkrāmasi kathā mā jahāsīti sa vai me'syānnasya rasaṃ prayaccheti tena vai mā saha prapadyasveti tatheti tasmā etasyānnasya rasaṃ prāyacchattenainaṃ saha prāpadyata -

sa yaḥ sa prajāpatiḥ / ayameva sa yo'yamagniścīyate'tha yattadannametāstāśchandasyā atha yaḥ so'nnasya rasa etāstā stomabhāgā atha yaḥ sa indro'sau sa ādityaḥ sa eṣa eva stomo yaddhi kiṃ ca stuvata etameva tena stuvanti tasmā etasmai stomāyaitaṃ bhāgaṃ prāyacchattadyadetasmai stomāyaitaṃ bhāgaṃ prāyacchattasmātstomabhāgāḥ -

raśminā satyāya satyaṃ jinveti / eṣa vai raśmirannaṃ raśmiretaṃ ca tadrasaṃ ca saṃdhāyātmanprapādayate pretinā dharmaṇā dharmaṃ jinvetyeṣa vai pretirannaṃ pretiretaṃ ca tadrasaṃ ca saṃdhāyātmanprapādayate'nvityā divā divaṃ jinvetyeṣa vā anvitirannamanvitiretaṃ ca tadrasaṃ ca saṃdhāyātmanprapādayate tadyadyadetadāha tacca tadrasaṃ ca saṃdhāyātmanprapādayate'munā'do jinvādo'syamuṣmai tvā'dhipatinorjorjaṃ jinveti tredhāvihitāstredhāvihitaṃ hyannam -

yadveva stomabhāgā upadadhāti / etadvai devā virājaṃ citiṃ citvā samārohaṃste'bruvaṃścetayadhvamiti citimicchateti vāva tadabruvaṃste cetayamānā nākameva svargaṃ lokamapaśyaṃstamupādadhata sa yaḥ sa nākaḥ svargo loka etāstā stomabhāgāstadyadetā upadadhāti nākamevaitatsvargaṃ lokamupadhatte -

tadyāstisraḥ prathamāḥ / ayaṃ sa loko yā dvitīyā antarikṣaṃ tadyāstṛtīyā dyauḥ sā yāścaturthyaḥ prācī sā digyāḥ pañcamyo dakṣiṇā sā yāḥ ṣaṣṭhyaḥ pratīcī sā yāḥ saptamya udīcī sā -

tā vā etāḥ / ekaviṃśatiriṣṭakā ime ca lokā diśaśceme ca vai lokā diśaśca pratiṣṭheme ca lokā diśaścaikaviṃśastasmādāhuḥ pratiṣṭhaikaviṃśa iti -

atha yā aṣṭāviṣṭakā atiyanti / sāṣṭākṣarā gāyatrī brahma gāyatrī tadyattadbrahmaitattadyadetanmaṇḍalaṃ tapati tadetasminnekaviṃśe pratiṣṭhāyāṃ pratiṣṭhitaṃ tapati tasmānnāvapadyate -

taddhaike / veṣaśrīḥ kṣatrāya kṣatraṃ jinveti triṃśattamīmupadadhati triṃśadakṣarā virāḍvirāḍeṣā citiriti na tathā kuryādati te recayantyekaviṃśasampadamatho gāyatrīsampadamatho indraloko haiṣa yaiṣā nyūnā virāḍindrāya ha ta indraloke dviṣantaṃ bhrātṛvyaṃ pratyudyāminaṃ kurvantīndramindralokānnudante yajamāno vai sve yajña indro yajamānāya ha te yajamānaloke dviṣantaṃ bhrātṛvyaṃ pratyudyāminaṃ kurvanti yajamānaṃ yajamānalokānnudante yaṃ vā etamagnimāharantyeṣa eva yajamāna āyatanenaiṣa u evātra triṃśattamī -