Shatapatha Brahmana · Chapter 6.8.2

athāto bhasmana evābhyavaharaṇasya / devā vā etadagre bhasmodavapaṃste'bruvanyadi vā idamitthameva sadātmānamabhisaṃskariṣyāmahe martyāḥ kuṇapā anapahatapāpmāno bhaviṣyāmo yadyu parāvapsyāmo yadatrāgneyaṃ bahirddhā tadagneḥ kariṣyāma upa tajjānīta yathedaṃ karavāmeti te'bruvaṃścetayadhvamiti citimicchateti vāva tadabruvaṃstadicchata yathedaṃ karavāmeti -

te cetayamānāḥ / etadapaśyannapa evainadabhyavaharāmāpo vā asya sarvasya pratiṣṭhā tadyatrāsya sarvasya pratiṣṭhā tadenatpratiṣṭhāpya yadatrāgneyaṃ tadadbhyo'dhi janayiṣyāma iti tadapo'bhyavāharaṃstathaivainadayametadapo'bhyavaharati -

āpo devīḥ / pratigṛbhṇīta bhasmaitatsyone kṛṇudhvaṃ surabhā u loka iti jagdhaṃ vā etadyātayāma bhavati tadetadāha srabhiṣṭha enalloke kurudhvamiti tasmai namantāṃ janaya ityāpo vai janayo'dbhyo hīdaṃ sarvaṃ jāyate supatnīrityagninā vā āpaḥ supatnyo māteva putraṃ bibhṛtāpsvenadini yathā mātā putramupasthe bibhṛyādevamenadbibhṛtetyetat -

apsvagne sadhiṣṭaveti / apsvagne yoniṣṭavetyetatsauṣadhīranurudhyasa ityoṣadhīrhyeṣo'nurudhyate garbhe sañjāyase punariti garbho hyeṣa sañjāyate punargarbho asyoṣadhīnāṃ garbho vanaspatīnāṃ garbho viśvasya bhūtasyāgne garbho apāmasīti tadenamasya sarvasya garbhaṃ karoti -

tribhirabhyavaharati / trivṛdagniryāvānagniryāvatyasya mātrā tāvataivainadetadabhyavaharatyekenāgre'tha dvābhyāṃ dvābhyāṃ vāgre'thaikena dvistu kṛtvo'bhyavaharati tadye dvipādāḥ paśavastairevainadetadabhyavaharati -

athāpādatte / tadyadatrāgneyaṃ tadetadadbhyo'dhi janayatyanayā'nayā vai bheṣajaṃ kriyate'nayaivainametatsambharati prasadya bhasmanā yonimapaśca pṛthivīmagna iti prasanno hyeṣa bhasmanā yonimapaśca pṛthivīṃ ca bhavati saṃsṛjya mātṛbhiṣṭvaṃ jyotiṣmānpunarāsada iti saṃgatya mātṛbhiṣṭvaṃ jyotiṣmānpunarāsada ityetatpunarāsadya sadanaṃ punarūrjā saha rayyetyetena mā sarveṇābhinivartasvetyetat -

caturbhirapādatte / tadye catuṣpādāḥ paśavastairevainametatsambharatyatho annaṃ vai paśavo'nnenaivainametatsambharati tribhirabhyavaharati tatsapta saptacitiko'gniḥ sapta'rtavaḥ saṃvatsaraḥ saṃvatsaro'gniryāvānagniryāvatyasya mātrā tāvattadbhavati -

apādāya bhasmanaḥ pratyetya / ukhāyāmopyopatiṣṭhata etadvā etadayathāyathaṃ karoti yadagnimapo'bhyavaharati tasmā evaitannihnute'hiṃsāyā āgneyībhyāmagnaya evaitannihnute buddhavatībhyāṃ yathaivāsyaitadagnirvaco nibodhet -

bodhā me asya vacaso yaviṣṭheti / bodha me'sya vacaso yaviṣṭhetyetanmaṃhiṣṭhasya prabhṛtasya svadhāva iti bhūyiṣṭhasya prabhṛtasya svadhāva ityetatpīyati tvo anu tvo gṛṇātīti pīyatyeko'nveko gṛṇāti vandāruṣṭe tanvaṃ vande agna iti vanditā te'haṃ tanvaṃ vande'gna ityetatsa bodhi sūrirmaghavā vasupate vasudāvan yuyodhyasmaddveṣāṃsīti yathaivāsmāddveṣāṃsi yuyādevametadāha dvābhyāmupatiṣṭhate gāyatryā ca triṣṭubhā ca tasyokto bandhuḥ -

tāni nava bhavanti / nava diśo diśo'gnirnava prāṇāḥ prāṇā agniryāvānagniryāvatyasya mātrā tāvattadbhavati -

atha prāyaścittī karoti / sarvebhyo vā eṣa etaṃ kāmebhya ādhatte tadyadevāsyātra kāmānāṃ vyavacchidyate'gnāvapo'bhyavahriyamāṇe tadevaitatsaṃtanoti saṃdadhātyubhe prāyaścittī karoti ye evāgnāvanugate tasyokto bandhuḥ -

tāni daśa bhavanti / daśākṣarā virāḍvirāḍagnirdaśa diśo diśo'gnirdaśa prāṇāḥ prāṇā agniryāvānagniryāvatyasya mātrā tāvattadbhavati -

iti mādhyaṃdinīye śatapathabrāhmaṇe ukhāsaṃbharaṇaṃ nāma ṣaṣṭhaṃ kāṇḍaṃ samāptam//