Shatapatha Brahmana · Verses 7.2-5

७.२.१ nairṛtīṣṭakācayanam
athāto nairṛtīrharanti / etadvai devā gārhapatyaṃ citvā samārohannayaṃ vai loko gārhapatya imameva taṃ lokaṃ saṃskṛtya samārohaṃste tama evānatidṛśyamapaśyan - ७.२.१.
te'bruvan / upa tajjānīta yathedaṃ tamaḥ pāpmānamapahanāmahā iti te'bruvaṃścetayadhvamiti citimicchateti vāva tadabruvaṃstadicchata yathedaṃ tamaḥ pāpmānamapahanāmahā iti - ७.२.१.
te cetayamānāḥ / etā iṣṭakā apaśyannairṛtīstā upādadhata tābhistattamaḥ pāpmānamapāghnata pāpmā vai nirṛtistadyadetābhiḥ pāpmānaṃ nirṛtimapāghnata tasmādetā nairṛtyaḥ - ७.२.१.
tadvā etatkriyate / yaddevā akurvannidaṃ nu tattamaḥ sa pāpmā devairevāpahato yattvetatkaroti yaddevā akurvaṃstatkaravāṇītyatho ya eva pāpmā yā nirṛtistametābhirapahate tadyadetābhiḥ pāpmānaṃ nirṛtimapahate tasmādetā nairṛtyaḥ - ७.२.१.
yadvevaitā nairṛtīrharanti / prajāpatiṃ visrastaṃ yatra devāḥ samaskurvaṃstamukhāyāṃ yonau reto bhūtamasiñcanyonirvā ukhā tasmā etāṃ saṃvatsare pratiṣṭhāṃ samaskurvannimameva lokamayaṃ vai loko gārhapatyastasminnenaṃ prājanayaṃstasya yaḥ pāpmā yaḥ śleṣmā yadulbaṃ yajjarāyu
tadasyaitābhirapāghnaṃstadyadasyaitābhiḥ pāpmānaṃ nirṛtimapāghnaṃstasmādetā nairṛtyaḥ - ७.२.१.
tathaivaitadyajamānaḥ / ātmānamukhāyāṃ yonau reto bhūtaṃ siñcati yonirvā ukhā tasmā etāṃ saṃvatsare pratiṣṭhāṃ saṃskarotīmameva lokamayaṃ vai loko gārhapatyastasminnenaṃ prajanayati tasya yaḥ pāpmā yaḥ śleṣmā yadulbaṃ yajjarāyu tadasyaitābhirapahanti tadyadasyaitābhiḥ pāpmānaṃ nirṛtimapahanti tasmādetā nairṛtyaḥ - ७.२.१.
pādamātryo bhavanti / adhaspadameva tatpāpmānaṃ nirṛtiṃ kurute'lakṣaṇā bhavanti yadvai nāsti tadalakṣaṇamasantameva tatpāpmānaṃ nirṛtiṃ kurute tuṣapakvā bhavanti nairṛtā vai tuṣā nairṛtaireva tannairṛtaṃ karma karoti kṛṣṇā bhavanti kṛṣṇaṃ hi tattama āsīdatho kṛṣṇā vai nirṛtiḥ - ७.२.१.
tābhiretāṃ diśaṃ yanti / eṣā vai nairṛtī diṅnairṛtyāmeva taddiśi nirṛtiṃ dadhāti sa
yatra svakṛtaṃ veriṇaṃ śvabhrapradaro vā syāttadenā upadadhyādyatra vā asyā avadīryate yatra vā'syā oṣadhayo na jāyante nirṛtirhāsyai tadgṛhṇāti naiṛta eva tadbhūmernirṛtiṃ dadhāti tāḥ parācīrlokabhājaḥ kṛtvopadadhāti - ७.२.१.
asunvantamayajamānamiccheti / yo vai na sunoti na yajate taṃ nirṛtirṛcchati stenasyetyāmanvihi taskarasyeti stenasya cetyāmanvihi taskarasya cetyetadatho yathā
stenastaskaraḥ pralāyametyevaṃ pralāyamihītyanyamasmadiccha sā ta ityetyanitthaṃ vidvāṃsamicchetyetannamo devi nirṛte tubhyamastviti namaskāreṇaivaināmapahate - ७.२.१.
namaḥ su te nirṛte tigmateja iti / tigmatejā vai nirṛtistasyā etannamaskarotyayasmayaṃ vicṛtā bandhametamityayasmayena ha vai taṃ bandhena nirṛtirbadhnāti yaṃ badhnāti yamena tvaṃ yamyā saṃvidānetyagnirvai yama iyaṃ yamyābhyāṃ hīdaṃ sarvaṃ yatamābhyāṃ tvaṃ saṃvidānetyetaduttame nāke adhirohayainamiti svargo vai loko nākaḥ svarge loke yajamānamadhirohayetyetat - ७.२.१.
yasyāste ghora āsañjuhomīti / ghorā vai nirṛtistasyā etadāsañjuhoti yattaddevatyaṃ
karma karotyeṣāṃ bandhānāmavasarjanāyeti yairbandhairbaddho bhavati yāṃ tvā jano bhūmiriti pramandata itīyaṃ vai bhūmirasyāṃ vai sa bhavati yo bhavati nirṛtiṃ tvā'haṃ pariveda viśvata iti nirṛtiriti tvā'haṃ pariveda sarvata ityetadiyaṃ vai nirṛtiriyaṃ vai te nirarpayati yo nirṛcchati tadyathā vai brūyādasāvāmuṣyāyaṇo'si veda tvā mā mā hiṃsīrityevametadāha natarāṃ hi vidita āmantrito hinasti - ७.२.१.
nopaspṛśati / pāpmā vai nirṛtirnetpāpmanā saṃspṛśā iti na sādayati pratiṣṭhā vai sādanaṃ netpāpmānaṃ pratiṣṭhāpayānīti na sūdadohasādhivadati prāṇo vai sūdadohā netpāpmānaṃ prāṇena saṃtanavāni saṃdadhānīti - ७.२.१.
tā haike parastādarvācīrupadadhati / pāpmā vai nirṛtirnetpāpmānaṃ nirṛtimanvavāyāmeti na tathā kuryātparācīrevopadadhyātparāñcameva tatpāpmānaṃ nirṛtimapahate - ७.२.१.
tisra iṣṭakā upadadhāti / trivṛdagniryāvānagniryāvatyasya mātrā tāvataiva tatpāpmānaṃ nirṛtimapahate - ७.२.१.
athāsandīṃ śikyam / rukmapāśamiṇḍve tatparārdhe nyasyati nairṛto vai pāśo nirṛtipāśādeva tatpramucyate yaṃ te devī nirṛtirābabandha pāśaṃ grīvāsvavicṛtyamityanevaṃviduṣā hāvicṛtyastaṃ te viṣyāmyāyuṣo na madhyādityagnirvā āyustasyaitanmadhyaṃ yaccito gārhapatyo bhavatyacita āhavanīyastasmādyadi yuvā'gniṃ cinute yadi sthavira āyuṣo na madhyādityevāhāthaitaṃ pitumaddhi prasūta ityannaṃ vai piturathaitadannamaddhi pramukta ityetattriṣṭubbhirvajro vai triṣṭubvajreṇaiva tatpāpmānaṃ nirṛtimapahate - ७.२.१.
tisra iṣṭakā bhavanti / āsandī śikyaṃ rukmapāśa iṇḍve tadaṣṭāvaṣṭākṣarā gāyatrī
gāyatro'gniryāvānagniryāvatyasya mātrā tāvataiva tatpāpmānaṃ nirṛtimapahate - ७.२.१.
athāntareṇodacamasaṃ ninayati / vajro vā āpo vajreṇaiva tatpāpmānaṃ nirṛtimantardhatte namo bhūtyai yedaṃ cakāretyupottiṣṭhanti bhūtyai vā etadagre devāḥ karmākurvata tasyā etannamo'kurvanbhūtyā u evāyametatkarma kurute tasyā etannamaskarotyapratīkṣamāyantyapratīkṣameva tatpāpmānaṃ nirṛtiṃ jahati - ७.२.१.
pratyetyāgnimupatiṣṭhate / etadvā etadayathāyathaṃ karoti yadagnau sāmicita etāṃ diśameti tasmā evaitannihnute'hiṃsāyai - ७.२.१.
yadvevopatiṣṭhate / ayaṃ vai loko gārhapatyaḥ pratiṣṭhā vai gārhapatya iyamu vai pratiṣṭhā'thaitadapathamivaiti yadetāṃ diśameti tadyadupatiṣṭhata imāmevaitatpratiṣṭhāmabhipratyaityasyāmevaitatpratiṣṭhāyāṃ pratitiṣṭhati - ७.२.१.
niveśanaḥ saṃgamano vasūnāmiti / niveśano hyayaṃ lokaḥ saṃgamano vasūnāṃ viśvā rūpābhicaṣṭe śacībhiriti sarvāṇi rūpāṇyabhicaṣṭe śacībhirityetaddeva iva savitā satyadharmendro na tasthau samare pathīnāmiti yathaiva yajustathā bandhuḥ - ७.२.१.