Shatapatha Brahmana · Verses 7.2-4

७.२.२
atha prāyaṇīyaṃ nirvapati / tasya haviṣkṛtā vācaṃ visṛjate vācaṃ visṛjya stambayajurharati stambayajurhṛtvā pūrveṇa parigraheṇa parigṛhya likhitvā''ha hara tririti harati trirāgnīdhraḥ - ७.२.२.
pratyetya prāyaṇīyena pracarati / prāyaṇīyena pracarya sīraṃ yunaktyetadvā enaṃ devāḥ saṃskariṣyantaḥ purastādannena samārdhayaṃstathaivainamayametatsaṃskariṣyanpurastādannena samardhayati sīrambhavati seraṃ haitadyatsīramirāmevāsminnetaddadhāti - ७.२.२.
audumbaraṃ bhavati / ūrgvai rasa udumbara ūrjaivainametadrasena samardhayati mauñjaṃ parisīryaṃ trivṛttasyokto bandhuḥ - ७.२.२.
so'gnerdakṣiṇāṃ śroṇim / jaghanena tiṣṭhannuttarasyāṃsasya purastādyujyamānamabhimantrayate sīrā yuñjanti kavayo yugā vitanvate pṛthagiti ye vidvāṃsaste kavayaste sīraṃ ca yuñjanti yugāni ca vitanvate pṛthagdhīrā deveṣu sumnayeti yajño vai sumnaṃ dhīrā deveṣu yajñaṃ tanvānā ityetat - ७.२.२.
yunakta sīrā vi yugā tanudhvamiti / yuñjanti hi sīraṃ vi yugāni tanvanti kṛte yonau vapateha bījamiti bījāya vā eṣā yoniṣkriyate yatsītā yathā ha vā ayonau retaḥ siñcedevaṃ tadyadakṛṣṭe vapati girā ca śruṣṭiḥ sabharā asanna iti vāgvai gīrannaṃ
śruṣṭirnedīya itsṛṇyaḥ pakvameyāditi yadā vā annaṃ pacyate'tha tatsṛṇyopacaranti dvābhyāṃ yunakti gāyatryā ca triṣṭubhā ca tasyokto bandhuḥ - ७.२.२.
sa dakṣiṇamevāgre yunakti / atha savyamevaṃ devatretarathā mānuṣe ṣaḍgavambhavati dvādaśagavaṃ vā caturviṃśatigavaṃ vā saṃvatsaramevābhisampadam - ७.२.२.
athainaṃ vikṛṣati / annaṃ vai kṛṣiretadvā asmindevāḥ saṃskariṣyantaḥ purastādannamadadhustathaivāsminnayametatsaṃskariṣyanpurastādannaṃ dadhāti - ७.२.२.
sa vā ātmānameva vikṛṣati / na pakṣapucchānyātmaṃstadannaṃ dadhāti yadu vā ātmannannaṃ dhīyate tadātmānamavati tatpakṣapucchānyatha yatpakṣapuccheṣu naiva tadātmānamavati na pakṣapucchāni - ७.२.२.
sa dakṣiṇārddhenāgneḥ / antareṇa pariśritaḥ prācīṃ prathamāṃ sītāṃ kṛṣati śunaṃ suphālā vikṛṣantu bhūmiṃ śunaṃ kīnāśā abhiyantu vāhairiti śunaṃ śunamiti yadvai samṛddhaṃ tacchunaṃ samardhayatyevaināmetat - ७.२.२.
atha jaghanārdhenodīcīm / ghṛtena sītā madhunā samajyatāmiti yathaiva yajustathā bandhurviśvairdevairanumatā marudbhiriti viśve ca vai devā marutaśca varṣasyeśata ūrjasvatī payasā pinvamāneti raso vai paya ūrjasvatī rasenānnena pinvamānetyetadasmāntsīte payasā'bhyāvavṛtsvetyasmāntsīte rasenābhyāvavṛtsvetyetat - ७.२.२.
athottarārdhena prācīṃ / lāṅgalaṃ pavīravaditi lāṅgalaṃ rayimadityetatsuśevaṃ somapitsarvityannaṃ vai somastadudvapati gāmaviṃ prapharvyaṃ ca pīvarīṃ prasthāvadrathavāhaṇamityetaddhi sarvaṃ sītodvapati - ७.२.२.
atha pūrvārdhena dakṣiṇām / kāmaṃ kāmadughe dhukṣva mitrāya varuṇāya ca indrāyāśvibhyāṃ pūṣṇe prajābhya oṣadhībhya iti sarvadevatyā vai kṛṣiretābhyo devatābhyaḥ sarvānkāmāndhukṣvetyetadityagre kṛṣatyatheti athetyatheti taddakṣiṇāvṛttaddhi devatrā - ७.२.२.
catasraḥ sītā yajuṣā kṛṣati / tadyaccatasṛṣu dikṣvannaṃ tadasminnetaddadhāti tadvai yajuṣā'ddhā vai tadyadyajuraddho tadyadimā diśaḥ - ७.२.२.
athātmānaṃ vikṛṣati / tadyadeva saṃvatsare'nnaṃ tadasminnetaddadhāti tūṣṇīmaniruktaṃ vai tadyattūṣṇīṃ sarvaṃ vā aniruktaṃ sarveṇaivāsminnetadannaṃ dadhātītyagre kṛṣatyatheti athetyatheti taddakṣiṇāvṛttaddhi devatrā - ७.२.२.
tisrastisraḥ sītāḥ kṛṣati / trivṛdagniryāvānagniryāvatyasya mātrā tāvataivāsminnetadannaṃ dadhāti - ७.२.२.
dvādaśa sītāstūṣṇīṃ kṛṣati / dvādaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvataivāsminnetadannaṃ dadhāti - ७.२.२.
tā ubhayyaḥ ṣoḍaśa sampadyante / ṣoḍaśakalaḥ prajāpatiḥ prajāpatiragnirātmaṃsammitamevāsminnetadannaṃ dadhāti yadu vā ātmasammitamannaṃ tadavati tanna hinasti yadbhūyo hinasti tadyatkanīyo na tadavati - ७.२.२.
yadvevainaṃ vikṛṣati / etadvā asmindevāḥ saṃskariṣyantaḥ purastātprāṇānadadhustathaivāsminnayametatsaṃskariṣyanpurastātprāṇāndadhāti lekhā bhavanti lekhāsu hīme prāṇāḥ - ७.२.२.
catasraḥ sītā yajuṣā kṛṣati / tadya ime śīrṣaṃścatvāro niruktāḥ prāṇāstānasminnetaddadhāti tadvai yajuṣā'ddhā vai tadyadyajuraddho tadyadime śīrṣanprāṇāḥ - ७.२.२.
yadvevātmānaṃ vikṛṣati / ya eveme'ntarātmanprāṇāstānasminnetaddadhāti tūṣṇīṃ ko hi tadveda yāvanta ime'ntarātmanprāṇāḥ - ७.२.२.
athainānvimuñcati / āptvā taṃ kāmaṃ yasmai kāmāyainānyuṅkte vimucyadhvamaghnyā ityaghnyā haite devatrā devayānā iti daivaṃ hyebhiḥ karma karotyaganma tamasaspāramasyetyaśanāyā vai tamo'ganmāsyā aśanāyāyai pāramityetajjyotirāpāmeti jyotirhyāpnoti yo devānyo yajñamathainānudīcaḥ prācaḥ prasṛjati tasyokto bandhustānadhvaryave dadāti sa hi taiḥ karoti tāṃstu dakṣiṇānāṃ kāle'nudiśet - ७.२.२.