Shatapatha Brahmana · Verses 7.2-2

७.२.४ apāṃ ninayanaṃ sarvauṣadhavapanaṃ ca
athodacamasānninayati / etadvai devā abruvaṃścetayadhvamiti citimicchateti vāva tadabruvaṃste cetayamānā vṛṣṭimeva citimapaśyaṃstāmasminnadadhustathaivāsminnayametaddadhāti -

udacamasā bhavanti / āpo vai vṛṣṭirvṛṣṭimevāsminnetaddadhātyaudumbareṇa camasena tasyokto bandhuścatuḥsraktinā catasro vai diśaḥ sarvābhya evāsminnetaddigbhyo vṛṣṭiṃ dadhāti -

trīṃstrīnudacamasānninayati / trivṛdagniryāvānagniryāvatyasya mātrā tāvataivāsminnetadvṛṣṭiṃ dadhāti -

dvādaśodacamasānkṛṣṭe ninayati / dvādaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvataivāsminnetadvṛṣṭiṃ dadhāti -

sa vai kṛṣṭe ninayati / tasmātkṛṣṭāya varṣati sa yatkṛṣṭa eva ninayennākṛṣṭe kṛṣṭāyaiva varṣennākṛṣṭāyātha yadakṛṣṭa eva ninayenna kṛṣṭe akṛṣṭāyaiva varṣenna kṛṣṭāya kṛṣṭe cākṛṣṭe ca ninayati tasmātkṛṣṭāya cākṛṣṭāya ca varṣati -

trīnkṛṣṭe cākṛṣṭe ca ninayati / trivṛdagniryāvānagniryāvatyasya mātrā tāvataivāsminnetadvṛṣṭiṃ dadhāti -

yadvevodacamasānninayati / etadvā asmindevāḥ saṃskariṣyantaḥ purastādapodadhustathaivāsminnayametatsaṃskariṣyanpurastādapo dadhāti -

trīṃstrīnudacamasānninayati / trivṛdagniryāvānagniryāvatyasya mātrā tāvataivāsminnetadapo dadhāti -

dvādaśodacamasānkṛṣṭe ninayati / dvādaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvataivāsminnetadapo dadhāti -

sa vai kṛṣṭe ninayati / prāṇeṣu tadapo dadhāti sa yatkṛṣṭa eva ninayennākṛṣṭe prāṇeṣvevāpaḥ syurnetarasminnātmannatha yadakṛṣṭa eva ninayenna kṛṣṭa ātmannevāpaḥ syurna prāṇeṣu kṛṣṭe cākṛṣṭe ca ninayati tasmādimā ubhayatrāpaḥ prāṇeṣu cātmaṃśca -

trīnkṛṣṭe cākṛṣṭe ca ninayati / trivṛdagniryāvānagniryāvatyasya mātrā tāvataivāsminnetadapo dadhāti -

pañcadaśodacamasānninayati / pañcadaśo vai vajra etenaivāsyaitatpañcadaśena vajreṇa sarvaṃ pāpmānamapahanti -

atha sarvauṣadhaṃ vapati / etadvai devā abruvaṃścetayadhvamiti citimicchateti vāva tadabruvaṃste cetayamānā annameva citimapaśyaṃstāmasminnadadhustathaivāsminnayametaddadhāti -

sarvauṣadhaṃ bhavati / sarvameva tadannaṃ yatsarvauṣadhaṃ sarvamevāsminnetadannaṃ dadhāti teṣāmekamannamuddharettasya nāśnīyādyāvajjīvamaudumbareṇa camasena tasyokto bandhuścatuḥsraktinā catasro vai diśaḥ sarvābhya evāsminnetaddigbhyo'nnaṃ dadhātyanuṣṭubbhirvapati vāgvā anuṣṭubvāco vā annamadyate -

tisṛbhistisṛbhirṛgbhirvapati / trivṛdagniryāvānagniryāvatyasya mātrā tāvataivāsminnetadannaṃ dadhāti -

dvādaśabhirṛgbhiḥ kṛṣṭe vapati / dvādaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvataivāsminnetadannaṃ dadhāti -

sa vai kṛṣṭe vapati / tasmātkṛṣṭe'nnaṃ pacyate yatkṛṣṭa eva vapennākṛṣṭe kṛṣṭa evānnaṃ pacyeta nākṛṣṭe'tha yadakṛṣṭa eva vapenna kṛṣṭe'kṛṣṭa evānnaṃ pacyeta na kṛṣṭe kṛṣṭe cākṛṣṭe ca vapati tasmātkṛṣṭe cākṛṣṭe cānnaṃ pacyate -

tisṛbhiḥ kṛṣṭe cākṛṣṭe ca vapati / trivṛdagniryāvānagniryāvatyasya mātrā tāvataivāsminnetadannaṃ dadhāti -

yadveva sarvauṣadhaṃ vapati / etadvā enaṃ devāḥ saṃskariṣyantaḥ purastātsarveṇa bheṣajenābhiṣajyaṃstathaivainamayametatsaṃskariṣyanpurastātsarveṇa bheṣajena bhiṣajyati -

sarvauṣadhaṃ bhavati / sarvametadbheṣajaṃ yatsarvauṣadhaṃ sarveṇaivainametadbheṣajena bhiṣajyati -

tisṛbhistisṛbhirṛgbhirvapati / trivṛdagniryāvānagniryāvatyasya mātrā tāvataivainametadbhiṣajyati -

dvādaśabhirṛgbhiḥ kṛṣṭe vapati / dvādaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvataivainametadbhiṣajyati -

sa vai kṛṣṭe vapati / prāṇāṃstadbhiṣajyati sa yatkṛṣṭa eva vapennākṛṣṭe prāṇāneva bhiṣajyennetaramātmānamatha yadakṛṣṭa eva vapenna kṛṣṭa ātmānameva bhiṣajyenna prāṇānkṛṣṭe cākṛṣṭe ca vapati prāṇāṃśca tadātmānaṃ ca bhiṣajyati -

tisṛbhiḥ kṛṣṭe cākṛṣṭe ca vapati / trivṛdagniryāvānagniryāvatyasya mātrā tāvataivainametadbhiṣajyati -

pañcadaśodacamasānninayati pañcadaśabhirṛgbhirvapati tattriṃśattriṃśadakṣarā virāḍvirāḍu kṛtsnamannaṃ sarvamevāsminnetatkṛtsnamannaṃ dadhāti -

yā oṣadhīḥ pūrvā jātāḥ / devebhyastriyugaṃ puretyṛtavo vai devāstebhya etāstriḥ purā jāyante vasantā prāvṛṣi śaradi manai nu babhrūṇāmahamiti somo vai babhruḥ saumyā oṣadhaya oṣadhaḥ puruṣaḥ śataṃ dhāmānīti yadidaṃ śatāyuḥ śatārghaḥ śatavīryaḥ etāni hāsya tāni śataṃ dhāmāni sapta ceti ya eveme saptaśīrṣanprāṇāstānetadāha -

śataṃ vo amba dhāmāni / sahasramuta vo ruha iti yadidaṃ śatadhā ca sahasradhā ca virūḍhā adhā śatakratvo yūyamimaṃ me agadaṃ kṛteti yamimaṃ bhiṣajyāmītyetat -

tā etā ekavyākhyānāḥ / etamevābhi yathaitameva bhiṣajyedetaṃ pārayettā anuṣṭubho bhavanti vāgvā anuṣṭubvāgu sarvaṃ bheṣajaṃ sarveṇaivainametadbheṣajena bhiṣajyati -

athāto niruktāniruktānāmeva / yajuṣā dvāvanaḍvāhau yunakti tūṣṇīmitarānyajuṣā
catasraḥ kṛṣati tūṣṇīmitarāstūṣṇīṃ darbhastambamupadadhāti yajuṣābhijuhoti tūṣṇīmudacamasānninayati yajuṣā vapati -

prajāpatireṣo'gniḥ / ubhayamvetatprajāpatirniruktaścāniruktaśca parimitaścāparimitaśca tadyadyajuṣā karoti yadevāsya niruktaṃ parimitaṃ rūpaṃ tadasya tena saṃskarotyatha yattūṣṇīṃ yadevāsyāniruktamaparimitaṃ rūpaṃ tadasya tena saṃstaroti sa ha vā etaṃ sarvaṃ kṛtsnaṃ prajāpatiṃ saṃskaroti ya evaṃ vidvānetadevaṃ karoti bāhyāni rūpāṇi niruktāni bhavantyantarāṇyaniruktāni paśureṣa yadagnistasmātpaśorbāhyāni rūpāṇi niruktāni bhavantyantarāṇyaniruktāni -