Scripture Library

Shatapatha Brahmana · Verses 7.2-3

7.2-3.7.2.3.1

७.२.३ darbhastambopadhānam
atha darbhastambamupadadhāti / etadvai devā oṣadhīrupādadhata tathaivaitadyajamāna oṣadhīrupadhatte -

7.2-3.7.2.3.2

yadveva darbhastambamupadadhāti / jāyata eṣa etadyaccīyate sa eṣa sarvasmā'annāya jāyata ubhayamvetadannaṃ yaddarbhā āpaśca hyetā oṣadhayaśca yā vai vṛtrādbībhatsamānā āpo dhanva dṛbhantya udāyaṃste darbhā abhavanyaddṛbhantya udāyaṃstasmāddarbhāstā haitāḥ śuddhā medhyā āpo vṛtrābhiprakṣaritā yaddarbhā yadu darbhāstenauṣadhaya ubhayenaivainmetadannena prīṇāti -

7.2-3.7.2.3.3

sītāsamare / vāgvai sītāsamaraḥ prāṇā vai sītāstāsāmayaṃ samayo vāci vai prāṇebhyo'nnaṃ dhīyate madhyato madhyata evāsminnetadannaṃ dadhāti tūṣṇīmaniruktaṃ vai tadyattūṣṇīṃ sarvaṃ vā aniruktaṃ sarveṇaivāsminnetadannaṃ dadhāti -

7.2-3.7.2.3.4

athainamabhijuhoti / jāyata eṣa etadyaccīyate sa eṣa sarvasmā annāya jāyate sarvasyo'asyaiṣa raso yadājyamapāṃ ca hyeṣa oṣadhīnāṃ ca raso'syaivainametatsarvasya rasena prīṇāti yāvānu vai rasastāvānātmā'nenaivainametatsarveṇasya prīṇāti pañcagṛhītena pañcacitiko'gniḥ pañca'rtavaḥ saṃvatsaraḥ saṃvatsaro'gniryāvānagniryāvatyasya mātrā tāvataivainametadannena prīṇāti -

7.2-3.7.2.3.5

yadvevainamabhijuhoti / etadvai yatraitaṃ prāṇā ṛṣayo'gre'gniṃ samaskurvaṃstadasminnetaṃ purastādbhāgamakurvata tasmātpurastādbhāgāstadyadabhijuhoti ya evāsmiṃste prāṇā ṛṣayaḥ
purastādbhāgamakurvata tānevaitatprīṇātyājyena pañcagṛhītena tasyokto bandhuḥ -

7.2-3.7.2.3.6

yadvevainamabhijuhoti / etadvai yānyetasminnagnau rūpāṇyupadhāsyanbhavati yāntstomānyāni pṛṣṭhāni yāni chandāṃsi tebhya etaṃ purastādbhāgaṃ karoti tānyevaitatprīṇātyājyena pañcagṛhītena tasyokto bandhuḥ -

7.2-3.7.2.3.7

yadvevainamabhijuhoti / etadvai devā abibhayurdīrghaṃ vā idaṃ karma yadvai na imamiha rakṣāṃsi nāṣṭrā na hanyuriti ta etāmetasya karmaṇaḥ purastātsaṃsthāmapaśyaṃstamatraiva sarvaṃ samasthāpayannatrācinvaṃstathaivainamayametadatraiva sarvaṃ saṃsthāpayatyatra cinoti -

7.2-3.7.2.3.8

sajūrabda iti citiḥ / ayavobhiriti purīṣaṃ sajūruṣā iti citiraruṇībhiriti purīṣaṃ
sajoṣasāvaśvineti citirdaṃsobhiriti purīṣaṃ sajūḥ sūra iti citiretaśeneti purīṣaṃ sajūrvaiśvānara iti citiriḍayeti purīṣaṃ ghṛteneti citiḥ sveti purīṣaṃ heti citiḥ -

7.2-3.7.2.3.9

trayodaśaitā vyāhṛtayo bhavanti / trayodaśa māsāḥ saṃvatsarastrayodaśāgneścitipurīṣāṇi yāvānagniryāvatyasya mātrā tāvantamevainametaccinotyājyena juhotyagnireṣa yadājyamagnimevaitaccinoti pañcagṛhītena pañcacitiko'gniḥ pañca'rtavaḥ saṃvatsaraḥ saṃvatsaro'gniryāvānagniryāvatyasya mātrā tāvantamevainametaccinotyūrdhvāmudgṛhṇanjuhotyūrdhvaṃ tadagniṃ citibhiścinoti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0