Scripture Library

Shatapatha Brahmana · Chapter 6.7.3

6.7.3.6.7.3.1

athainamiti pragṛhṇāti / etadvai devā akāmayanta parjanyo rūpaṃ syāmeti ta etenātmanā parjanyo rūpamabhavaṃstathaivaitadyajamāna etenātmanā parjanyo rūpaṃ bhavati -

6.7.3.6.7.3.2

akrandadagni stanayanniva dyauriti / krandatīva hi parjanya stanayankṣāmā rerihadvīrudhaḥ samañjanniti kṣāmā vai parjanyo rerihyamāṇo vīrudhaḥ samanakti sadyo jajñāno vi hīmiddho akhyaditi sadyo vā eṣa jajñāna idaṃ sarvaṃ vikhyāpayatyā rodasī bhānunā bhātyantaritīme vai dyāvāpṛthivī rodasī te eṣa bhānunā bhāti parobāhu pragṛhṇāti parobāhu hi parjanyaḥ -

6.7.3.6.7.3.3

athainamupāvaharati / etadvai yo'smiṃloke raso yadupajīvanaṃ tenaitatsahordhva imāṃllokānrohatyagnirvā asmiṃloke raso'gnirupajīvanaṃ tadyattāvadeva syānna hāsmiṃloke raso nopajīvanaṃ syādatha yatpratyavarohatyasminnevaitalloke rasamupajīvanaṃ dadhāti -

6.7.3.6.7.3.4

yadveva pratyavarohati / etadvā etadimāṃllokānita ūrdhvo rohati sa sa parāṅiva roha'
iyamu vai pratiṣṭhā tadyattāvadeva syātpra hāsmāllokādyajamānaścyavetātha yatpratyavarohatīmāmevaitatpratiṣṭhāmabhipratyaityasyāmevaitatpratiṣṭhāyāṃ pratitiṣṭhati -

6.7.3.6.7.3.5

yadevaṃ pratyavarohati / etadvā etadimāṃllokānita ūrddhvo jayati sa sa parāṅiva jayo
yo vai parāṅeva jayatyanye vai tasya jitamanvavasyantyatha ya ubhayathā jayati tasya tatra kāmacaraṇaṃ bhavati tadyatpratyavarohatīmānevaitallokānitaścordhvānamutaścārvāco jayati -

6.7.3.6.7.3.6

agne'bhyāvartin / abhi mā nivartasvāgne aṅgiraḥ punarūrjā saha rayyetyetena mā sarveṇābhinivartasvetyetaccatuṣkṛtvaḥ pratyavarohati caturhi kṛtva ūrdhvo rohati tadyāvatkṛtva ūrdhvo rohati tāvatkṛtvaḥ pratyavarohati tamupāvahṛtyoparinābhi dhārayati tasyokto bandhuḥ -

6.7.3.6.7.3.7

athainamabhimantrayate / āyurvā agnirāyurevaitadātmandhatta ā tvāhārṣamityā hyenaṃ harantyantarabhūrityāyurevaitadātmandhatte dhruvastiṣṭhāvicācalirityāyurevaitaddhruvamantarātmandhatte viśastvā sarvā vāñchantvityannaṃ vai viśo'nnaṃ tvā sarvaṃ vāñchatvityetanmā tvadrāṣṭramadhibhraśaditi śrīrvai rāṣṭraṃ mā tvacchrīradhibhraśadityetat -

6.7.3.6.7.3.8

atha śikyapāśaṃ ca rukmapāśaṃ conmuñcate / vāruṇo vai pāśo varuṇapāśādeva tatpramucyate vāruṇya'rcā svenaiva tadātmanā svayā devatayā varuṇapāśātpramucyata uduttamaṃ varuṇa pāśamasmadavādhamaṃ vi madhyamaṃ śrathāyeti yathaiva yajustathā bandhurathā vayamāditya vrate tavānāgaso aditaye syāmetīyaṃ vā aditiranāgasastubhyaṃ cāsyai syāmetyetat -

6.7.3.6.7.3.9

athainamiti pragṛhṇāti / etadvā enamado vikṛtyeta ūrdhvaṃ prāñcaṃ pragṛhṇāti taṃ tata iti pragṛhṇāti tadyattāvadevābhaviṣyadatra haivaiṣa vyaraṃsyatātha yadenamiti pragṛhṇāti tasmādeṣa itītvā'theti punaraiti -

6.7.3.6.7.3.10

agre bṛhannuṣasāmūrdhvo asthāditi / agre hyeṣa bṛhannuṣasāmūrdhvastiṣṭhati nirjaganvāntamaso jyotiṣāgāditi nirjaganvānvā eṣa rātryai tamaso'hnā jyotiṣaityagnirbhānunā ruśatā svaṅga ityagnirvā eṣa bhānunā ruśatā svaṅga ā jāto viśvā sadmānyaprā itīme vai lokā viśvā sadmāni tāneṣa jāta' āpūrayati parobāhu pragṛhṇāti parobāhu hyeṣa ito'thainamupāvaharatīmāmevaitatpratiṣṭhāmabhipratyaityasyāmevaitatpratiṣṭhāyāṃ pratitiṣṭhati jagatyā jagatī hemāṃllokānamuto'rvāco vyaśnute -

6.7.3.6.7.3.11

haṃsaḥ śuciṣaditi / asau vā ādityo haṃsaḥ śuciṣadvasurantarikṣasaditi vāyurvai vasurantarikṣasaddhotā vediṣadityagnirvai hotā vediṣadatithiriti sarveṣāṃ vā eṣa bhūtānāmatithirduroṇasaditi viṣamasadityetannṛṣaditi prāṇo vai nṛṣanmanuṣyā narastadyo'yaṃ manuṣyeṣu prāṇo'gnistametadāha varasaditi sarveṣu hyeṣa vareṣu sanna ṛtasaditi satyasadityetadvyomasaditi sarveṣu hyeṣa vyomasu sanno'bjā gojā ityabjāśca hyeṣa gojāśca'rtajā iti satyajā ityetadadrijā ityadrijā hyeṣa ṛtamitisatyamityetadbṛhaditi nidadhāti bṛhaddhyeṣa tadyadeṣa tadenametatkṛtvā nidadhāti -

6.7.3.6.7.3.12

dvābhyāmakṣarābhyām / dvipādyajamāno yajamāno'gniryāvānagniryāvatyasya mātrā tāvataivainametannidadhāti -

6.7.3.6.7.3.13

athainamupatiṣṭhate / etadvā enametallaghūyatīva yadenena saheti ceti cemāṃllokānkramate tasmā evaitannihnute'hiṃsāyai -

6.7.3.6.7.3.14

yadvevopatiṣṭhate / etadvai devā abibhayuryadvai no'yamimāṃllokānantikānna hiṃsyāditi tadebhya evainametallokebhyo'śamayaṃstathaivainamayametadebhyo lokebhyaḥ śamayati -

6.7.3.6.7.3.15

sīda tvaṃ mātuḥ / asyā upasthe'ntaragne rucā tvaṃ śivo bhūtvā mahyamagne atho sīda śivastvamiti śivaḥ śiva iti śamayatyevainametadahiṃsāyai tatho haiṣa imāṃllokāñchānto na hinasti -

6.7.3.6.7.3.16

tribhirupatiṣṭhate / traya ime lokā atho trivṛdagniryāvānagniryāvatyasya mātrā tāvataivāsmā etannihnute'tho tāvataivainametadebhyo lokebhyaḥ śamayati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0