Shatapatha Brahmana · Chapter 8.1.3

tadāhuḥ / kiṃ prāṇāḥ kiṃ prāṇabhṛta iti prāṇā eva prāṇā aṅgāni prāṇabhṛntyaṅgāni hi prāṇānbibhrati prāṇāstveva prāṇā annaṃ prāṇabhṛdannaṃ hi prāṇānbibharti -

tadāhuḥ / kathamasyaitāḥ sarvāḥ prājāpatyā bhavantīti yadeva sarvāsvāha prajāpatigṛhītayā tvayetyevamu hāsyaitāḥ sarvāḥ prājāpatyā bhavanti -

tadāhuḥ / yadgrahāya gṛhītāya stuvate'tha śaṃsatyatha kasmātpurastādgrahāṇāmṛcaśca sāmāni copadadhātīti saṃsthā vai karmaṇo'nvīkṣitavya'rcā vai pratipadā graho gṛhyata ṛci sāma gīyate tadasyaitadyatpurastādgrahāṇāmṛcaśca sāmāni copadadhātyatha yadupariṣṭādgrahāṇāṃ stutaśastre bhavatastadvasyaitadyadupariṣṭādgrahāṇāṃ stomāṃśca pṛṣṭhāni copadadhāti -

tadāhuḥ / yadetattrayaṃ saha kriyate graha stotraṃ śastramathātra grahaṃ caiva stotraṃ copadadhāti kathamasyātrāpi śastramupahitaṃ yadvāva stotraṃ tacchastraṃ yāsu hyeva stuvate tā u evānuśaṃsatyevamu hāsyātrāpi śastramupahitaṃ bhavati -

tadāhuḥ / yadyathā pituḥ putramevaṃ trīṇi prathamānyāhātha kasmādṛksāmayoḥ saṃkrāmatīti sāma vā ṛcaḥ patistadyattatrāpi yathā pituḥ putramevaṃ brūyādyathā patiṃ santaṃ putraṃ brūyāttādṛktattasmādṛksāmayoḥ saṃkrāmati kasmādu triḥ saṃtanotīti pitaraṃ putraṃ pautraṃ tāṃstatsaṃtanoti tasmādu tebhya eka eva dadāti -

tadyāḥ purastādupadadhāti / tāḥ prāṇabhṛto'tha yāḥ paścāttāścakṣurbhṛtastā apānabhṛto'tha yā dakṣiṇatastā manobhṛtastā u vyānabhṛto'tha yā uttaratastāḥ śrotrabhṛtastā udānabhṛto'tha yā madhye tā vāgbhṛtastā u samānabhṛtaḥ -

tadu ha carakādhvaryavaḥ / anyā evāpānabhṛto vyānabhṛta udānabhṛtaḥ samānabhṛtaścakṣurbhṛto manobhṛtaḥ śrotrabhṛto vāgbhṛta ityupadadhati na tathā kuryādatyahaiva recayantyatro evaitāni sarvāṇi rūpāṇyupadhīyante -

sa vai purastādupadhāya paścādupadadhāti / prāṇo hāpāno bhūtvāṅgulyagrebhya iti saṃcaratyapāna u ha prāṇo bhūtvāṅgulyagrebhya iti saṃcarati tadyatpurastādupadhāya paścādupadadhātyenāvevaitatprāṇau saṃtanoti saṃdadhāti tasmādetau prāṇau saṃtatau saṃhitau -

atha dakṣiṇata upadhāyottarata upadadhāti / vyāno hodāno bhūtvāṅgulyagrebhya iti saṃcaratyudāna u ha vyāno bhūtvāṅgulyagrebhya iti saṃcarati tadyaddakṣiṇata upadhāyottarata upadadhātyetāvevaitatprāṇau saṃtanoti saṃdadhāti tasmādetau prāṇau saṃtatau saṃhitau -

atha yā madhya upadadhāti / sa prāṇastā retaḥsicorvelayopadadhāti pṛṣṭayo vai retaḥsicau madhyamu pṛṣṭayo madhyata evāsminnetatprāṇaṃ dadhāti sarvata upadadhāti sarvata evāsminnetatprāṇaṃ dadhātyatho evaṃ haiṣa gudaḥ prāṇaḥ samantaṃ nābhiṃ paryakno anūcīśca tiraścīścopadadhāti tasmādime'nvañcaśca tiryañcaścātmanprāṇāḥ saṃspṛṣṭā upadadhāti prāṇānevaitatsaṃtanoti saṃdadhāti tasmādime prāṇāḥ saṃtatāḥ saṃhitāḥ -