Shatapatha Brahmana · Chapter 8.1.4

tā haike puruṣamupārpyopadadhati / eṣa vai prāṇastametā bibhrati yatprāṇaṃ bibhrati tasmātprāṇabhṛta iti na tathā kuryādeṣo'haiva prāṇo ya eṣa hiraṇmayaḥ puruṣastasya tvayamātmā yāvadidamabhyayamagnirvihitastadyaddhāsyaitā aṅgaṃ nābhiprāpnuyuḥ prāṇo hāsya tadaṅgaṃ nābhiprāpnuyādyadu vai prāṇo'ṅgaṃ nābhiprāpnoti śuṣyati vā vai tanmlāyati vā tasmādenāḥ pariśritsvevopārpyopadadhyādatha yā madhya upadadhāti tābhirasyaiṣa ātmā pūrṇastā u evaitasmādanantarhitāḥ -

tadāhuḥ / yadayaṃ puro bhuvo'yaṃ dakṣiṇā viśvakarmāyaṃ paścādviśvavyacā idamuttarātsvariyamupari matiriti samprati diśo'bhyanūcyante'tha kasmādenā akṣṇayā deśeṣūpadadhātīti prāṇā vai prāṇabhṛtastā yatsamprati diśa upadadhyātprāgayaṃ haivāyaṃ prāṇaḥ saṃcaredatha yadenā evamabhyanūktāḥ satīrakṣṇayā deśeṣūpadadhāti tasmādayaṃ prāgayaṃ prāṇaḥ sannakṣṇayā sarvāṇyaṅgāni sarvamātmānamanusaṃcarati (akṣṇayā – vakragatyā – sāyaṇa) -

sa eṣa paśuryadagniḥ / so'traiva sarvaḥ kṛtsnaḥ saṃskṛtastasya yāḥ purastādupadadhāti tau bāhū atha yāḥ paścātte sakthyāvatha yā madhya upadadhāti sa ātmā tā retaḥsicorvelayopadadhāti pṛṣṭayo vai retaḥsicau madhyamu pṛṣṭayo madhyato hyayamātmā sarvata upadadhāti sarvato hyayamātmā -

tadāhuḥ / yatpūrveṣu gaṇeṣvekaikaṃ stomamekaikaṃ pṛṣṭhamupadadhātyatha kasmādatra dvau stomau dve pṛṣṭhe upadadhātītyātmā vā asyaiṣa ātmānaṃ tadaṅgānāṃ jyeṣṭhaṃ variṣṭhaṃ vīryavattamaṃ karoti tasmādayamātmāṅgānāṃ jyeṣṭho variṣṭho vīryavattamaḥ -

tadāhuḥ / kathamasyaiṣo'gniḥ sarvaḥ kṛtsna iṣṭakāyāmiṣṭakāyāṃ saṃskṛto bhavatīti majjā yajurasthīṣṭakā māṃsaṃ sādanaṃ tvaksūdadohā loma purīṣasya yajurannampurīṣamevamu hāsyaiṣo'gniḥ sarvaḥ kṛtsna iṣṭakāyāmiṣṭakāyāṃ saṃskṛto bhavati -

sa eṣa sārvāyuṣo'gniḥ / sa yo haitamevaṃ sārvāyuṣamagniṃ veda sarvaṃ haivāyureti -

athātaḥ samañcanaprasāraṇasyaiva / saṃcitaṃ haike samañcanaprasāraṇenetyabhimṛśanti paśureṣa yadagniryadā vai paśuraṅgāni saṃcāñcati pra ca sārayatyatha sa tairvīryaṃ karoti -

saṃvatsaro'si parivatsaro'si / idāvatsaro'sīdvatsaro'si vatsaro'si uṣasaste kalpantāmahorātrāste kalpantāmardhamāsāste kalpantāṃ māsāste kalpantāmṛtavaste kalpantāṃ saṃvatsaraste kalpatāṃ pretyā etyai saṃ cāñca pra ca sāraya suparṇacidasi tayā devatayāṅgirasvaddhruvaḥ sīdeti -

api ha smāha śāṭyāyaniḥ / sphoṭatorhaikaḥ pakṣayorupaśuśrāvaitenābhimṛṣṭasya tasmādenametenābhyeva mṛśediti -

atha ha smāha svarjinnāgnajitaḥ / nagnajidvā gāndhāraḥ prāṇo vai samañcanaprasāraṇaṃ yasminvā aṅge prāṇo bhavati tatsaṃ cāñcati pra ca sārayati saṃcitamevainaṃ bahiṣṭādabhyanyāttadasminprāṇaṃ samañcanaprasāraṇaṃ dadhāti tathā saṃ cāñcati pra ca sārayatīti tadahaiva samañcanaprasāraṇaṃ yatsa taduvāca rājanyabandhuriva tveva taduvāca yannu śataṃ kṛtvo'tho sahasrambahiṣṭādabhyanyurna vai tasmiṃste prāṇaṃ dadhyuryo vā ātmanprāṇaḥ sa eva prāṇastadyatprāṇabhṛta upadadhāti tadasminprāṇaṃ samañcanaprasāraṇaṃ dadhāti tathā saṃ cāñcati pra ca sārayatyatha lokampṛṇe upadadhātyasyāṃ sraktyāṃ tayoruparibandhuḥ purīṣaṃ nivapati tasyopari bandhuḥ -

(ityāhavanīyāgnicityāyāṃ pañcacitikāyāṃ prathamā citiḥ)