Shatapatha Brahmana · Chapter 6.8.1

vanīvāhyetāgniṃ bibhradityāhuḥ / devāścāsurāścobhaye prājāpatyā asparddhanta te devāścakramacarañchālamasurā āsaṃste devāścakreṇa caranta etatkarmāpaśyaṃścakreṇa hi vai devāścaranta etatkarmāpaśyaṃstasmādanasa eva pauroḍāśeṣu yajūṃṣyanaso'gnau -

sa yo vanīvāhyate / devānkarmaṇaiti daivaṃ hāsya karma kṛtaṃ bhavatyatha yo na vanīvāhyate'surānkarmaṇaityasuryaṃ hāsya karma kṛtaṃ bhavati -

taddhaika āhuḥ / svayaṃ vā eṣa vanīvāhito viṣṇukramairvā eṣa prayāti vātsapreṇāvasyatīti na tathā vidyāddaivaṃ vā asya tatprayāṇaṃ yadviṣṇukramā daivamavasānaṃ yadvātsapramathāsyedaṃ mānuṣaṃ prayāṇaṃ yadidaṃ prayāti mānuṣamavasānaṃ yadavasyati -

prajāpatireṣogniḥ / ubhayamvetatprajāpatiryacca devā yaccamanuṣyāstadyadviṣṇukramavātsapre bhavato yadvevāsya daivaṃ rūpaṃ tadasya tena saṃskarotyatha yadvanīvāhyate yadevāsya mānuṣaṃ rūpaṃ tadasya tena saṃskaroti sa ha vā etaṃ sarvaṃ kṛtsnaṃ prajāpatiṃ saṃskaroti ya evaṃ vidvānvanīvāhyate tasmādu vanīvāhyetaiva -

sa yadahaḥ prayāsyantsyāt / tadaharuttarato'gneḥ prāgana upasthāpyāthāsmintsamidhamādadhātyetadvā enaṃ devā eṣyantaṃ purastādannenāprīṇannetayā samidhā tathaivainamayametadeṣyantaṃ purastādannena prīṇātyetayā samidhā -

samidhāgniṃ duvasyateti / samidhāgniṃ namasyatetyetadghṛtairbodhayatātithimā'sminhavyā juhotaneti ghṛtairaha bodhayatātithimo 'asminhavyāni juhutetyetadbuddhavatyetyāyai hyenametadbodhayati -

athainamudyacchati / udu tvā viśve devā agne bharantu cittibhiriti viśve vā etamagre devāścittibhirudabharannetaddhyeṣāṃ tadā cittamāsīttathaivainamayametaccitibhirudbharatyetaddhyasya tadā cittaṃ bhavati sa no bhava śivastvaṃ supratīko vibhāvasuriti yathaiva yajustathā bandhustaṃ dakṣiṇata udañcamādadhāti tasyokto bandhuḥ sthālyāṃ gārhapatyaṃ samupyāparamādadhāti sa yadi kāmayetopādhirohetpārśvato vā vrajet -

athānaḍvāhau yunakti / dakṣiṇamagre'tha savyamevaṃ devatretarathā mānuṣe sa yāṃ kāṃ ca diśaṃ yāsyantsyātprāṅevāgre prayāyātprācī hi digagneḥ svāmeva taddiśamanu prayāti -

predagne jyotiṣmānyāhi / śivebhirarcibhiṣṭvāmiti predagne tvaṃ jyotiṣmānyāhi śivebhirarcibhirdīpyamānairityetadbṛhadbhirbhānubhirbhāsanmā hiṃsīstanvā prajā iti bṛhadbhirarcibhirdīpyamānairmā hiṃsīrātmanā prajā ityetat -

sa yadā'kṣa utsarjet / athaitadyajurjapedasuryā vā eṣā vāgyā'kṣasya tāmetacchamayati tāmetaddevatrā karoti -

yadvevaitadyajurjapati / yasminvai kasmiṃścāhite'kṣa utsarjati tasyaiva sā vāgbhavati tadyadagnāvāhite'kṣa utsarjatyagnereva sā vāgbhavatyagnimeva taddevā upāstuvannupāmahayaṃstathaivainamayametadupastautyupamahayatyakrandadagni stanayanniva dyauriti tasyokto bandhuḥ -

sa yadi purā vasatyai vimuñceta / anasyevāgniḥ syādatha yadā vasatyai vimuñceta prāgana' upasthāpyottarata uddhatyāvokṣati yatrainamupāvaharati taṃ dakṣiṇata udañcamupāvaharati tasyokto bandhuḥ -

athāsmintsamidhamādadhāti / etadvā enaṃ devā īyivāṃsamupariṣṭādannenāprīṇannetayā samidhā tathaivainamayametadīyivāṃsamupariṣṭādannena prīṇātyetayā samidhā -

pra prāyamagnirbharatasya śṛṇva iti / prajāpatirvai bharataḥ sa hīdaṃ sarvaṃ bibharti vi yatsūryo na rocate bṛhadbhā iti vi yatsūrya iva rocate bṛhadbhā ityetadabhi yaḥ pūruṃ pṛtanāsu tasthāviti pūrurha nāmāsurarakṣasamāsa tamagniḥ pṛtanāsvabhitaṣṭhau dīdāya daivyo atithiḥ śivo na iti dīpyamāno daivo'tithiḥ śivo na ityetatsthitavatyā vasatyai hyenaṃ tatsthāpayati -

athātaḥ sampadeva / samidhaṃ prathamenādadhātyudyacchatyekena prayātyekenākṣamekenānumantrayate samidhameva pañmenādadhāti tatpañca pañcacitiko'gniḥ pañca'rtavaḥ saṃvatsaraḥ saṃvatsaro'gniryāvānagniryāvatyasya mātrā tāvattadbhavati -