Scripture Library

Shatapatha Brahmana · Chapter 6.7.1

6.7.1.6.7.1.1

rukmaṃ pratimucya bibharti / satyaṃ haitadyadrukmaḥ satyaṃ vā etaṃ yantumarhati satyenaitaṃ devā abibharuḥ satyenaivainametadbibharti -

6.7.1.6.7.1.2

tadyattatsatyam / asau sa ādityaḥ sa hiraṇmayo bhavati jyotirvai hiraṇyaṃ jyotireṣo'mṛtaṃ hiraṇyamamṛtameṣa parimaṇḍalo bhavati parimaṇḍalo hyeṣa ekaviṃśatinirbādha ekaviṃśo hyeṣa bahiṣṭānnirbādhaṃ bibharti raśmayo vā etasya nirbādhā bāhyata u vā etasya raśmayaḥ -

6.7.1.6.7.1.3

yadveva rukmaṃ pratimucya bibharti / asau vā āditya eṣa rukmo no haitamagnimmanuṣyo manuṣyarūpeṇa yantumarhatyetenaiva rūpeṇaitadrūpaṃ bibharti -

6.7.1.6.7.1.4

yadveva rukmaṃ pratimucya bibharti / reto vā idaṃ siktamayamagnistejo vīryaṃ rukmo'smiṃstadretasi tejo vīryaṃ dadhāti -

6.7.1.6.7.1.5

yadeva rukmaṃ pratimucya bibharti / etadvai devā abibhayuryadvai na imamiharakṣāṃsi nāṣṭrā na hanyuriti tasmā etamantikādgoptāramakurvannamumevādityamasau vā āditya eṣa rukmastathaivāsmā ayametamantikādgoptāraṃ karoti -

6.7.1.6.7.1.6

kṛṣṇājine niṣyūto bhavati / yajño vai kṛṣṇājinaṃ yajño vā etaṃ yantumarhati yajñenaitaṃ devā abibharuryajñenaivaitametadbibharti lomataśchandāṃsi vai lomāni chandāṃsi vā etaṃ yantumarhanti cchandobhiretaṃ devā abibharuśchandobhirevainametadbibharti -

6.7.1.6.7.1.7

abhi śuklāni ca kṛṣṇāni ca lomāni niṣyūto bhavati / ṛksāmayorhaite rūpe ṛksāme vā'etaṃ yantumarhata ṛksāmābhyāmetaṃ devā abibharurṛksāmābhyāmevainametadbibharti śāṇo rukmapāśastrivṛttasyokto bandhuḥ -

6.7.1.6.7.1.8

tamuparinābhi bibharti / asau vā āditya eṣa rukma uparinābhyu vā 'eṣaḥ -

6.7.1.6.7.1.9

yadvevoparinābhi / avāgvai nābhe retaḥ prajāpatistejo vīryaṃ rukmo nenme retaḥ prajātiṃ tejo vīryaṃ rukmaḥ pradahāditi -

6.7.1.6.7.1.10

yadvevoparinābhi / etadvai paśormedhyataraṃ yaduparinābhi purīṣasaṃhitataraṃ yadavāṅnābhestadyadeva paśormedhyataraṃ tenainametadbibharti -

6.7.1.6.7.1.11

yadvevoparinābhi / yadvai prāṇasyāmṛtamūrdhvaṃ tannābherūrdhvaiḥ prāṇairuccaratyatha yanmartyaṃ parāktannābhimatyeti tadyadeva prāṇasyāmṛtaṃ tadenametadabhisampādayati tenainametadbibharti -

6.7.1.6.7.1.12

athainamāsandyā bibharti / iyaṃ vā āsandyasyāṃ hīdaṃ sarvamāsannamiyaṃ vā etaṃ yantumarhatyanayaitaṃ devā abibharuranayaivainametadbibharti -

6.7.1.6.7.1.13

audumbarī bhavati / ūrgvai rasa udumbara ūrjaivainametadrasena bibhartyatho sarva ete vanaspatayo yadudumbaraḥ sarve vā etaṃ vanaspatayo yantumarhanti sarvairetaṃ vanaspatibhirdevā abibharuḥ sarvairevainametadvanaspatibhirbibharti -

6.7.1.6.7.1.14

prādeśamātryūrdhvā bhavati / prādeśamātro vai garbho viṣṇuryonireṣā garbhasammitāṃ tadyoniṃ karotyaratnimātrī tiraścī bāhurvā aratnirbāhuno vai vīryaṃ kriyate vīryasammitaiva tadbhavati vīryaṃ vā etaṃ yantumarhati vīryeṇaitaṃ devā abibharurvīryeṇaivainametadbibharti -

6.7.1.6.7.1.15

catuḥsraktayaḥ pādā bhavanti / catuḥsraktīnyanūcyāni catasro vai diśo diśo vā etaṃ yantumarhanti digbhiretaṃ devā abibharurdigbhirevainametadbibharti mauñjībhī rajjubhirvyutā bhavati trivṛdbhistasyokto bandhurmṛdā digdhā tasyo evokto'tho 'anatidāhāya -

6.7.1.6.7.1.16

athainaṃ śikyena bibharti / ime vai lokā eṣo'gnirdiśaḥ śikyaṃ digbhirhīme lokāḥ śaknuvanti sthātuṃ yacchaknuvanti tasmācchikyaṃ digbhirevainametadbibharti ṣaḍudyāmaṃ bhavati ṣaḍḍhi diśo mauñjaṃ trivṛttasyokto bandhurmṛdā digdhaṃ tasyo evokto'tho 'anatidāhāya -

6.7.1.6.7.1.17

tasyāpa 'eva pratiṣṭhā / apsu hīme lokāḥ pratiṣṭhitā āditya āsañjanamāditye hīme lokā digbhirāsaktāḥ sa yo haitadevaṃ vedaitenaiva rūpeṇaitadrūpaṃ bibharti -

6.7.1.6.7.1.18

yadvevainaṃ śikyena bibharti / saṃvatsara eṣo'gnirṛtavaḥ śikyamṛtubhirhi saṃvatsaraḥ śaknoti sthātuṃ yacchaknoti tasmācchikyamṛtubhirevainametadbibharti ṣaḍudyāmaṃ bhavati ṣaḍḍhyṛtavaḥ -

6.7.1.6.7.1.19

tasyāhorātre eva pratiṣṭhā / ahorātrayorhyayaṃ saṃvatsaraḥ pratiṣṭhitaścandramā āsañjanaṃ candramasi hyayaṃ saṃvatsara ṛtubhirāsaktaḥ sa yo haitadevaṃ vedaitenaivarūpeṇaitadrūpaṃ bibharti tasya ha vā eṣa saṃvatsarabhṛto bhavati ya evaṃ veda saṃvatsaropāsito haiva tasya bhavati ya evaṃ na vedetyadhidevatam -

6.7.1.6.7.1.20

athādhyātmam / ātmaivāgniḥ prāṇāḥ śikyaṃ prāṇairhyayamātmā śaknoti sthātuṃ yacchaknoti tasmācchikyaṃ prāṇairevainametadbibharti ṣaḍudyāmaṃ bhavati ṣaḍḍhi prāṇāḥ -

6.7.1.6.7.1.21

tasya mana eva pratiṣṭhā / manasi hyayamātmā pratiṣṭhito'nnamāsañjanamanne hyayamātmā prāṇairāsaktaḥ sa yo haitadevaṃ vedaitenaiva rūpeṇaitadrūpaṃ bibharti -

6.7.1.6.7.1.22

athainamukhayā bibharti / ime vai lokā ukheme vā 'etaṃ lokā yantumarhantyebhiretaṃ lokairdevā abibharurebhirevainametallokairbibharti -

6.7.1.6.7.1.23

sā yadukhā nāma / etadvai devā etena karmaṇaitayāvṛtemāṃllokānudakhananyadudakhanaṃstasmādutkhotkhā ha vai tāmukhetyācakṣate paro'kṣaṃ paro'kṣakāmā hi devāḥ -

6.7.1.6.7.1.24

tadvā ukheti dve akṣare / dvipādyajamāno yajamāno'gniryāvānagniryāvatyasya mātrā tāvataivainametadbibharti so eva kumbhī sā sthālī tatṣaṭ ṣaḍṛtavaḥ saṃvatsaraḥ saṃvatsaro'gniryāvānagniryāvatyasya mātrā tāvattadbhavati -

6.7.1.6.7.1.25

athainamiṇḍvā parigṛhṇāti / asau vā āditya eṣo'gnirahorātre iṇḍve amuṃ tadādityamahorātrābhyāṃ parigṛhṇāti tasmādeṣo'horātrābhyāṃ parigṛhītaḥ -

6.7.1.6.7.1.26

yadvevainanamiṇḍvābhyāṃ parigṛhṇāti / asau vā āditya eṣo'gnirimā u lokāviṇḍve amuṃ tadādityamābhyāṃ lokābhyāṃ parigṛhṇāti tasmādeṣa ābhyāṃ lokābhyāmparigṛhītaḥ parimaṇḍale bhavataḥ parimaṇḍalau hīmau lokau mauñje trivṛtī tasyokto bandhurmṛdā digdhe tasyo 'evokto'tho anatidāhāya -

6.7.1.6.7.1.27

athātaḥ sampadeva / āsandī cokhā ca śikyaṃ ca rukmapāśaścāgniśca rukmaśca tatṣaṭ ṣaḍṛtavaḥ saṃvatsaraḥ saṃvatsaro'gniryāvānagniryāvatyasya mātrā tāvattadbhavatīṇḍve tadaṣṭāvaṣṭākṣarā gāyatrī gāyatro'gniryāvānagniryāvatyasya mātrā tāvattadbhavati -

6.7.1.6.7.1.28

atha sarvasampat / catvāraḥ pādāścatvāryanūcyāni śikyaṃ ca rukmapāśaśca yadu kiṃca rajjavyaṃ śikyaṃ tadanūkhāgnī rukmastattrayodaśa trayodaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvattadbhavati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0