Shatapatha Brahmana · Chapter 8.3.4

atha vālakhilyā upadadhāti / prāṇā vai vālakhilyāḥ prāṇānevaitadupadadhāti tā yadvālakhilyā nāma yadvā urvarayorasambhinnaṃ bhavati khila iti vai tadācakṣate vālamātrādu heme prāṇā asambhinnāste yadvālamātrādasambhinnāstasmādvālakhilyāḥ -

sa vai sapta purastādupadadhāti / sapta paścāttadyāḥ sapta purastādupadadhāti ya eveme sapta purastātprāṇāstānasminnetaddadhāti -

atha yāḥ sapta paścāt / eṣāmevaitatprāṇānāmetānprāṇānpratipratīnkaroti tasmādyadebhirannamatti tadetairatyeti -

yadveva sapta purastādupadadhāti / sapta vā ime purastātprāṇāścatvāri dorbāhavāṇi śiro grīvā yadūrdhvaṃ nābhestatsaptamamaṅge'ṅge hi prāṇa ete vai sapta purastātprāṇāstānasminnetaddadhāti -

atha yāḥ sapta paścāt / sapta vā ime paścātprāṇāścatvāryūrvaṣṭhīvāni dvai pratiṣṭhe
yadavāṅnābhestatsaptamamaṅge'ṅge hi prāṇa ete vai sapta paścātprāṇāstānasminnetaddadhāti -

mūrddhāsi rāḍ / dhruvāsi dharuṇā dhartryasi dharaṇī yantrī rāḍyantryasi yamanī dhruvāsi dharitrītyetānevāsminnetaddhruvānprāṇānyacchati -

yadveva vālakhilyā upadadhāti / etadvai devā vālakhilyābhirevemāṃllokāntsamayuritaścordhvānamutaścārvācastathaivaitadyajamāno vālakhilyābhirevemāṃllokāntsaṃyātītaścordhvānamutaścārvācaḥ -

mūrddhāsi rāḍitīmaṃ lokamarohan / dhruvāsi dharuṇetyantarikṣalokaṃ dhartryasi dharaṇītyamuṃ dharaṇītyamuṃ lokamāyuṣe tvā varcase tvā kṛṣyai tvā kṣemāya tveti catvāraścatuṣpādāḥ paśavo'nnaṃ paśavasta etaiścaturbhiścatuṣpādaiḥ paśubhiretenānnenāmuṣmiṃloke pratyatiṣṭhaṃstathaivaitadyajamāna etaiścaturbhiścatuṣpādaiḥ paśubhiretenānnenāmuṣmiṃloke pratitiṣṭhati -

sa sa parāṅiva rohaḥ / iyamu vai pratiṣṭhā te devā imāṃ pratiṣṭhāmabhipratyāyaṃstathaivaitadyajamāna imāṃ pratiṣṭhāmabhipratyaiti -

yantrī rāḍityamuṃ lokamarohan / yantryasi yamanītyantarikṣalokaṃ dhruvā'si dharitrītīmaṃ lokamiṣe tvorje tvā rayyai tvā poṣāya tveti catvāraścatuṣpādāḥ paśavo'nnaṃ paśavasta etaiścaturbhiścatuṣpādaiḥ paśubhiretenānnenāsmiṃlloke pratyatiṣṭhaṃstathaivaitadyajamāna etaiścaturbhiścatuṣpādaiḥ paśubhiretenānnenāsmiṃloke pratitiṣṭhati -

athātaḥ saṃskṛtireva / yā amūrekādaśeṣṭakā upadadhāti yo'sau prathamo'nuvākastadantarikṣaṃ sa ātmā tadyattā ekādaśa bhavantyekādaśākṣarā vai triṣṭuptraiṣṭubhamantarikṣamatha yā uttarāḥ ṣaṣṭiḥ sa vāyuḥ sa prajāpatiḥ so'gniḥ sa yajamānaḥ -

tadyāḥ purastādupadadhāti / śiro'sya tāstā daśa bhavanti daśa vai prāṇāḥ prāṇā u vai
śiraḥ pūrvārdha upadadhāti purastāddhīdaṃ śiraḥ -

atha yā dakṣiṇataḥ / yadūrdhvaṃ madhyādavācīnaṃ śīrṣṇastadasya tā atha yāḥ paścādyadūrdhvaṃ pratiṣṭhāyā avācīnaṃ madhyāttadasya tāḥ pratiṣṭhaivottarataḥ -

tadyāḥ sapta purastādvālakhilyā upadadhāti / ya eveme sapta purastātprāṇāstānasminnetaddadhāti tā anantarhitā etābhyo daśabhya upadadhātyanantarhitāṃstacchīrṣṇaḥ prāṇāndadhāti -

atha yāḥ sapta paścāt / ya eveme sapta paścātprāṇāstānasminnetaddadhāti tā anantarhitā etābhyo dvādaśabhya upadadhātyanantarhitāṃstadātmanaḥ prāṇāndadhāti sa eṣa vāyuḥ prajāpatirasmiṃstraiṣṭubhe'ntarikṣe samantaṃ paryaknastadyattṛtīyāṃ citimupadadhāti vāyuṃ caiva tadantarikṣaṃ ca saṃskṛtyopadhatte'tha lokampṛṇe upadadhātyasyāṃ sraktyāṃ tayorupari bandhuḥ purīṣaṃ nivapati tasyopari bandhuḥ -